ლოგიკურია, რომ ამ თემას ვეხები, რადგან თავადაც ტელეწამყვანი ვარ. ხშირად მიფიქრია იმაზე, თუ რატომაა ზოგი სახე უკვდავი და შეუცვლელი, ზოგი კი უბრალოდ არის. არსებობენ ტელეწამყვანები, რომლებსაც, ერთი შეხედვით, ყველა მონაცემი აქვთ, მაგრამ არავის ამახსოვრდება. ხვალ რომ ჩაანაცვლო მსგავსი სახით, ზეგ არც არავის გაახსენდება. ვფიქრობ, ტელეწამყვანისთვის ყველაზე მნიშვნელოვანი ორი პუნქტია − იყოს სანდო-გულწრფელი და იყოს დასამახსოვრებელი. თუ აკმაყოფილებ ამ ორ პუნქტს, მაშინ მაყურებლის სიყვარული ან სიძულვილი გარანტირებულია.
როდესაც გამორჩეულ ტელესახეებზე ვსაუბრობთ, პირველი, ვინც მახსენდება, გენიალური ბარბარა ვოლტესი და ლარი კინგი არიან − ამერიკული სატელევიზიო ეთერის ორი ტიტანი. გამორჩეული წამყვანის სტილისა და ლაპარაკის მანერით, მათ უნიკალური ეკრანული იმიჯი შექმნეს. გრძელვადიანი კარიერის განმავლობაში, ამ ორ ტელესახეს არასოდეს უღალატია საკუთარი იმიჯისათვის. მაყურებელმაც ზუსტად იცოდა, რას ელოდა მათგან.
კიდევ ერთი გამორჩეული სტილის მქონე ტელეწამყვანი ოპრა უინფრია. ბარბარასგან განსხვავებით, იგი იდეალურად „დავარცხნილი“ არასოდეს ყოფილა. ბარბარას სრულყოფილი ქალის იმიჯი ჰქონდა − მოწესრიგებული თმა, ჰარმონიულად შეხამებული სამოსი. იგი ხელმიუწვდომელი ტელესახე გახლდათ. ხოლო ოპრა „რეალური“ ქალია, რომელიც იცვამს ჯინსებს და სპორტულ ფეხსაცმელს. ის შენი მეგობარია. აქედან გამომდინარე, ტელეწამყვანისთვის მხოლოდ ინტელექტი და ნიჭი საკმარისი არ არის, მისთვის სწორად შერჩეული იმიჯი უმნიშვნელოვანესია. ეს კი არც ისე მარტივია. ტელეწამყვანისთვის მიზნობრივ აუდიტორიაზე მორგებული იმიჯის მუდამ შენარჩუნება საკმაოდ დიდ ძალისხმევას მოითხოვს.
რაც შეეხება ღამის იუმორისტულ შოუს, აქ საქმე გაცილებით მარტივადაა. თუ დააკვირდებით, მსგავსი ტელეშოუების წამყვანებს მხოლოდ ერთი დრეს-კოდი აქვთ. დევიდ ლეტერმანი, ტრევერ ნოა, ჯიმი კიმელი, ჯიმი ფელონი, კრეიგ ფერგიუსონი, სტეფან კოლბერტი, ჯონ სტიუარტი − მათ ზუსტად ერთი და იგივე სამოსი აცვიათ. ამ სატელევიზიო მიმდინარეობაში ტელესახეები უკვე დამკვიდრებულ იმიჯს ერგებიან, მხოლოდ მათი იუმორი ერთმანეთისგან განსხვავებულია.
საკუთარი უნიკალური იმიჯი, შესაბამისი სტილი და აუდიტორიაზე ბოლომდე მორგება − თუ ტელეწამყვანი ამ კომპონენტებს აკმაყოფილებს, ის მუდმივად იქნება რელევანტური.
