რას ნიშნავს თქვენთვის თბილისური სახლი? თბილისური ინტერიერი უპირველესად რასთან ასოცირდება?
გაზაფხულის სითბოს შემოსვლასთან ერთად, ღია ფანჯრებში დანახული ოჯახური შეკრებები. ჩემი ბავშვობა იმ პერიოდს დაემთხვა, როდესაც პირველ სართულზე ძალიან ბევრი ოჯახი ცხოვრობდა. სადაც დიდი ინტერესით ვიყურებოდი და განსაკუთრებით მიყვარდა გაზაფხულის პერიოდის მოსვლასთან ერთად.
როგორ და როდის დაიწყეთ სანათის დიზაინზე მუშაობა?
სანათზე მუშაობა დავიწყე 14 წლის წინ, სრულიად შემთხვევით, მაგრამ იმას, რასაც დღეს ვაკეთებ, პირველად საკუთარ თავს გავუკეთე, რათა საცხოვრებელ გარემოში უფრო მეტი სიმყუდროვე და კომფორტი შემეტანა. ამან დიდი მოწონება დაიმსახურა, გაიზარდა მოთხოვნა და ჩემმა დროებითმა საქმიანობამ სერიოზული სახე მიიღო. ნივთებისა და ავეჯის გადაადგილების გარეშე, ერთსა და იმავე სივრცეში განათების საშუალებით შეგვიძლია სხვადასხვა განწყობა შევქმნათ.
ვფიქრობ, ნებისმიერი საქმე, რომელიც სიყვარულით კეთდება, შეიძლება ადამიანის წარმატების საწინდარი იყოს.
იყენებთ თუ არ ანტიკვარულ სალონებს და მშრალი ხიდის რესურსს თქვენს შემოქმედებით პროცესში? პირველად როდის მოხვდით მშრალ ხიდზე?
მახსოვს, პატარა ვიყავი, დაახლოებით 13 წლის, როდესაც პირველად ბაბუას ვთხოვე, მშრალ ხიდზე გამყოლოდა. ისეთი საინტერესო დეტალები, რომლებსაც ადრე ვიყენებდი, დღეს ძალიან იშვიათად მხვდება. სამაგიეროდ, ამ ყველაფერმა მოტივაცია გამიჩინა, სასურველი ფიგურები ხისგან და მეტალისგან დავამზადო სხვადასხვა სახელოსნოში.
ძალიან მომწონს ფლორა/ფაუნისა და აღმოსავლურ-ირანული მხატვრობის მოტივი თქვენს სანათებში. როგორ დაიბადა ეს კოლექცია?
მიუხედავად იმისა, რომ დღეს ქსოვილების დიდი არჩევანია, ჩემთვის სასურველი ზომის, ფერისა და ფაქტურის ქსოვილი რთულად მოსაძებნია და მოსარგებია სანათის კარკასზე. დავიწყე ძველი ქსოვილების დეტალებით, ფრესკების, აღმოსავლურ-ირანული მინიატურების, მოზაიკის პრინტების გამოყენება სანათის დიზაინში, რაც ძალიან მომწონს.
როგორ მოვახერხოთ ხელოვნური განათებისა და დღის შუქის ჰარმონიული შერწყმა ინტერიერში? როგორ ავარჩიოთ განათების ფერი და ფორმა?
ვფიქრობ, დღის განათება ძალიან მნიშვნელოვანია ინტერიერში, დიდი ფუფუნებაა დღეს. ჭაღებსა და სანათებს შეუძლია როგორც კომფორტისა და სიმყუდროვის შეტანა სივრცეში, ასევე დისონანსის შექმნა. უპირველეს ყოვლისა, არავის ვურჩევ ცივი განათების ეკონომნათურების გამოყენებას საცხოვრებელ სივრცეებში. ჩემი აზრით, თითქმის ყველა ინტერიერს უხდება ყვითელი ფერის სანათი და მცენარეები. სამწუხაროდ, დღეს დიდი პრობლემის წინაშე დაგვაყენეს მშენებლებმა, რომლებიც პირდაპირ ჩვენს საცხოვრებელ სივრცეში სრულიად უკითხავად იჭრებიან და დღის განათებას გვიქრობენ.
როგორია თქვენი იდეალური სახლი? რა არის სასიცოცხლოდ აუცილებელი ჰარმონიისთვის?
უპირველესად, კეთილგანწყობილი მასპინძელი. საცხოვრებელ სივრცეში უნდა იგრძნობოდეს სიმყუდროვე და ხასიათი.
ტექსტი: ირმა შარიქაძე
ფოტო: ირმა შარიქაძე
