Accountant 2- ის ვარსკვლავმა, 52 წლის მსახიობმა, რეჟისორმა და პროდიუსერმა ბენ აფლეკმა სამთვიანი დუმილი დაარღვია და ჯენიფერ ლოპესთან განშორების მიზეზებზე პოპულარულ გამოცემა GQ-სთან საჯაროდ პირველად ალაპარაკდა.
სენსაციურ ინტერვიუსთან ერთად გამოცემა გასაოცარი ფოტოსესიიდან მსახიობის შთამბეჭდავ ფოტოებსაც გვიზიარებს.
“ჯენიფერთან განქორწინება ყველასთვის ძალიან მოულოდნელი და შემაშფოთებელი იყო.ხშირი ტენდენციაა, რომ წყვილის დაშორების შემდეგ ეძებენ ამის რაიმე გამომწვევ მიზეზს და სურთ, რომ ეს კონკრეტულ ფაქტს მიაწერონ, თუმცა აქ არ ყოფილა არანაირი სკანდალი, არც საპნის ოპერა ან ინტრიგა. გეტყვით, რომ სიმართლე ისეთი ბანალური და უინტერესოა, რომ ხალხი ალბათ არც კი დაიჯერებს. ადამიანებს ზოგჯერ ერთსა და იმავე საკითხზე ერთმანეთისგან განსხვავებული მოსაზრება აქვს. ჩვენი დაშორების კონკრეტულ მიზეზს რაც შეეხება, ამაზე საუბარი საკმაოდ უხერხულია, თუმცა ყველაფერმა ზედმეტი დრამებისა და სკანდალების გარეშე ჩაიარა”.
52 წლის მსახიობმა, რომელიც ჯენიფერ გარნერთან ერთად სამ შვილს ზრდის – 19 წლის ვაიოლეტს, 16 წლის სერაფინას და 13 წლის სამუელს, – განმარტა, თუ რა კონტექსტი ჰქონდა 2024 წელს გამოსული დოკუმენტური ფილმიდან The Greatest Love Story Never Told გავრცელებულ ვიდეოს, სადაც მან და ჯეილომ პოპულარობის მიმართ თავიანთი განსხვავებული ხედვები წარმოადგინეს. ინტერვიუში ჟურნალისტი ბენს კითხვას უსვამს იმ სცენაზე, სადაც ლოპესი აღნიშნავს, რომ ადამიანებს აქვთ თავიანთი პირადი ცხოვრება, მაგრამ როგორც არტისტებს საზოგადოებაში საკმაოდ მნიშვნელოვანი ადგილი უჭირავთ. ბენი კი ამბობს: „არ შეიძლება დაქორწინდე გემის კაპიტანზე და შემდეგ თქვა, რომ წყალი არ გიყვარს“ – სწორედ ამის გამო, ერთმანეთისაგან განსხვავებული მოსაზრებების გამჟღავნება ბევრისათვის წყვილის განქორწინების ერთ-ერთ მნიშვნელოვან მიზეზად იქცა, თუმცა, მსახიობმა თავისი ფრაზა GQ-სთან საუბრისას ასე განმარტა-
„როგორც ყველა ურთიერთობაში, ჩვენც ყოველთვის ერთნაირად არ ვუყურებდით ამ საკითხებს.“
ბენი ადასტურებს, რომ მათი არაერთ საკითხთან დაკავშირებით ჰქონდათ განსხვავებული ხედვა, თუმცა ეს დაშორების მთავარი მიზეზი არ ყოფილა.
„როცა ურთიერთობაში შედიხარ, უნდა აღიარო, რომ თავიდანვე იცოდი, რასთან გქონდა საქმე“ – თქვა მან.
„ვფიქრობ მნიშვნელოვანია აღვნიშნოთ, რომ ეს არ იყო მთავარი პრობლემა, რამაც ჩვენს ურთიერთობაში ბზარი გააჩინა. შეუძლებელია ამ დოკუმენტური ფილმის უყურო და შემდეგ თქვა – “ახლა გავიგე, რა პრობლემები ჰქონდათ მათ.’“
აღნიშნულ ფილმთან დაკავშირებით ბენი ამბობს იმასაც, რომ მასში მონაწილეობა მისთვის საინტერესო გამოწვევა იყო და რადგან ეს ნაბიჯი გადადგა, მაქსიმალურად შეეცადა ყოფილიყო გულწრფელი. ასევე, მან ისიც თქვა, რომ მას უყვარს და გულშემატკივრობს ლოპესს და სურს ხალხმა ეს ნახოს.
