ბუნების არაჩვეულებრივი ქმნილებები − ყვავილები, მუდმივად გვაოცებენ მრავალფეროვან ფერთა ჩრდილებით, გვიმაღლებენ განწყობას და გვეხმარებიან აზრებისა და ემოციების გამოხატვაში. წარმოუდგენელია ნებისმიერი მნიშვნელოვანი დღესასწაული თუ თარიღი ამ უმშვენიერესი მცენარეების გარეშე, რომლებიც კიდევ უფრო ლამაზსა და გასაოცარს ხდიან თითოეულ ჩვენთვის დასამახსოვრებელ მომენტს. ჟურნალი OK! გაგაცნობთ ყვავილების ქართულ ბრენდ AMBORI-ს, რომელიც ნინო ჯანელიძემ, ლიკა ბუტიკაშვილმა და სალომე ლაფერაძემ დააფუძნეს და საზოგადოებას ულამაზესი თაიგულების მრავალფეროვან არჩევანს სთავაზობენ.
ლიკა ბუტიკაშვილი – დირექტორი
სალომე ლაფერაძე – დიზაინერი
ნინო ჯანელიძე – დამფუძნებელი
უპირველესად, გაგვაცანით კომპანია. რამდენი ხანია, რაც AMBORI გაიხსნა?
(ლიკა ბუტიკაშვილი): AMBORI დაახლოებით 6 თვეა, რაც ქართულ ბაზარზე ოპერირებს. ზაფხულში მხოლოდ ონლაინშეკვეთებზე ვმუშაობდით, სექტემბრიდან გაიხსნა მაღაზიაც, რომელიც მდებარეობს დავით გამრეკელის #3-ში. ვცდილობთ სასიამოვნო გარემო და საუკეთესო მომსახურება შევთავაზოთ ჩვენს მომხმარებლებს. ადამიანებთან უშუალო კონტაქტს თავისი ხიბლი აქვს, რაც ჩვენთვის განსაკუთრებით სასიამოვნო პროცესია. თითოეულ ჩვენს თაიგულში და კომპოზიციაში გვსურს ხასიათი და ემოცია იგრძნობოდეს.
რატომ AMBORI? მოგვიყევით ასევე ლოგოზე.
(ლიკა ბუტიკაშვილი): „ამბორი“ ხომ პატივისცემასა და სიყვარულს გამოხატავს. ჩვენთვის კი შინაარსი ძალიან მნიშვნელოვანია. გვსურს ემოციური კავშირი დავამყაროთ მომხმარებლებთან, სწორედ ამიტომ შევარჩიეთ ეს სახელწოდება.
აქვე არ შემიძლია მოკლედ არ გითხრათ ჩვენი ლოგოს შესახებ, რომელზეც დიზაინერმა ანა წერეთელმა იმუშავა. მან ზუსტად გაიგო ჩვენი სათქმელი. გვსურს ახალი სიტყვა ვთქვათ ამ სფეროში, თამამი და ინოვაციური იდეებით, ისეთი ლოგოს ქვეშ, რომელზეც ჩვენი სახელი ძველი ქართული დამწერლობით გამოვსახეთ. მხატვრული ხერხია − აზრი ქარაგმულად გამოვხატეთ. მოგეხსენებათ, ქართველებს მდიდარი კულტურული მემკვიდრეობა გვაქვს არაერთი მიმართულებით, მათ შორის ფლორისტიკაში, ამისთვისაც გვინდოდა ხაზი გაგვესვა − გვახსოვდეს, საიდან მოვდივართ.
როგორ დაიბადა იდეა?
(სალომე ლაფერაძე): ინსპირაცია იყო ორი მეგობრის ისტორია (უცხოურ ბაზარზე), რომლებმაც ჩამოაყალიბეს საკმაოდ ტრენდული და განსხვავებული ბრენდი. ასევე, ფლორისტიკისა და ხელოვნების სფეროს გაერთიანების უსაზღვრო სურვილმა იმოქმედა.
