პირველი ქართული ინტრავენური თერაპიის კლინიკის მთავარი თერაპევტი, ნესტან კვიციანი რამდენიმე ათწლეულია, ანესთეზიოლოგ-რეანიმატოლოგად მუშაობს. პროფესიონალიზმითა და პაციენტების უანგარო თანადგომით, ქალბატონი ნესტანი თითოეული მათგანის უსაფრთხოებასა და კმაყოფილებას უზრუნველყოფს. „დროფსთან“ თანამშრომლობით კი იგი თავის პროფესიულ ცოდნას ახლებური გზებით იყენებს, რაზეც უფრო დეტალურად თავად გვიამბობს.
უპირველესად, გაგვეცანით.
მოგესალმებით, მე ვარ ნესტან კვიციანი. განათლებით ექიმი რეანიმატოლოგ-ანესთეზიოლოგი გახლავართ. სამედიცინო უნივერსიტეტის დასრულების შემდეგ, გარკვეული დროით, რეანიმატოლოგად, ხოლო მოგვიანებით, წლების განმავლობაში, ანესთეზიოლოგად ვმუშაობდი.
რამდენი წელია, რაც ამ სფეროში საქმიანობთ?
ამ სფეროში დაახლოებით 40 წელია ვსაქმიანობ. 10 წელიწადი რეანიმატოლოგი გახლდით, შემდეგ კი, ამ დრომდეც, ერთ-ერთ პრესტიჟულ სამშობიაროში ვმუშაობდი ანესთეზიოლოგად. თუმცა, ვინაიდან ცხოვრების ამ ეტაპზე აქტიურ მედიცინაში საქმიანობით უკვე ნაკლებად ვარ დაინტერესებული, სიამოვნებით მივიღე კლინიკა Drops Wellness-თან თანამშრომლობის შემოთავაზება.
დაწვრილებით გვიამბეთ, რა მიმართულებით ხელმძღვანელობთ კლინიკაში.
Drops-კლინიკაში, რომელიც, მოგეხსენებათ, ახალი გახსნილია და ინტრავენური თერაპიის პირველი კლინიკაა საქართველოში, ვმუშაობ ექიმ თერაპევტად და კონსულტანტად. ჩემი როლი მოიცავს პაციენტებთან წინასწარი დაწვრილებითი კონსულტაციების გავლას იმისათვის, რომ ყოველ მათგანს ინდივიდუალური ანამნეზის გათვალისწინებით და საჭიროებებიდან გამომდინარე დაენიშნოს შესაბამისი გადასხმები. ზოგადად, კლინიკაში ვიღებთ პაციენტებს, რომლებსაც თავიანთი ჯანმრთელობის გახანგრძლივებისა თუ ფიზიკური მდგომარეობის გაუმჯობესება სურთ, ან უბრალოდ დეტოქსისა თუ პოსტალკოჰოლური გადასხმით ნაბახუსევიდან სწრაფად გამოსვლის სურვილი აქვთ.
დიაგნოსტირებისა და მომხმარებლის საჭიროების გამოვლენა რა პროტოკოლს მოიცავს?
უპირველეს ყოვლისა, ისევ და ისევ თითოეული პაციენტის ჯანმრთელობის ისტორიის შესწავლაა აუცილებელი − იქნება ეს ანალიზები, თუ ქრონიკული და თანმხლები დაავადებების შესახებ ინფორმაციის განხილვა. ასევე, რა მიმართულებით სურს პაციენტს გაჯანსაღება და ა.შ. შესაძლოა, ერთი შეხედვით, არც არაფერი სჭირდეს პაციენტს, მაგრამ დღევანდელი გარემო პირობებიდან გამომდინარე, გამონაბოლქვისა თუ დიდი დროით შენობებში გამოკეტვის შედეგად გამოწვეული ვიტამინების ნაკლებობისთვისაც ტარდება გადასხმები შესაბამისი ვიტამინებით, მიკროელემენტებით, ამინომჟავებით და სხვ.
ამ სფეროში საქმიანობისას შეძენილი თქვენი მადლიერი პაციენტების გამოცდილების შესახებ გვიამბეთ.
ვინაიდან კლინიკა სულ ერთი თვის წინ გაიხსნა, მადლიერება, ალბათ, იმით გამოიხატება, რომ პაციენტები ინტრავენური თერაპიის მოთხოვნით განმეორებითი ვიზიტებისთვის ბრუნდებიან კლინიკაში. ამასთან ერთად, პაციენტებს ვთავაზობთ კოსმეტოლოგიურ მომსახურებასაც, გვყავს პროფესიონალი მასაჟისტები და გვაქვს უმაღლესი ხარისხის აპარატურა. ამიტომ, რა თქმა უნდა, ჩვენი სხვადასხვა სპეციალისტის თანამონაწილეობით კომპლექსურად იქმნება გაჯანსაღების გეგმა, რათა თითოეული პაციენტი კმაყოფილი დარჩეს.
ბევრი პაციენტისთვის ეგრეთ წოდებული გადასხმა სტერეოტიპულ შიშებთან და მღელვარებასთანაა დაკავშირებული. გვიამბეთ, თქვენთან კონსულტაციაზე მოსულ ადამიანებს როგორ უქარწყლებთ ამ შიშებს?
ნამდვილად, ყველა თავისებურ მიდგომას საჭიროებს. ზოგიერთს ნემსის ეშინია, არიან ისეთი პაციენტებიც, რომლებსაც ხშირად გადასხმის პროცესში ველაპარაკები, რადგან საუბარი ეხმარებათ ყურადღების გადატანაში და ჩვენც, ბუნებრივია, ვცდილობთ, პაციენტებს მაქსიმალურად შევუწყოთ ხელი და შევუქმნათ კომფორტული გარემო.
მსგავსი სიახლის გაცნობისას მკითხველს დააინტერესებს, რამდენად უსაფრთხოა ინტრავენური თერაპია?
მედიცინის არცერთ სფეროში არ არსებობს აბსოლუტური უსაფრთხოების გარანტია, თუმცა კლინიკის კომპლექსური მიდგომით მინიმუმამდე დაგვყავს ნებისმიერი სახის რისკი და საჭიროების შემთხვევაში პრევენციულ ღონისძიებებსაც მივმართავთ. ამას ვადგენთ პაციენტების ანალიზებისა და ფიზიოლოგიური მდგომარეობის მიხედვით. ყოველთვის არის ჩვენებები და უკუჩვენებები, რა დროსაც პაციენტებს დეტალურად ვუხსნით ვითარებას და გადაწყვეტილების მიღებაში ვეხმარებით.
რომელია თქვენთან ყველაზე პოპულარული გადასხმა?
გვაქვს გადასხმა „იყავი მუდამ ლამაზი“, რომელიც დეტოქსისთვისა და ახალგაზრდული იერის შენარჩუნებისთვის გამოიყენება. სხვათა შორის, ძალიან ხშირად გვყავს ასევე რკინადეფიციტური ანემიის მქონე პაციენტები, რომლებსაც პრობლემის აღმოსაფხვრელად რკინის შემცველ გადასხმას ვურჩევთ. აგრეთვე გვაქვს კოქტეილი მეტაბოლიკი, რომელიც იწვევს ნივთიერებათა ცვლის გაუმჯობესებას და ცხიმების წვის გაძლიერებას. საბოლოო შედეგი კი არის წონის კლება.
