ყოველი წლის ბოლოს ფერთა ინსტიტუტი Pantone მომავალი წლის მთავარ ფერს აცხადებს. ამჯერად, ფერთა ექსპერტებმა 2023 წლის მთავარ ფერად ალისფრისა და ლავანდისფრის ნაზავი, შინდისა და ჟოლოსფრის საინტერესო გრადაცია − Viva Magenta დაასახელეს. Viva Magenta ბუნებასა და ენერგიას უკავშირდება და ყველაზე მეტად შემოქმედებასა და ხელოვნებასთან იწვევს ასოციაციას. „ბუნების ძალების მეშვეობით, ეს კაშკაშა ფერი მუხტავს ჩვენს სულს და შინაგანი ძალის გამყარებაში გვეხმარება“, − განაცხადა ფერის ინსტიტუტის აღმასრულებელმა დირექტორმა, ლეატრის ეისმანმა.
Pantone წლის ფერს 2000 წლიდან ასახელებს. ეს არცთუ მარტივი ამოცანაა. ინსტიტუტის სპეციალისტები ჯერ კიდევ გაზაფხულიდან ატარებენ კვლევას, რომელიც თითქმის 9 თვის განმავლობაში გრძელდება. ანალიტიკოსები აკვირდებიან მოდის ჩვენებებს, გამოფენებს, ახალ ფილმებს. სწორედ ამ დაკვირვებებზე დაფუძნებით ირჩევენ მთავარ ფერს. ექსპერტების თქმით, ეს პროცესი არის მცდელობა, „გადათარგმნონ“ ფერის ენაზე ის, რაც მსოფლიოში ხდება.
Viva Magenta-ს სხვადასხვა ჩრდილი ამ სეზონზე პოდიუმებსა თუ ქუჩაში საკმარისზე მეტი იყო. ვიხილეთ ამ ფერის როგორც Total Look-ები, ასევე ამ ფერის არაერთი აქსესუარი. ერთი შეხედვით მკაცრი, უშიშარი, თამამი ფერი, მის სერიოზულ იმიჯთან ერთად, პოზიტივსა და მხიარულებას ასხივებს. Pantone-ში ამ ფერს თავდაჯერებულს, მაგრამ არააგრესიულს უწოდებენ, როგორც „მუშტს ხავერდის ხელთათმანში“. ის შეგიძლიათ შავს, თეთრს, კრემისფერს, ლურჯს, ცისფერს, საკმაოდ ეფექტიანად მოარგოთ. ერთი სიტყვით, Viva Magenta არ არის ისეთი „რთული“, როგორც ერთი შეხედვით შეიძლება, ჩანდეს.
როგორც ხვდებით, დროა თქვენს გარდერობს სასწრაფოდ შემატოთ ტენდენციური Viva Magenta, ჩვენ კი ვიზრუნებთ თქვენს ინსპირაციაზე.
