ჰოლივუდი ოსკაროსანი მსახიობის, დაიან კიტონის გარდაცვალების ცნობამ შეძრა. ჟურნალი People მიერ გავრცელებული ინფორმაციის თანახმად, 79 წლის მსახიობი კალიფორნიაში გარდაიცვალა, თუმცა სიკვდილის გარემოებები ჯერჯერობით უცნობია.
დიან კიტონი 1946 წლის 5 იანვარს, ლოს-ანჯელესში, დაიან ჰოლის სახელით დაიბადა. სკოლის დამთავრების შემდეგ სწავლა თეატრალურ კოლეჯში გააგრძელა, თუმცა მალე სწავლა მიატოვა და პრაქტიკული გამოცდილების მიღება გადაწყვიტა. ასე აღმოჩნდა ნიუ-იორკში, სადაც თავს მანჰეტენზე, მცირე შემოსავლებით ირჩენდა.
როგორც თავად კიტონი, მოგვიანებით ამბობდა, მისი კარიერა 1968 წელს დაიწყო, როდესაც ბროდვეის ცნობილ როკ-ოპერაში „თმა“ (Hair) როლი მიიღო. დებიუტის შემდეგ დაიანმა ვუდი ალენის პიესაში ლინდა კრისტის როლი მიიღო. პირველი ფილმის შემდეგ ალენმა დაიანი კიდევ რამდენიმე პიესაში ათამაშა და მალე თავის მუზადაც აღიარა.
1970 წელს კიტონის კინოში დებიუტი შედგა. რამდენიმე მცირე როლის შემდეგ ის ფრენსის ფორდ კოპოლამ შენიშნა და „ნათლიას“ გადაღებებზე მიიწვია, სადაც მისი პარტნიორი ალ პაჩინო გახდა.
ორი წლის შემდეგ ეკრანებზე ფილმის მეორე ნაწილი გამოვიდა, სადაც ახალგაზრდა რობერტ დე ნირომ ვიტო კორლეონე ითამაშა. მოგვიანებით კიტონმა ამ ლეგენდარული ტრილოგიის მესამე ნაწილშიც მიიღო მონაწილეობა.
1978 წელს დიანმა მთავარი როლი შეასრულა ფილმში „ენი ჰოლი“, რომელმაც „ოსკარი“ და „ოქროს გლობუსი“ მოუტანა. ამ პერსონაჟის შესაქმნელად მსახიობი მარლენ დიტრიხისა და კათრინ ჰეპბერნის სტილის ტანსაცმელს საკუთარ კარადაში და მეორადი ტანსაცმლის მაღაზიებში არჩევდა.
1982 წელს, უორენ ბიტის ფილმში „წითლები“ კიტონმა მთავარი გმირის საყვარელი ქალის ლუიზა ბრაიანტის როლი შეასრულა. ამ როლისთვის ის კვლავ „ოსკარის“ ნომინინანტი გახდა.
ერთ-ერთი ყველაზე პოპულარული ფილმი, რომელშიც დიან კიტონი მონაწილეობდა, არის „სიყვარული წესების გარეშე“, სადაც მას პარტნიორობას ჯეკ ნიკოლსონი და კიანუ რივზი უწევდნენ. სხვათა შორის, მაშინ დაიანს ასაკით უმცროს რივზთან რომანი მიაწერეს და არა მხოლოდ მასთან..
დაიან კიტონის მართლაც ბევრი რომანი ჰქონდა, რომლებზეც ჰოლივუდში ლეგენდებს ყვებოდნენ. მას ვუდი ალენის მუზად მოიხსენიებდნენ და ამბობდნენ, რომ რეჟისორს და მსახიობს ხანგრძლივი სასიყვარულო ურთიერთობა ჰქონდათ.
„უმეტესობა ფიქრობს, რომ „ენი ჰოლი“ ჩვენი – ჩემი და ვუდის — ურთიერთობის შესახებაა. მით უმეტეს, რომ ჩემი ნამდვილი გვარი ჰოლია. დიახ, ჩვენს შორის მართლაც იყო რომანტიკული კავშირი, ყოველ შემთხვევაში, ჩემი მხრიდან. ოდესღაც მინდოდა მომღერალი გავმხდარიყავი, მაგრამ თავდაჯერება არ მყოფნიდა და ხშირად ვიბნეოდი. თუმცა ამას 35 წლის შემდეგ რა მნიშვნელობა აქვს? მთავარია, რომ ვუდს შესანიშნავი ფილმი გამოუვიდა. „ენი ჰოლი“ მისი პირველი ფილმია სიყვარულზე. ყველა სცენა სიყვარულზე იყო აგებული. მთავარი იდეა კი სევდიანი, მაგრამ მართალია – ოდესმე სიყვარული მთავრდება… ვუდი ალენმა ძალიან გარისკა, როცა ასეთი სასაცილო ფილმი სევდიან ნოტაზე დაასრულა,“ – ამბობდა კიტონი.
