PSP – ჩემი ოჯახის აფთიაქი, საქართველოს ფარმაციის ლიდერი, ხარისხის გარანტი, ევროპული ღირებულებების მქონე კომპანია წარმოგიდგენთ ,,ევროპულ ისტორიებს”.
პლატონ გიგინეიშვილი 1879 წლის შობას დაიბადა სოფელ ჯურუყვეთში, ლანჩხუთში. პლატონ ექიმი ორი ფერის რეცეპტს უწერდა პაციენტებს − მწვანესა და თეთრს. გაჭირვებულ პაციენტებს მწვანე ფერის რეცეპტს აძლევდა. აფთიაქში რომ მიდიოდნენ, ფარმაცევტებმა უკვე იცოდნენ, რომ წამლები უფასოდ უნდა მიეცათ. თვის ბოლოს კი ექიმი ხარჯებს საკუთარი ხელფასით ფარავდა.
პლატონი კარდაკარ დადიოდა და მაშინ ჯერ კიდევ უკურნებელი ინფექციებით − ქოლერითა და ტიფით, ასევე მალარიით დაავადებულ ადამიანებს კურნავდა. ხშირად ავადმყოფები შინ მიჰყავდა კიდეც, რითაც საკუთარ სიცოცხლესაც საფრთხეში აგდებდა.
ერთხელ ახლანდელი 6 მაისის სახელობის პარკთან გაშლილი კარვიდან გოგონების ტირილი შემოესმა. დები აღმოჩნდნენ. ერთ-ერთი მათგანი ძალიან მძიმედ იყო. მაღალი სიცხე ჰქონდა. და მას დასტიროდა. პლატონმა გოგონას ტიფი დაუდგინა და დასთან ერთად სამკურნალოდ შინ წამოიყვანა.
ის გოგო ჯერ კიდევ სრულიად უცნობი მსახიობი ვერიკო ანჯაფარიძე აღმოჩნდა, და კი რეჟისორი, ასევე, კინორეჟისორ გიორგი დანელიას დედა − მერი.
არაერთი ბათუმელი გადაურჩენია პლატონ გიგინეიშვილს. ამიტომაც მას ჯერ საქართველოს, შემდეგ კი აჭარის დამსახურებული ექიმის სახელი მიანიჭეს. წლების განმავლობაში აჭარის ექიმთა საზოგადოების თავმჯდომარე იყო. პლატონმა უზარმაზარი წვლილი შეიტანა აჭარაში ტიფის დამარცხებაში.
როდესაც მძიმედ დაავადდა, მის კართან კოლეგებმა გამოაკრეს წარწერა − „ჯანის სისაღე“. შემდეგ კი ბათუმელებმა მარიას გამზირზე თივა დაყარეს, რათა ქვაფენილზე მოძრავი ეტლების ხმას ექიმის საძინებლამდე არ მიეღწია.
