ამერიკელი მოდელი, ბელა ჰადიდი, სოციალურ ქსელში 17 სექტემბერს, საავადმყოფოს საწოლში გადაღებულ ფოტოებს აქვეყნებს.
ბელა წერს, რომ ნიუ-იორკში, მოდის კვირეულზე დასწრება ავადმყოფობის გამო ვერ შეძლო და იძულებულია, საავადმყოფოში იყოს და ჯანმრთელობაზე იზრუნოს.
სურათებზე ბელას ჟანგბადის ნიღაბი უკეთია და სავარაუდოდ, გადასხმას იკეთებს.
„ბოდიში, ყოველთვის ასე უეცრად ვიკარგები. მე თქვენ მიყვარხართ, მეგობრებო.“ — დაწერა ბელამ Instagram-ზე.
მოდელის დედამ, იოლანდა ჰადიდმა, შვილს კეთილი სურვილები გაუზიარა და ბელას ბრძოლაზე ლაიმის დაავადებასთან მიანიშნა-„ლაიმის დაავადებასთან მებრძოლი“ – დაწერა ქალმა და კომენტარს წითელი გულის ემოცია დაურთო.
ბელას ავადმყოფობას მისი და – ჯიჯიც გამოეხმაურა.
„მე შენ მიყვარხარ! იმედია მალე იგრძნობ თავს ისევე ძლიერად და კარგად, როგორც ამას იმსახურებ!!!!!!“- დაწერა ჯიჯი ჰადიდმა.
26 წლის მოდელს დაავადება, რომელიც ტკიპის ნაკბენით იწყება და შეიძლება ქრონიკულ მდგომარეობაში გადაიზარდოს, 2012 წელს დაუდგინეს. იგივე დიაგნოზი ექიმებმა მის დედასა და ძმასაც დაუსვეს. მას შემდეგ ბელამ არაერთხელ საჯაროდ ისაუბრა იმაზე, როგორ იმოქმედა ლაიმის დაავადებამ მის ცხოვრებაზე.
„პატარა მე, რომელიც ვიტანჯებოდი, ძალიან ვიამაყებდი ჩემი ზრდასრული თავით, რომ არ დავნებდი“, – დაწერა მან Instagram-ზე 2023 წელს და დასძინა, რომ 100 დღეზე მეტი ხნის განმავლობაში მკურნალობას გადიოდა.
„სანამ ვცდილობდი, რომ ჩემს ოჯახი და იმ ადამიანებს, ვინც მხარს მიჭერდნენ, ჩემით ეამაყათ, ცხოვრება დროთა განმავლობაში გაუარესდა, ჩემზე ამან ისე იმოქმედა, რომ ახსნა არ შემიძლია. იყო ასეთი სევდიანი და ავადმყოფი, როცა გარშემო ამდენი შესაძლებლობა და სიყვარულია, ალბათ ყველაზე გაუგებარი რამ იყო, რაც კი ოდესმე გამომიცდია“ – აღიარა მოდელმა.
„სამყარო სხვადასხვანაირად არის მოწყობილი: ზოგჯერ ლამაზია, ზოგჯერ მტკივნეული, მაგრამ თუ გიჭირს, ოდესმე ყველაფერი გამოსწორდება. უნდა გაძლიერდე, შენი გზის და არჩევანის ირწმუნო და ღრუბლები დაიწყებენ გაფანტვას“ – აღნიშნა ბელამ.
“ხშირად ჩემთვის შხაპის მიღებაც კი რთულია. უნდა ვთქვა, რომ ყოველდღე ვბანაობ, მაგრამ ხანდახან, შხაპის მიღება და საუზმის მომზადება თუ შევძელი, ამას მიღწევად აღვიქვამ.” – აღაიარა ერთ-ერთ ინტერვიუში მოდელმა.
ცნობისთვის, ლაიმის დაავადება გამოწვეულია ბაქტერია Borrelia burgdorferi-ით, რომელიც ადამიანებს გადაეცემათ ტკიპებით.
ადამიანების უმეტესობა ინფიცირდება ღია ცის ქვეშ, ტყიან ადგილებში, სადაც დაავადება საკმაოდ ხშირია.
ჩვეულებრივ, კბენის ადგილას ჩნდება დიდი ზომის, წითელი ლაქა, რომელიც თანდათანობით იმატებს ზომაში და ხშირად გარშემორტყმულია რამდენიმე წითელი რგოლით.
თუ დროულად არ იმკურნალეს, დაავადებამ შესაძლოა გამოიწვიოს ცხელება, კუნთების ტკივილი, სახსრების შეშუპება და საბოლოოდ, ტვინისა და ნერვების ფუნქციების დარღვევასთან დაკავშირებული პრობლემები.