2014 წელს, როდესაც ვუდი ალენი სექსუალურ შევიწროებაში დაადანაშაულეს, დაიან კიტონმა რეჟისორს საჯაროდ მხარი დაუჭირა.
„ვუდი ჩემი მეგობარია და მე მისი მჯერა. ეს ჩემთვის ყველაზე მთავარია. ვღელავ ამ ისტორიაშია ჩართული ყველა ადამიანის გამო და იმედი მაქვს, რომ ყველაფერი მშვიდობიანად დასრულდება,“ – დაწერა სოციალურ ქსელში მსახიობმა.
„ნათლიას“ გადაღებების დროს, დაიანსა და ალ პაჩინოს შორის მგზნებარე რომანი გაჩაღდა, რომელიც დაახლოებით ორი წელი გაგრძელდა, თუმცა სერიოზულ ურთიერთობად არ ქცეულა.
„ალით პირველივე დღიდან მოვიხიბლე. როცა ერთად ვიყავით, მასზე ჭკუა მეკარგებოდა. შარმიანი, მხიარული, ენაწყლიანი – ის საოცარი იყო!“ — იხსენებდა კიტონი 2017 წელს.
დაშორების მიუხედავად, მათ მეგობრული ურთიერთობის შენარჩუნება შეძლეს. მოგვიანებით, მემუარებში კიტონმა აღიარა, რომ ალ პაჩინოსგან ხელის თხოვნას ელოდა, მაგრამ ის არ ჩქარობდა. ბოლოს თავად დიანმა ულტიმატუმი წამოუყენა.
„ამაზე ბევრს ვმუშაობდი, მაგრამ საბოლოოდ ისე არ გამოვიდა, როგორც მინდოდა,“ – აღიარა დაიანმა People-თან ინტერვიუში.
დაიან კიტონის კიდევ ერთი გახმაურებული რომანი უორენ ბიტს უკავშირდებოდა.
„არ მგონია, რომ ჩემი ქორწინება კარგი იდეა იქნებოდა და მიხარია, რომ ასე არ მოხდა. ვფიქრობ, რომ ეს მათაც უხარიათ“ – ხუმრობდა მსახიობი.
საბოლოოდ, ამ რომანებიდან არცერთი ქორწინებით არ დასრულდა. როგორც დაიანი ამბობდა, მამაკაცები მისი მოსმენის უნარს ძალიან აფასებდნენ, მაგრამ ეს მალე ბეზრდებოდათ. გარდა ამისა, მსახიობი აღიარებდა, რომ პარტნიორების მიმართ ძალიან მომთხოვნი იყო.
„ჩემი ანგარიშით, პაემნებზე დაახლოებით 35 წელია არ ვყოფილვარ,“ – წერდა დაიანი 2019 წელს.
უქმრობას მსახიობისთვის ხელი არ შეუშლია, რომ დედა გამხდარიყო – 1996 წელს მან გოგონა, დექსტერი იშვილა, ხოლო 2001 წელს ბიჭი – დიუკი.
რამდენიმე წლის წინ დიან კიტონი საჯარო სივრციდან გაქრა. თავდაპირველად ის ამას „შემოქმედებით შვებულებას“ უწოდებდა, თუმცა 2015 წელს გაირკვა, რომ მსახიობი მძიმე დაავადებას ებრძოდა – მას კანის კიბო აღმოაჩნდა.
„ეს ოჯახური დაავადებაა. მახსოვს, რომ დეიდაჩემს, მარტას იმდენად სერიოზული მდგომარეობა ჰქონდა, რომ ცხვირის ამპუტაცია ჩაუტარდა. მაამაჩემსაც ჰქონდა კანის კიბო, ჩემს ძმასაც,“ — წერდა კიტონი.
კოლეგების თქმით, დაიან კიტონს შეეძლო ნებისმიერი სივრცე გაეცოცხლებინა, სადაც შედიოდა. მისი გარდაცვალება მნიშვნელოვანი დანაკარგია, მაგრამ მისი მემკვიდრეობა კიდევ დიდხანს იქნება შთაგონების წყარო.
ასევე დაგაინტერესებთ
