#OK! ესკიზი - კულტურული თავშეყრის ადგილი თბილისში

„ესკიზი“ პირველად არ მოხვდა ჟურნალ OK!-ის ობიექტივში, თუმცა ამჯერად ახალი პროექტის − „ესკიზი თბილისის“ შესახებ გიამბობთ, რომელიც 1 სექტემბრიდან წარდგა საზოგადოების წინაშე. სასტუმრო/რესტორანი აქამდეც ცნობილი იყო მისი გამორჩეული დიზაინითა და ინტერიერით, რაც ამ შემთხვევაშიც უცვლელად დარჩა და არცერთ მის სტუმარს არ დატოვებს გულგრილს. ეს არის თანამედროვე კლასიკა ლიტერატურისა და ხელოვნების მოყვარული თბილისური ინტელიგენციის ქცევითი მოდელისა და სახლი/სალონების მოტივებით. ადგილი, სადაც ადამიანები დროს ატარებენ მშვიდ საუბარში, ესთეტიკური გარემოთი ტკბობაში, სიამოვნებას იღებენ ატმოსფეროთი, აგემოვნებენ კარგ ღვინოს და გემრიელ კერძებს. მოკლედ, ბევრი რომ არ გავაგრძელოთ, წაიკითხეთ OK!-ის ინტერვიუ „ესკიზის“ მფლობელ ნუკი თორაძესთან, რომელიც უფრო ვრცლად გვიამბობს ამ და სხვა საინტერესო საკითხების შესახებ.

„ესკიზი“ პირველად არ მოხვდა ჟურნალ OK!-ის ობიექტივში. ამჯერად რა სახის სიახლეებს სთავაზობთ საზოგადოებას?

„ესკიზი თელავი“ ძალიან წარმატებული პროექტი გამოდგა, რის შემდეგაც გადავწყვიტეთ, რომ „ესკიზი თბილისზე“ დაგვეწყო მუშაობა.

გამორჩეულ დიზაინთან და გარემოსთან ერთად, „ესკიზი თბილისში“ სტუმრებს დახვდებათ შიდა რესტორანი, ტერასა და ღვინის სადეგუსტაციო სივრცე. რესტორანს რაც შეეხება, იქნება არა მხოლოდ ქართული, არამედ ევროპული საავტორო კერძებიც, რომლის დაგემოვნებას მხოლოდ ჩვენთან შეძლებთ.

„ესკიზი თბილისის“ რესტორანს სამომავლოდ 80-ნომრიანი დიზაინ-კონცეპტუალური სასტუმროც შეემატება.

როდიდან და სად შევძლებთ „ესკიზის“ ახალ რესტორანში სტუმრობას?

„ესკიზი თბილისის“ რესტორანი 1 სექტემბერს, ისტორიულ უბანში – კოტე მარჯანიშვილის 51 ნომერში გაიხსნა.

როგორია „ესკიზის“ ძირითადი კონცეფცია?

მე-20 საუკუნის დასაწყისში, ამ სახლში, სადაც „ესკიზი თბილისი“ გაიხსნა, ხშირად ეწყობოდა სალონური შეხვედრები, ღვინოსა და ლიტერატურაზე საუბრები. ხშირად იკრიბებოდნენ იმდროინდელი საზოგადო მოღვაწეები, მათ შორის დები იშხნელები, ვასო გოძიაშვილი და ა.შ. სწორედ ეს გახდა კონცეფციის შთაგონება.

„ესკიზი თბილისი“ არის თანამედროვე კლასიკა XIX-XX საუკუნის, ლიტერატურისა და ხელოვნების მოყვარული თბილისური ინტელიგენციის ქცევითი მოდელისა და სახლი/სალონების მოტივებით. ეს არის ახალი საზოგადოებრივი სახლი შიდა ეზოთი, ბაღით, ადგილი, სადაც ადამიანებს დრო გაჰყავთ მშვიდ საუბარში, ესთეტიკური გარემოთი ტკბობაში, სიამოვნებას იღებენ ატმოსფეროთი, აგემოვნებენ კარგ ღვინოს და გემრიელ კერძებს. ეს არის კულტურული თავშეყრის ადგილი.

„ესკიზი“ გამორჩეულია დიზაინითაც. როგორია თბილისის ფილიალი ამ კუთხით?

„ესკიზი თბილისის“ დიზაინზე მსუბუქი გავლენა იქონია მე-19 საუკუნის თბილისმა, იმდროინდელი გარემოს ღირებულებებმა, კულტურამ. „ესკიზი თბილისი“ არის ადგილი შემოქმედებითი, მრავალმხრივი, ხელოვნებისა და ლიტერატურის მოყვარული ადამიანების საურთიერთო სივრცე, სადაც სტუმრები ეძებენ სიმშვიდესა და ურთიერთობას ხმაურის გარეშე, და ეს მის ინტერიერის დიზაინშიც იგრძნობა.

განახორციელეთ გარკვეული სიახლეები, თუ ძირითადი ნიშა კვლავ უცვლელი დარჩა?

როგორც ხედავთ, გარემოს ძალიან დიდ მნიშვნელობას ვანიჭებთ და ამიტომაც „ესკიზი თბილისშიც“ ინტერიერის დიზაინერი − ესმა ხეცურიანი მოვიწვიეთ. როცა ის პირველად აქ შემოვიდა, მაშინვე დაინახა სივრცე, რომელიც შემდეგ შეგვიქმნა.

მისი სიტყვებია, რომ ფასადმა უკარნახა, თუ როგორი უნდა ყოფილიყო ინტერიერი. სივრცე ცარიელი იყო, ესმამ გვითხრა, რომ აქ აუცილებლად იქნებოდა ანფილადური სისტემა და ბუხრები ოთახებს შორის. მან რეალურად დაუბრუნა შენობას მისი ნამდვილი შინაარსი.

როგორია თქვენი მოლოდინი?

გვაქვს მოლოდინი, რომ „ესკიზი თბილისიც“ ისეთივე წარმატებული პროექტი იქნება, როგორც ეს თელავის შემთხვევაში მოხდა. ორივე სასტუმრო გამორჩეულია საკუთარი კონცეფციით, დიზაინითა და ატმოსფეროთი, მაგრამ „ესკიზი თბილისი“ ნამდვილი ძველი თბილისური სულია, რომელიც თბილისურ წარსულში ამოგზაურებს სტუმარს.

გაგვიზიარეთ სამომავლო გეგმები.

2023 წლის გაზაფხულზე „ესკიზი თბილისს“ შეემატება 80-ნომრიანი სასტუმრო, რომლის დიზაინზე ესმა ხეცურიანმა იმუშავა. სასტუმროს ნომრებიც იმავე კონცეფციით მოეწყობა. თბილისის ნომრები განსაკუთრებული სტილისა და ფერების ნაზავი იქნება, და სულმოუთქმელად ველოდებით ამ პროექტის დაწყებას!