მსახიობმა ინტერვიუში თავისი ყოფილი მეუღლე ჯენიფრ გარნერიც ახსენა და თქვა, რომ ის ძალიან იღბლიანია, რადგან მას ჰყავს შესანიშნავი ადამიანი, რომელიც არის მისი შვილების დედა და ამავდროულად, არაჩვეულებრივი პარტნიორი, რომელთან ერთად მუშაობაც მისთვის სასიამოვნოა.
აფლეკი და ლოპესი ერთმანეთს რომანტიკული კომედიის “Gigli”-ზე მუშაობისას შეხვდნენ და 2002 წელს დაინიშნნენ, მაგრამ 2003 წელს ქორწილი გააუქმეს, მიზეზად გადამეტებული მედიის ყურადღება დაასახელეს. ამის შემდეგ მათ სხვა ადამიანებთან ჰქონდათ ურთიერთობა: ლოპესი 2004 წელს მარკ ენტონიზე დაქორწინდა, ხოლო აფლეკი 2005 წელს ჯენიფერ გარნერზე. ჯეილო 2019 წელს ალექს როდრიგესზეც იყო დანიშნული.
თითქმის ორი ათეული წლის შემდეგ, აფლეკმა და ლოპესმა 2021 წელს ურთიერთობა განაახლეს და მომდევნო წელს იქორწინეს. თუმცა, 2024 წელს “Jenny from the Block”-ის შემსრულებელმა აფლეკთან განქორწინებაზე განაცხადი შეიტანა ლოს-ანჯელესის უზენაეს სასამართლოში. დაშორების თარიღად 26 აპრილი იქნა მითითებული, ხოლო განქორწინების პროცესი ამ წლის იანვარში დასრულდა.
გარდა ჯენიფერ ლოპესთან ურთიერთობის განხილვისა, ბენ აფლეკი ინტერვიუში საუბრობს თავის პროდიუსერულ კომპანია Artists Equity-ზე რომლისთვისაც ბევრს მუშაობს და მასზე დიდ იმედებს ამყარებს. ასევე, ინტერვიუში მსახიობმა განსაკუთრებით გაუსვა ხაზი იმ ფაქტს, რომ მისი ცხოვრება ხშირად არასწორად აღიქმება ტაბლოიდების გავლენით და უმეტესწილად, მასზე ცრუ ინფორმაციები ვრცელდება. ამის მიზეზი, მისი აზრით არის ის, რომ არასოდეს არ ერიდება პაპარაცებთან გამოჩენას.
მსახიობმა GQ-სთან ინტერვიუში თავის კარიერაზეც ისაუბრა და კითხვაზე “თვლით, რომ თქვენი თაობის უდიდესი რეჟისორების მხრიდან გარკვეულწილად ყურადღების მიღმა დარჩით?” ის პასუხობს: “არა. შევამჩნიე, რომ მსახიობებს განსხვავებული მიდგომები აქვთ. თუ ვინმე თვის სასურველ როლს ვერ მიიღებს, ამას აღიქვამენ ისე, რომ თითქოს ეს მათ კარიერაში გზას უღობავს. მე კი ვფიქრობ, რომ ადამიანი თავად ქმნის საკუთარ კარიერას. არასოდეს ვზივარ და არ ვფიქრობ: “რატომ ქირაობს მარტი ლეოს? ეს მე უნდა ვიყო” – გულწრფელად, ასე არ ვფიქრობ. თუ რაიმეზე უნდა ვიფიქრო და ვინერვიულო, ეს უფრო ის იქნება, რომ საკუთარ თავს, პირველ რიგში რეჟისორად აღვიქვამ და შესაბამისად წარმოვაჩინო ის. თუ მკითხავდნენ, რომელი პროფესიით მინდა რომ მიცნონ, მე სწორედ ამას ვეტყოდი. მაგრამ, ასევე ვიტყვი, რომ არ მაქვს განცდა ვინმემ რაიმე წამართვა ან გზა გადამიღობა, ამიტომ თავს ძალიან იღბლიანად ვგრძნობ.”
ცნობისთვის, აფლეკი პირველად ფართოდ გახდა ცნობილი 1997 წლის Good Will Hunting-ით, რომელშიც მან ითამაშა თავის მეგობართან მეტ დეიმონთან ერთად. მსახიობი უკვე 30 წელია, რაც უწყვეტად ყურადღების ცენტრშია, არის 2 ოსკარის მფლობელი და კვლავ აქტიურად განაგრძობს კინოინდუსტრიაში მუშაობას.
