როგორ მოვამზადოთ ბავშვი სანამ სტომატოლოგთან მივიყვანთ, რამდენად მნიშვნელოვანია ჯანსაღი კვება კარიესის პროფილაქტიკისთვის და კბილების ჯანმრთელობისთვის? – OK! Doctors-ის კითხვებს პასუხობს ექიმი, თერაპევტ-ქირურგი ამიკო მესარკიშვილი.
რატომ აირჩიეთ ეს პროფესია?
სიმართლე გითხრათ, ბავშვობაში სტომატოლოგობაზე არ ვოცნებობდი და არც ექიმი მყოლია ოჯახში, თუმცა ბავშვობიდან სულ თეთრ ხალათს ვიცვამდი და ექიმობანას ვთამაშობდი. როდესაც სკოლა დავამთავრე და პროფესიის არჩევის წინაშე დავდექი, მაშინ გადავწყვიტე, რომ სტომატოლოგობა მინდოდა. არ ვიცი, რატომ მივიღე ეს გადაწყვეტილება, ყოველთვის მომწონდა ლამაზი ღიმილის მქონე ადამიანები და ალბათ, ამიტომაც.
რა ადგილი უჭირავს თქვენს პროფესიულ საქმიანობას თქვენს ცხოვრებაში?
ჩემს პროფესიას საკმაოდ დიდი ადგილი უჭირავს, რადგან ექიმობა დიდ დროსა და ენერგიას მოითხოვს. პაციენტების მკურნალობასთან ერთად, ამ პროფესიაში მნიშვნელოვანია მუდმივი სწავლა და განვითარება, სხვანაირად ვერ იქნები კონკურენტუნარიანი და პროფესიობნალი, მითუმეტეს ამ დარგში, როდესაც ყოველდღე რაღაც იცვლება.
გარდა ამისა, კლინიკა ,,ბლეიზის’’ ხელმძღვანელიც ვარ, რაც ასევე დიდი პასუხისმგებლობაა ჩემთვის. ყოველთვის ვცდილობ კლინიკაში იყოს ყველა ის სტანდარტი, რასაც თანამედროვე სტომატოლოგია უნდა პასუხობდეს.
რომელ პროცედურაზეა ყველაზე დიდი მოთხოვნა?
რა თქმა უნდა, ლამაზი ღიმილის შექმნის პროცედურაზე. ყველას უნდა ქონდეს ლამაზი ღიმილი, ზოგს ბუნებრივი, ზოგს არაბუნებრივი, მაგრამ ეს მათი არჩევანია. ჩვენი ვალდებულებაა ავუხსნათ და ვურჩიოთ, მისთვის რა უფრო მისაღები იქნება, თუმცა საბოლო არჩევანს აკეთებს პაციენტი.
თანამედროვე სტომატოლოგიაში ლამაზ ღიმილს ექიმი და პაციენტი ერთად ქმნიან, ერთად მონაწილეობენ. ფორმას, ფერს, ზომას პაციენტი თვითონ არჩევს, შემდეგ მზადდება დროებითი კბილები, რათა პაციენტმა შეძლოს დაკვირვება, რამდენად მოსწონს მას მისი სურვილით შერჩეული კბილები. სურვილის შემთხვევაში კი მზადდება მუდმივი კბილები და იქმნება მისთვის სასურველი ღიმილი.
ბავშვთა სტომატოლოგია საკმაოდ რთული განხრაა, როგორ უნდა მოვამზადოთ ბავშვი სანამ სტომატოლოგთან მივიყვანთ?
