სასტუმრო „ბესსარიონ“ ცოტა ხნის წინ გამოჩნდა ქუთაისის ბაზარზე, თუმცა მალევე შეძლო მომხმარებელთა ნდობის მოპოვება. ეს სივრცე როგორც უცხოელ, ასევე ქართველ სტუმრებს სთავაზობს ნამდვილ მოგზაურობას იმერულ კულტურასა და ტრადიციებში, რაც მაქსიმალური კომფორტისა და ხარისხის ფონზე მიმდინარეობს. სასტუმროს საქმიანობის შესახებ დეტალური ინფორმაციისთვის, ჟურნალი OK! დამფუძნებელ ლელი ონიანს გაესაუბრა.
გაგვაცანით სასტუმრო „ბესსარიონი“
სასტუმრო „ბესსარიონი“ 10 თვეა, რაც ფუნქციონირებს. ეს არის საოჯახო ბიზნესი, რომლის მართვაშიც სრულად ვარ ჩართული. რადგან ამ კუთხით საჭირო გამოცდილება არ მქონდა, გავიარე კურსები სასტუმროს მართვასა და მენეჯმენტში. დღესდღეობით კი მე და ჩემი მეუღლე ერთობლივად ვმართავთ ბიზნესს. აგვისტოდან აქტიურად გამოვჩნდით ბაზარზე, ვფიქრობ, ახლები ვართ ამ სფეროში, თუმცა ძალიან ბევრ სტუმარს ვუმასპინძლეთ და გარკვეული გამოცდილებაც დავაგროვეთ.
რა იყო თქვენი მთავარი მიზანი ბიზნესის დაწყებისას?
თავდაპირველად ჩემი მთავარი მიზანი იყო, საკუთარი ადგილი გვეპოვა ამ სფეროში და იმერული სტუმართმასპინძლობის ინდივიდუალური ხაზი გვქონოდა, რათა ამ კუთხის დამახასიათებელი ტრადიციები და სახასიათო გარემო სასტუმროში მოსულ თითოეულ სტუმარს ეგრძნო, განსაკუთრებით იმ ტურისტებს, რომლებიც საქართველოში პირველად იმყოფებიან. გვქონოდა მომხმარებელთან უშუალო ურთიერთობები, ყოველგვარი ჩარჩოების გარეშე და მიხარია, რომ ყველა ეს კომპონენტი სისრულეში მოვიყვანეთ. ამის თქმის უფლებას მაძლევენ კმაყოფილი მომხმარებლები და მათი დადებითი უკუკავშირი, რომელსაც ყოველთვის ვგრძნობთ.
რა მომსახურებას სთავაზობთ საზოგადოებას?
სასტუმრო აერთიანებს 20 ნომერს, რომელიც ერთი, ორი და სამადგილიანი ოთახებისგან შედგება. აბსოლუტურად ყველა ნომერს აქვს აივანი წინა ხედით. სასტუმროს მომსახურებაში შედის კვებაც, რომელსაც ჩვენთან დიდი ყურადღება ექცევა. ასევე უზრუნველვყოფთ სტუმართა დახვედრას, გვაქვს ტრანსფერი და მომხმარებელს ვთავაზობთ სხვადასხვა ტურს გარემოს უკეთ გაცნობის მიზნით. სასტუმროს პირველ სართულზე განთავსებულია ღვინის სივრცე, სადაც სტუმრებს შეუძლიათ როგორც მისი დეგუსტაცია, ასევე შეძენა. აქ წარმოდგენილია მხოლოდ ქართული ალკოჰოლური სასმელი, იმ მიზნით, რომ კიდევ უფრო შევუწყოთ ხელი ქართული ღვინის კულტურის ცნობადობას. სასტუმროს ბოლო სართულზე განთავსებულია ტერასა-რესტორანი, რომლით სარგებლობაც დღის მეორე ნახევარში ნებისმიერ ადამიანს შეუძლია.
როგორია სასტუმროს კონცეფცია?
ამ სივრცის შექმნის იდეა და მთავარი ჩანაფიქრი იყო ის, რომ სასტუმროს ხარისხიანი მომსახურებით მომხმარებელი ჩვენგან კმაყოფილი წასულიყო, ასევე ძალიან მნიშვნელოვანია მათთან მჭიდრო კავშირი, დიალოგის გამართვა, განსხვავებულ აზრთა გაცვლა, რაც პირადად მე დიდ სიამოვნებას მანიჭებს. მიმიღია მათგან რჩევებიც, რაც ძალიან მნიშვნელოვანია წარმატებული ბიზნესისთვის და, რა თქმა უნდა, გასათვალისწინებელიც.
უპირატესობები…
თამამად შემიძლია ვთქვა, რომ ქუთაისში ბუტიკის ტიპის არცერთ სასტუმროს არა აქვს ტერასა. ასევე ვფიქრობ, რომ ამ საქმეში ჩემი სრული ჩართულობა გარკვეულწილად განსაზღვრავს სასტუმროს უპირატესობებსაც, რადგან უკეთ მესმის შიდა პროცესები. როგორც უკვე აღვნიშნე, ის ოჯახური, კომფორტული და თბილი ატმოსფერო, რომელიც სასტუმროში მოსულ ადამიანს ხვდება, ქმნის ურთიერთობებს, რაც უპირობოდ განაპირობებს კმაყოფილ მომხმარებელს.
სამომავლო გეგმებიც გაგვიზიარეთ…
გვინდა, რომ ჩვენი ბიზნესი ბაზარზე მუდმივად ვითარდებოდეს. ამ მიზნით ვგეგმავთ, რომ სამომავლოდ სასტუმრო გასცდეს ქუთაისის ფარგლებს და ჩვენი ფილიალები ხელმისაწვდომი საქართველოს მასშტაბითაც გახდეს. ასევე ვაპირებთ ვაწარმოოთ ღვინო, რომელსაც დავბრენდავთ იმავე სახელწოდებით – „ბესსარიონ“ და მომხმარებელს მრავალფეროვან სიახლეებს შევთავაზებთ.
ტექსტი: მაკუნა შავგულიძე
ფოტო: ნინი გორდაძე
