ამ დღეების განმავლობაში ალბათ ბევრი ჩვენთაგანი დაფიქრებულა, თუ რატომ ვირჩევთ ევროპას და რატომ მივისწრაფვით ევროკავშირში გაწევრებისკენ? ამ კითხვებზე პასუხი ყველაზე კარგად ჩვენმა ახალგაზრდა თაობამ იცის, იმ ადამიანებმა, რომლებიც დღეს დგანან ქუჩაში და აპროტესტებენ რუსული კანონის მიღებას. ამ ახალგაზრდებმა იციან, რომ საქართველო თავისი ღირებულებებითა და კულტურით ყოველთვის იყო ევროპული ოჯახის ნაწილი, თუმცა იყო პერიოდი, როდესაც ამ ყველაფრის შეცვლა სურდათ, შეიძლება ითქვას, დღესაც ასეა, სურთ დაგვაბრუნონ იმ წარსულში, სადაც ახალი თაობა არასოდეს არ დაბრუნდება. ევროპა ჩვენი წინაპრების, ჩვენი საზოგადოების არჩევანია. ევროპა არის არჩევანის თავისუფლება, აზროვნება და მშვიდობიანი თანაარსებობის სივრცე, სადაც უმთავრესი ადამიანი, მისი უფლებები და თავისუფლებაა.
რუსუდან ფეტვიაშვილი, მხატვარი:
ჩემი აზრით, ევროპელობა არის უძველეს ქრისტიანულ ქვეყანათა გაერთიანება, რომლებსაც დიდი გამოცდილება აქვთ თავისუფალ სამყაროსთან ურთიერთობის. აფასებენ უმთავრეს ქრისტიანულ ღირებულებებს და ამ მრწამსის გარშემო ბრუნავს მათი ცნობიერება – მოყვასის სიყვარული, თანაგრძნობა, მხარდაჭერა, ადამიანის პატივისცემა, გულმხურვალედ სამართლის ძიება, თავისუფლების დაფასება და შრომისმოყვარეობა.
მიმაჩნია, რომ საქართველო ევროპის ნაწილია სულიერადაც და აზროვნებითაც, თავისი დამოუკიდებლობისადმი საუკუნოებრივი დაუღალავი სწრაფვით; თვითმყოფადობის და ქვეყნის ღირებულებების შენარჩუნების წყურვილით; ტოლერანტობით სხვა ერების და ქვეყნების მიმართ; პატიების ნიჭით (რაც იშვიათია, რომ მთლიანად ერს ახასიათებდეს).
საქართველოსთვის მნიშვნელოვანია ევროპის წევრი ქვეყანა გახდეს, რათა დაცული იყოს მისი ტერიტორიული მთლიანობა და დამოუკიდებლობა, ასევე, ქართველები უფრო შეძლებენ საკუთარი ნიჭის ჰარმონიულად წარმოჩენას მეცნიერებაში, ხელოვნებაში, სპორტსა და სხვა მნიშვნელოვან დარგში.
კოტე ყუბანეიშვილი, პოეტი:
„არის დასავლეთი და აღმოსავლეთი,
ნუ ფიქრობთ არიან ერთი.
სანამ ცა არსებობს და მიწა ასეთი,
რომელსაც დასცქერის ღმერთი,
მაგრამ მწამს, რომ
ორივე უმალვე განდგება,
სხვაობაც ეშმაკმა იცის,
თუ ორი ვაჟკაცი პირისპირ დადგება
საზღვარზე ცისა და მიწის“.
