#OK! დევიდ კომას 2021 წლის შემოდგომა/ზამთრის READY-TO-WEAR კოლექცია

საერთაშორისოდ აღიარებული ქართველი დიზაინერი დევიდ კომა იმ იშვიათ ხელოვანთა რიცხვს მიეკუთვნება, რომელთაც ახასიათებთ ესთეტიკური თვითმყოფადობა, პერფექციონიზმის შეგრძნება და ინდივიდუალური ხასიათი.

დევიდ კომას აქვს უნარი შეინარჩუნოს ხედვა და ყოველ სეზონზე საკმარისი სიახლე შემატოს კოლექციას, რაც უფრო თვალშისაცემს ხდის მის ნამუშევრებს მოდის კონკურენტუნარიან ბაზარზე.

სტრუქტურირებული კოსტიუმები, გამოყვანილი წელი, არქიტექტურული სილუეტები, ელეგანტურობისა და გრაციოზულობის ნაზავი, ეს სწორედ ის დეტალებია, რომლებსაც დევიდ კომას კოლექციების დათვალიერების დროს ვაწყდებით. სწორედ ამიტომ, თავისუფლად შეგვიძლია ვთქვათ, რომ ქართველმა დიზაინერმა საკუთარი საქმიანობით მოდის კოლექტიურ მეხსიერებაში მნიშვნელოვანი ადგილი დაიკავა.

დიზაინერს იზიდავს კონცეფციის სრუყოფილება, გლამური და ბრწყინვალება. კომას კოლექციებში წლების გასვლის შემდეგაც კი კონკრეტული დეტალები უცვლელი რჩება, კომფორტის ახალი ელემენტების შერწყმით და უფრო გამარტივებული მინიმალისტური სილუეტების ხაზგასმით დიზაინერი დახვეწილ და პერფექციონისტულ ნამუშევრებს გვთავაზობს.

დევიდ კომამ რამდენიმე საათის წინ ბრენდის 2021 წლის შემოდგომა/ზამთრის კოლექცია წარადგინა, რომლის პრეზენტაციაშიც ქართველმა მოდელმა ეთო მიგრაულმა მიიღო მონაწილეობა. დიზაინერის უახლეს კოლექციის ინსპირაცია თანამედროვე სამყაროს ტექნოლოგიური განვითარება, კოსმოსის ჯადოსნური სილამაზე და სამეცნიერო ფანტასტიკა გახდა. დევიდ კომას შემოქმედებაზე ზეგავლენა რამდენიმე თვის წინ ლეგენდარული დიზაინერის პიერ კარდენის გარდაცვალებამაც მოახდინა.