ყველასათვის კარგად ცნობილია, რომ აჭარა საზღვაო ტურიზმითაა გამორჩეული, თუმცა რეგიონს აქვს პოტენციალი, რომ ღვინის ტურიზმი კიდევ უფრო განვითარდეს. „ბერიძეების საოჯახო ღვინის მარნის“ შექმნის მიზანიც ეს იყო – ღვინის ტურიზმის განვითარების ხელშეწყობა, აჭარის უნიკალურობისა და სტუმარმასპინძლობის წარმოჩენა.
„ბერიძეების მარანი“ უკვე რამდენიმე წელია წარმატებით პოზიციონირებს ბაზარზე. ის აჭარაში, ბათუმიდან 1კილომერტში, მახინჯაურში მდებარეობს. გარდა გამორჩეული ღვინისა, აქ მოსულ სტუმრებს თვალწარმტაცი ბუნება, მთისა და ზღვის სურნელი ათრობს.
როგორც დამფუძნებელი და მეღვინე, ჯიმშერ ბერიძე გვიყვება – ღვინის მარანი აღჭურვილია როგორც ტრადიციული, ასევე თანამედროვე ტიპის საღვინე დანადგარებით.
„ვწურავთ დასავლური წარმოშობის ყურძნის ჯიშებისგან – ჩხავერისა და ცოლიკოურისგან ქვევრის ნატურალურ ღვინოებს. ღვინის სახეობები მომხმარებლისთვის ჯ.ვაინით არის ცნობილი“.
ასევე, აქ ღვინოს წურავენ საქართველოს მიკროზონებში მოწეული ყურძნისგან, როგორც აღმოსავლურ, ასევე დასავლურ ჯიშებს: უსახელოური, ალექსანდროული, მუსკატი, ჩხავერი, ცოლიკოური, ალადასტური, საფერავი, ქინძმარაული და სხვა.
ბერიძეების მარანსა და სარესტორნო სივრცეში გასტრონომიული ტურები იმართება, რაც მოიცავს აჭარის კულინარიული კერძების მასტერკლასებს, ასევე აქ შეძლებთ ოჯახთან ერთად დროის სასიამოვნოდ გატარებას, სადაც მშვიდ და საინტერესო სივრცეში გაეცნობით ქართულ ღვინოს, კერძებს, ადათ-წესებსა და ფოლკლორს.
აღსანიშნავია, რომ „ბერიძეების მარნის“ სამიზნე აუდიტორიას უცხო ქვეყნის ტურისტები წარმოადგენენ.
„თითქმის ყოველდღიურად ვმასპინძლობთ ქართველ ებრაელებს, რომლებსაც ოჯახის წევრები, შვილები და შვილიშვილები მოჰყავთ, რათა გაიხსენონ და ხელახლა შეიგრძნონ ქართული გემო და ტრადიცია. ჩვენი ღვინის მომხმარებლები არიან როგორც ადგილობრივები, ისე უცხოელი ვიზიტორები, რომლებიც ევროპის ქვეყნებიდან, ბალტისპირეთიდან, შუა აზიიდან ჩამოდიან და უმეტესობა წინასწარ ჯავშნის „ბერიძეების ღვინის მარანში“ ვიზიტს“.
როგორც უკვე აღვნიშნეთ, „ბერიძეების მარნის“ უნიკალურობა ღვინოში, ქართული ხასიათის სხვადასხვა მიმართულებით გამოვლენასა და მომხმარებლისგან მიღებულ შეფასებებში ვლინდება. ბრენდის მიზანია, ეს უნიკალურობა უფრო მეტად გაამრავალფეროვნოს. გარდა ამისა, დღის წესრიგშია წარმოების გაფართოება.
„რადგანაც წლიურად წარმოებული დაახლოებით 25000 ბოთლი ღვინის რაოდენობა საკმარისი არაა, ამიტომაც ვგეგმავთ როგორც რაოდენობის ზრდას, ასევე ჩვენი აგროტურისტული ობიექტის გაფართოებას, ხის კოტეჯების განთავსებას, რათა ადგილზე მოსულ სტუმარს არამარტო ღვინო და გასტრონომიული ტურიზმი შევთავაზოთ, არამედ განთავსებისა და სოფლად განტვირთვის სერვისიც“.