ეს არის ჯოზეფ რადიარდ კიპლინგის ბალადა, ჩემი თარგმნილია და ვეთანხმები მას. ჩვენ ვართ პირველი ევროპელები, ჩვენთან ჩამოვიდნენ პირველად ბერძნები და მოგვპარეს ოქროს საწმისი. ჩვენ ვართ ტროამდელი ცივილიზაცია, ჩვენ – კავკასიური რასა დიდი ხანია მიღებული ვართ ევროპაში. თუმცა შემდგომ სტალინმა ჩაგვიკეტა საზღვრები, გაუნათლებლობა და ჩვენი საქციელები გვაშორებდა ევროპასთან. ჩვენ მესაზღვრეები ვართ და მთები გვიშლის ხელს, დავინახოთ და აღმოვაჩინოთ მსოფლიო. ჩვენ თუ განათლება არ გვექნა და თუ ასე ჩაკეტილები ვიქნებით, დავიღუპებით. უპირველესად, ქართველმა უნდა გაიაზროს, მისი სამშობლო საქართველოა თუ „გრუზია“. თბილისი ვერ გაერთობა, თუ არ იქნება ერთობა. ჩვენ აღარ უნდა ვიყოთ რუსეთის გუბერნია, სწორედ ამიტომ უნდა გახდეს ჩვენი ქვეყანა ევროპული ოჯახის სრულუფლებიანი წევრი. ევროპელობა განსაზღვრავს შენს საკუთარ თავს. რომ გაიმარჯვონ ახალგაზრდებმა, საქართველო ხომ გალამაზდება.
ლიკა ევგენიძე, ტელეწამყვანი:
ანტიკური დროიდან მოყოლებული, საქართველო თავისი კულტურითა და ღირებულებებით, ყოველთვის იყო ევროპის ნაწილი. საბჭოთა პერიოდმა სცადა ამ ისტორიის გადაწერა, მაგრამ ამ ფუნდამენტსა და ღირებულებებს ვერაფერი შეცვლის. თავისუფლების წყურვილი უფრო დიდი და ძლიერია, ვიდრე მტერი და ჩვენ აუცილებლად მივაღწევთ მიზანს.
ევროპისთვის მთავარი ღირებულება არის ადამიანი და ამოსავალი წერტილი – ადამიანის პიროვნული თავისუფლება. ევროპა მოგვცემს განვითარების საშუალებას, სტაბილურობას, კანონის უზენაესობას, დაცულობის შეგრძნებასა და თანასწორობას.
დავით ბეშიტაიშვილი, მსახიობი:
ევროპული სამყარო ყველაზე მეტად არის ცივილიზებული და მინიმუმამდე არის დაყვანილი გაიძვერობა, ის დგას პატიოსნებაზე. ევროპა არის იმის საშუალება, რომ დაგვეხმაროს, რათა გავხდეთ უკეთესები, რადგან ამდენი წელია ვუყურებ ხელისუფლებებს და არცერთ მათგანს არ გააჩნია პატიოსნება. ხანდახან მიხუმრია, კარგი იქნებოდა, ნორმალური ქვეყნის გადამდგარი მთავრობები დაგვექირავებინა, იქნებ ასე მაინც მიგვეღწია სამართლიანობისთვის. ევროპის კარი ღიაა, ხელისუფლება კი წინ ეღობება ამას.
ჩვენი საზოგადოება ირჩევს ევროპას, რადგან კარგად ხედავს, რომ ეს არის სამართლიანი სამყარო, სადაც ადამიანი და მისი უფლებებია უმთავრესი, ამის პარალელურად კი ვხედავთ სხვა სამყაროს, სადაც ხალხი ვერ აღწევს თავს გაჭირვებას და პუტინისმაგვარ ჰეგემონებს, და ჰყავთ ისეთი მთავრობა, რომელიც საკუთარი ჯიბის იქით ვერ იხედება. ხალხი ხედავს ამ ორ სამყაროში განსხვავებას და ამიტომაც ირჩევს უკეთესი ცხოვრების შესაძლებლობას.
ფოტო: მაკა მეგრელიძე, ალექსეი სეროვი
პროექტის ავტორი: ნიკა გომართელი
ტექსტი: ნიკა გომართელი, სოფიო მალანია