რთული განხრა, მაშინ ხდება როდესაც 3-4 წლის ასაკში უზიანდებათ ბავშვებს კბილები კარიესით. ამ ასაკში საკმაოდ რთულია ბავშვისთვის იმ პროცედურების ჩატარება, რასაც კბილის დაბჟენა ჰქვია. თავდაპირველად მათ ვუხსნით თამაშით, ვცდილობთ გარემოს მიეჩვიონ, თუმცა მაინც რთულია მთლიანი პროცედურის ჩატარება, რამდენიმე დღე ან კვირა ვუნდებით ერთი კბილის დაბჟენას. სწორედ ამიტომ, პრევენცისთვის, მნიშვნელოვანია, მშობლების ჩართულობა ბავშვის პირის ღრუს ჰიგიენაში – ბავშვი უნდა მივაჩვიოთ სწორ გამოხეხვას დილა-საღამოს. ასევე, არ არის სწორი დამოკიდებულება, როცა ამბობენ, დროებითი კბილები მაინც უნდა მოიცვალოს ბავშვმა და რათ უნდა მკურნალობაო. ესაა ყველაზე დიდი შეცდომა, რაც შეიძლება დაუშვას მშობელმა. სარძევე კბილებს დიდი ყურადღება სჭირდება, რადგან ისინი ამზადებენ ყბებს შემდგომი მუდმივი კბილების ამოჭრისთვის და უმეტესად სარძევე კბილები განსაზღვრავენ, როგორი თანკბილვა ჩამოყალიბდება სამომავლოდ.
მშობლებს ვურჩევ, რომ მაქსიმალური ყურადღება დაუთმონ ბავშვის კბილების ჰიგიენას, პერიოდულად გაიარონ კონსულტაცია ექიმ სტომატოლოგთან, რათა რამე არ გამოეპაროთ და დროულად მიიღონ ექიმისგან რჩევა დარიგება. ამასთანავე, მნიშვნელოვანია დაიწყონ ბავშვის მომზადება სხვადასხვა მეთოდებით, მიაწოდონ ინფორმაცია კბილის მკურნალობის შესახებ, სხვადასხვა გზით, როგორიცაა: იუთუბ ვიდეოები ან სათამაშოები, რათა ბავშვს გაუადვილდეს ექიმთან ვიზიტი და მკურნალობა.
რამდენად მნიშვნელოვანია ჯანსაღი კვება კარიესის პროფილაქტიკისთვის და კბილების ჯანმრთელობისთვის?
რა თქმა უნდა, ჯანსაღი კვება მნიშვნელოვანია არამარტო კბილების ჯანმრთელობისთვის, არამედ ჩვენი მთლიანი ორგანიზმისთვის. რაც შეიძლება ნაკლები შაქრის შემცველი საკვები უნდა მიიღოს ადამიანმა და მნიშვნელოვანია მათი დაყოვნების დრო პირის ღრუში.
ამიკო, თავისუფალ დროს რისი კეთება გიყვართ?
მიყვარს მეგობრებთან ერთად რაიმე აქტივობების დაგეგმვა, მაგალითად: ქალაქ გარეთ გასვლა, კინოში წასვლა და სხვ.
რა გაბედნიერებთ?
მაბედნიერებს, როდესაც შემიძლია სხვა გავხადო ბედნიერი, თუნდაც პაციენტი, რომელსაც ძლიერ ტკივილს უხსნი, მას ძალიან ბედნიერი თვალები აქვს, ეს რაც შეეხება ჩემს პროფესიას. ისე კი ძალიან ბევრი რამ მაბედნიერებს, მაგალითად: ჩემს გარშემო ძალიან ბევრი კეთილი ადამიანი, რომელსაც ვუყვარვარ და მიყვარს.
თქვენი მთავარი მოტივატორი ვინ ან რაა
მოტივატორი რამდენიმე რამ შეიძლება იყოს. ჩემთვის მაგალითად წარმატებილი ადამიანი ძალიან კარგი მოტივატორია, ასევე ოჯახი და მომავალი.
სამომავლო გეგმები
სამომაბლო გეგმები რა თქმა უნდა ჩემს პროფესიას ეხება. მე საკმაოდ კარიერისტი ადამიანი ვარ და მუდამ ვცდილობ პროფესიულ განვითარებას, ახლაც ამ გზას ვადგავარ და მესამე ლიცენზიის მოპოვებას ვაპირებ. მაქვს თერაპიის, ქირურგიის და მალე მექნება ორთოდონტის ლიცენზია, რაც ჩემთვის სიახლეა და ახალი გამოწვევა.
