მარიამ გარშაულიშვილი ფოტოგრაფიით ცდილობს გადმოსცეს ადამიანის ყველაზე გულწრფელი ემოციები. ის რამდენიმე სფეროში ერთდროულად საქმიანობს, თუმცა ფოტოგრაფია ყველა მათგანში ფიგურირებს − თითქოს დამაკავშირებელი ჯაჭვია ამ ყველაფრის. თუ რა არის ფოტოგრაფია მისთვის და როგორ აღწერს მას, ამ ყველაფერზე უფრო დეტალურად მარიამი ჟურნალ OK!-ის ესაუბრა.
მარიამ, პირველად როდის და რატომ დაინტერესდით ფოტოგრაფიით?
13 წლისას უკვე მქონდა პატარა კამერა, რითაც ვიღებდი სხვადასხვა ადგილსა და ადამიანებს. ეს იყო ერთ-ერთი გზა, გადმომეცა ჩემი ხედვა. მახსოვს, როცა ვინმეს ვხედავდი დიდი ობიექტივით ხელში, მეც ძალიან მინდოდა მქონოდა მსგავსი. 18 წლის ასაკში შევისრულე ეს სურვილი და შევიძინე პროფესიული კამერა, რითაც უკვე გადავდგი პროფესიული ნაბიჯები. ყველაფერი დაიწყო მცირე გადაღებებით, შემდეგ იყო სხვადასხვა კომპანიასთან თანამშრომლობა, მათ შორის − უცხოურთან. დღეს უკვე 40-მდე საერთაშორისო კომპანიასთან ვთანამშრომლობ, რაც ჩემთვის უდიდესი პრაქტიკა და საინტერესო გამოწვევაა. ამ ყველაფერში კი ჩემი მეორე პროფესია − ციფრული მარკეტინგი დამეხმარა.
რა არის თქვენი ფოტოების ძირითადი თემა?
უფრო მეტად გამოვყოფდი ორ მიმართულებას. პირველი − მომხმარებლისთვის მნიშვნელოვანი დღეები, როგორიცაა ქორწილი, შვილის დაბადება და სხვა დასამახსოვრებელი თარიღი. ამ დროს, ამ ადამიანების ემოციების აღბეჭდვა ფოტოზე ყველაზე სასიამოვნოა ჩემთვის. მეორე თემა კი კომერცია გახლავთ. როგორც უკვე აღვნიშნე, ჩემი მეორე პროფესია მეხმარება დავინახო, როგორი უნდა იყოს პროდუქტი ფოტოში.
რას ნიშნავს თქვენთვის ფოტოგრაფია?
ამ პროფესიაში ყველაზე მეტად მომწონს ადამიანებთან ურთიერთობა და მათი ფსიქოლოგია. შემჩნევა, თუ როგორ ხედავენ საკუთარ თავს და როგორ სურთ სხვას დაანახონ თავი. კარგი ფოტოგრაფი ხომ ისაა, ვინც ამაში ეხმარება ადამიანს − გამოჩნდეს ის ფოტოზე ისეთი, როგორიც სურს სხვამ დაინახოს. ასევე, მინდა აღვნიშნო − ზოგიერთ ადამიანს ჰგონია, რომ ფოტოგრაფია მხოლოდ ღილაკზე ხელის დაჭერაა და მორჩა, არადა საკმაოდ დამღლელი და საპასუხისმგებლო პროცესია, რადგან შენ უნდა გადაიღო ისე, როგორც მათ სურთ და ასევე, ისე, როგორც შენ გგონია, რომ უკეთესი იქნება. ამ ორი სურვილის ერთდროულად გათვალისწინება კი ძალიან რთულია.
როგორ აღწერთ იმას, რაც აქამდე შეგიქმნიათ?
ბედნიერი დღეები… ყველაზე ხშირად მე ადამიანების ბედნიერ წუთებს ვიღებ, რაც, რა თქმა უნდა, სასიამოვნოა. მყავს მომხმარებელი, რომლის ქორწილიც გადავიღე მაქვს, მისი შვილის დაბადებაც, პირველი ნაბიჯებიც… დღეს ეს ბავშვი 5 წლისაა და მის მიმართ მშობლიური დამოკიდებულება მაქვს.
სამომავლო გეგმები…
სამომავლო გეგმებს რაც შეეხება, აუცილებლად მსურს საკუთარი ფოტოსტუდია, სადაც ჩემი მთლიანი აპარატურა მოიყრის თავს. ბევრი საინტერესო იდეა მაქვს, რომელზეც წინასწარ საუბარი ჯერ არ შემიძლია.
ტექსტი: სოფიო მალანია
