82 წლის ესპანელ მომღერალს ხულიო იგლესიასს ორმა ყოფილმა თანამშრომელმა სექსუალურ შევიწროებასა და ძალადობაში დასდო ბრალი. ეს გამოცემა elDiario.es-ისა და ტელეარხ Univision Noticias-ის ერთობლივი, სამწლიანი გამოძიების შედეგად გახდა ცნობილი.
წყაროების თანახმად, იგლესიასის დიასახლისმა და ფიზიოთერაპევტმა პროკურატურაში საჩივარი შეიტანეს. ბრალდებები მოიცავს „ადამიანით ვაჭრობას იძულებითი შრომის მიზნით“ და „სექსუალური თავისუფლებისა და ხელშეუხებლობის წინააღმდეგ მიმართულ ისეთ დანაშაულებს, როგორიცაა სექსუალური შევიწროება და სექსუალური ძალადობა“. მომსახურე პერსონალი ვარსკვლავს ასევე „არახელსაყრელი სამუშაო პირობების შექმნაში“ ადანაშაულებს. მათი თქმით, ინციდენტები 2021 წლის იანვრიდან ოქტომბრამდე პერიოდში, დომინიკის რესპუბლიკასა და ბაჰამის კუნძულებზე, მომღერლის რეზიდენციებში ხდებოდა.
ქალბატონები აცხადებენ, რომ ყოველი სამუშაო დღის განმავლობაში დამცირებას და შეურაცხყოფას განიცდიდნენ, სხეულზე შეხებას, ფიზიკურ და სიტყვიერ ძალადობას იტანდნენ და მუდმივი შევიწროებისა და დაძაბულობის ატმოსფეროში მუშაობდნენ. მათი თქმით, მომღერალი მომსახურე ქალბატონებს სექსუალურ კავშირს აიძულებდა.
მომღერლის ყოფილმა თანამშრომლებმა მედიასთან თავიანთი ისტორიები გამოგონილი სახელებით – ლაურა და რებეკა მოყვნენ. რებეკამ სექსუალური ძალადობის რამდენიმე შემთხვევის შესახებ განაცხადა. მისი თქმით, იგლესიასი, რომელიც იმ დროს 77 წლის იყო, სამუშაო დღის ბოლოს მას მუდმივად თავის ოთახში იბარებდა და სექსუალურად ძალადობდა. რებეკა მუდმივად დაშინების ატმოსფეროში იმყოფებოდა, რასაც სხვა თანამშრომლის (მისი უშუალო უფროსის) დასწრება და ზოგჯერ მონაწილეობაც აძლიერებდა.
„ის თითქმის ყოველ ღამე მიყენებდა. თავს მის ნივთად, მონად ვგრძნობდი“, — ამბობს ქალი.
იმისთვის, რომ საკუთარი თავისთვის და სხვა ქალებისთვის სამართლიანობას მიაღწიონ, ქალებმა საქმის გასაჯაროება გადაწყვიტეს.
დამოუკიდებელი გამოძიების ფარგლებში, ჟურნალისტებმა 15 ყოფილი თანამშრომელი გამოკითხეს, რომლებიც მომღერალთან 1990-იანი წლების ბოლოდან 2023 წლამდე მუშაობდნენ. თავად ხულიო იგლესიასს ჯერჯერობით, ბრალდებებზე პასუხი არ გაუცია.
ესპანეთის ეროვნული სასამართლოს პროკურატურამ საჩივრები 5 იანვარს მიიღო და წინასწარი გამოძიება დაიწყო. ცნობისთვის, ხულიო იგლესიასი ყველაზე წარმატებულ ესპანურენოვან შემსრულებლად ითვლება. მას ორი ქორწინებიდან რვა შვილი ჰყავს.
ასევე დაგაინტერესებთ
#OK! ანა კურნიკოვას და ენრიკე იგლესიასს მეოთხე შვილი შეეძინათ