რაც მთავარია, მინდა აღვნიშნო, რომ ჩვენ არ ვყიდით ყვავილს, არამედ ვქმნით განწყობას, რომელიც მოაქვს ინდივიდუალურად ყველა ყვავილსა თუ მცენარეს, თავისი ფერით, არომატითა და ხასიათით.
რას სთავაზობთ საზოგადოებას?
(ლიკა ბუტიკაშვილი): სრულ მომსახურებას ფლორისტიკური დიზაინის ფარგლებში. თაიგულებსა და კომპოზიციებს − როგორც ცოცხალი, ასევე გამომშრალი ყვავილებით. ქორწილისა და წვეულებების დიზაინს. მოვემსახურებით სასტუმროებს, რესტორნებსა და ბიზნესცენტრებს, რომელთაც სურვილი აქვთ თავისი სივრცე ყოველდღიურობაში გახადონ ესთეტიკური და სასიამოვნო. კომპანიებთან გვაქვს სხვადასხვა ტიპის კორპორაციული მომსახურების შეთავაზება.
გვიამბეთ მცენარეების სახეობებზე.
(სალომე ლაფერაძე): ყვავილიანი მცენარეები თითქმის 240 ათას სახეობას მოიცავს. დღესდღეობით საქართველოში იმპორტირებული და ადგილობრივი მცენარისა თუ ყვავილის მოძიება არის შესაძლებელი, თუმცა იმპორტირებული ყვავილის მხრივ, სამწუხაროდ, არცთუ დიდი არჩევანია ხელმისაწვდომი. ჩვენ ვცდილობთ გამოვიყენოთ შერეული ტექნიკა. ვიყენებთ როგორც იმპორტირებულ, ეგზოტიკურ სახეობებს, ასევე ადგილობრივ მცენარეებს. გარდა ამისა, ვიყენებთ გამომშრალი ყვავილის ბევრ სახეობას.
რა მიგაჩნიათ კომპანიის ნიშად და უპირატესობად?
(სალომე ლაფერაძე): „ყვავილი არის ყოველი ემოცია, ყოველი აზრი, ყველაფერი, რასაც ფიქრობ ან გრძნობ…“ როგორც უკვე აღვნიშნე, ყველა მცენარესა თუ ყვავილს აქვს თავისი დამახასიათებელი ფერი, ფაქტურა და მნიშვნელობა. თავდაპირველი იდეა იყო მათი ამ სიმბოლიკით გამოყენება ჩვენს ნამუშევრებში. შინაარსი, ემოცია, შემოქმედებითი მიდგომა და ინდივიდუალიზმი − ეს არის ჩვენი კომპანიის ხელწერა. ჩვენს ნიშად და უპირატესობადაც ეს მიგვაჩნია, რაც ყველა საავტორო ნამუშევარში იგრძნობა.
ბოლოს, სამომავლო გეგმები გაგვიზიარეთ.
(ლიკა ბუტიკაშვილი): სამომავლო გეგმებს რაც შეეხება, პირველ ეტაპზე აქტიურად ვმუშაობთ ცნობადობის გაზრდის მიმართულებით. გვსურს მოვიპოვოთ მომხმარებლების ნდობა. გვინდა მოგვეცეს საშუალება განვახორციელოთ ყველა ჩვენი ინოვაციური იდეა დიზაინის მიმართულებით. რის შემდეგაც, გეგმაში გვაქვს გავაკეთოთ ფლორისტიკური დიზაინის კურსები. მოთხოვნა და დაინტერესება საკმაოდ მაღალია. გვსურს სფეროს განვითარებაში ჩვენი წვლილი შევიტანოთ. ვფიქრობ, მეტი პროფესიონალის არსებობა ხელს შეუწყობს ბაზარზე ჯანსაღ კონკურენციას.
FB: ambori
Insta: ambori_official
სამუშაო საათები: ყოველდღე, 11:00-21:00
TEL: 577 68 87 63
Mail: Amboriart@gmail.com
მის: დავით გამრეკელის ქ. #3
ტექსტი: ციაკო ღამბაშიძე
ფოტო: ალექსეი სეროვი
