კომპანია „ნოსტე“ რამდენიმე თვეა, რაც ქართულ ბაზარზე გამოჩნდა და უკვე მოახერხა ერთგული მომხმარებლების მოზიდვა. კომპანია მომხმარებლებს ნედლი ხორცპროდუქტების მრავალფეროვან არჩევანს სთავაზობს, რომელიც, ვიდრე მომხმარებელი შეიძენს, უსაფრთხოების მიზნით უამრავ პროცედურას გადის. ჟურნალი OK! „ნოსტეს“ დამფუძნებელსა და წარმოების ხელმძღვანელს, ლევან ცხადაძეს ესაუბრა, რომელიც უფრო დეტალურად გვიამბობს კომპანიის უპირატესობებისა და პრიორიტეტების შესახებ.
რამდენი ხანია, რაც „ნოსტემ“ ბაზარზე ოპერირება დაიწყო?
თავდაპირველად, ერთი წლის წინ დავიწყეთ პროდუქციის წარმოება, თუმცა უკვე ექვსი თვეა, რაც საკუთარი ბრენდი ჩამოვაყალიბეთ და ბაზარზე დავიწყეთ ოპერირება.
გვიამბეთ თქვენი გამოცდილების შესახებ ამ სფეროში.
1998 წლიდან ამ სფეროში ვსაქმიანობ. თავდაპირველად, ჩემი საქმიანობა დისტრიბუციას მოიცავდა, შემდეგ მქონდა საკუთარი კომპანია, ვფლობდი ფერმასაც. მოკლედ რომ ვთქვათ, 1998 წლიდან დღემდე მჭიდროდ ვარ დაკავშირებული ამ სფეროსთან და იდეაც შესაბამისად აქედან გამიჩნდა.
რა არის კომპანიის მთავარი მიზანი?
ჩვენი მიზანია “ნოსტეს” საფირმო მაღაზიების გაფართოება, ჯანსაღი და პრემიუმკლასის ხორცპროდუქტების მიწოდება საკუთარი მომხმარებლისთვის უშუალოდ ჩვენი საფირმო მაღაზიიდან. „ნოსტეს“ პროდუქტი არის მუდმივად ახალი − საქართველოს მასშტაბით, ყოველდღიურად ახალ ხორცს ვიღებთ. ჩვენ გვაქვს საკმაოდ დიდი საჩეკები, საიდანაც მცირე მეწარმეებსაც ვამარაგებთ და პროდუქცია ექსპორტზეც გაგვაქვს − სომხეთსა და აზერბაიჯანში.
რას სთავაზობთ მომხმარებლებს?
ჩვენს მომხმარებლებს ვთავაზობთ ფრინველის ნედლ ხორცპროდუქტებს − როგორც მთლიანად ქათამს, ასევე სხვადასხვა ნაწილს, მათ შორის: ქათმის მკერდს, ფილეს, ბარკლებს, ფრთებს, საბულიონე მასალას, კუჭს და ღვიძლს. ასევე, ასორტიმენტში გვაქვს ქათმის თავ-ფეხი.
გვესაუბრეთ ხარისხზე.
პროდუქტის პირველადი ხარისხი მოდის წიწილიდან. ეს იმას ნიშნავს, რომ წიწილის ჯანმრთელობაზეა დამოკიდებული პროდუქტის ხარისხიანობა. ამიტომ აუცილებელია მიკრობიოლოგიურ დონეზე იყოს შემოწმებული თითოეული ფრინველის ჯანმრთელობა. წიწილის ჯანმრთელობას განსაზღვრავს მაღალი იმუნიტეტი, რომლის შემოწმება მუდმივად ხდება. ჯანმრთელი ფრინველი კარგია თუნდაც იმიტომ, რომ ზრდის პროცესში არანაირ ჩარევას არ საჭიროებს, არც ანტიბიოტიკებით და არც რაიმე სხვა მედიკამენტით. ჩვენი პროდუქტის მაღალ ხარისხს ისიც განსაზღვრავს, რომ არ ვიყენებთ არავითარი სახის ქიმიურ თუ სინთეტიკურ დანამატებს და ფრინველები იკვებებიან ბუნებრივი მარცვლეულით. ჩვენ მიერ წარმოებული ფრინველის ჯიში მართალია სწრაფად მზარდია, მაგრამ როგორც უკვე აღვნიშნე, რაიმე სახის ხელოვნური ჩარევა მათ გაზრდაში არ ხდება.
ამ ეტაპზე სად შეგვიძლია „ნოსტეს“ პროდუქციის შეძენა?
უკვე 20-ზე მეტი საფირმო მაღაზიით ვართ ბაზარზე წარმოდგენილები. თვეზე მეტია, ჩვენი პროდუქციის შეძენა „ფრესკოს“ მაღაზიათა ქსელშია შესაძლებელი. სხვა კომპანიებთან არ ვთანამშრომლობთ. ახლო მომავალში ჩვენი მომხმარებელი იხილავს „ნოსტეს“ უფრო მეტ საფირმო მაღაზიებს, რომელიც ხელს შეგვიწყობს უშუალო კონტაქტი გვქონდეს მომხმარებელთან და უფრო კარგად ვაკონტროლოთ ჩვენი პროდუქციის ხარისხი და მიწოდება.
რა სახის პროცედურებს გადის პროდუქცია, სანამ მომხმარებელი შეიძენს?
ბიოუსაფრთხოება ჩვენთან საკმაოდ მაღალ დონეზეა დაცული. ამის შემდეგ უკვე ფრინველი გადის სასაკლაოზე. ჩვენ გვყავს საკუთარი კერძო ვეტერინარი ექიმი და ასევე ყოველდღიურ რეჟიმში ჩვენთან არის სახელმწიფო სურსათის უვნებლობის წარმომადგენელი, რომლებიც აკონტროლებენ ფრინველის ჯანმრთელობას, იღებენ სინჯებს, შემდეგ ყველა პარტია იგზავნება ლაბორატორიაში და მოწმდება მიკრობიოლოგიურ დონეზე, რათა ყველა სახიფათო დაავადება ან ბაქტერია გამოირიცხოს და მომხმარებელს ჯანმრთელი პროდუქტი მიეწოდოს.
სამომავლო გეგმები.
ჩვენი მიზანი ამ ეტაპზე ის გახლავთ, რომ კომპანიის პროდუქტი გახდეს ყველასთვის ხელმისაწვდომი. ამისათვის საჭიროა, თბილისის ყველა უბანში გაიხსნას საფირმო მაღაზიები. ვაპირებთ, მომავალ სამ თვეში ახალი სამოცი ობიექტი გავხსნათ. სამომავლოდ, ასევე ვგეგმავთ საწარმოს აშენებას და კვერცხის წარმოებას. გარდა ამისა, ახლო მომავალში საჭირო გახდება ხორცის კიდევ ერთი საწარმოს დამატება, რადგან მოთხოვნა იზრდება. იმედი მაქვს, დროთა განმავლობაში გამოჩნდებიან ისეთი კონკურენტებიც, რომლებიც გაგვიწევენ ჯანსაღ კონკურენციას და საშუალებას მოგვცემენ უფრო და უფრო უკეთესები გავხდეთ.
