„OK! ბათუმის“ უკვე მეორე ნომერს ჩავუდექი სათავეში. ძალიან აზარტული და საპასუხისმგებლოა ჟურნალის კეთება.
ბათუმი ის ადგილია, რომლის ყველა კუთხე ჩემია, ყველას ისტორია ჩემს ცხოვრებასთანაა დაკავშირებული და მარტივად, ჩემი სახლია. ბათუმზე საუბარი დაუსრულებლად შემიძლია მეც და ყველა ბათუმელს. ის სუნი და ხასიათი, რაც ჩვენს ქალაქს აქვს, არსად მეორდება, არც ჩვენნაირად ადუღებს ყავას ვინმე.
აჭარა ფერადია, წლის ყველა სეზონზე. მიხარია, რომ უკვე არააჭარლებმაც დააფასეს და შეიყვარეს აჭარული მთა და ბარი.
აჭარული სიმღერა, ცეკვა, სამზარეულო – ასეთ გამოცდილებას ცოტა ადგილას თუ მიიღებთ.
აჭარული კულტურა დიდი ხანია საკუთარ სათქმელს ამბობს. აჭარული ნაქარგობა, ორნამენტები – ეს ცალკე ისტორიაა.
წელსაც ვეცადეთ წარმატებული და საინტერესო ადამიანები გაგვეცნო თქვენთვის, ვინც იცნობს – ხელახლა შეგვეხვედრებინა. კიდევ ერთხელ მადლობა ამ შესაძლებლობისთვის.
სიყვარულით, „OK! ბათუმის“ რედაქტორი
თაკო მექვაბიძე
