კიმონო იაპონური კულტურის გამომხატველი სამოსია, რომელსაც ბოლო წლებში საკმაოდ აქტიურად მოიხმარენ სხვადასხვა ქვეყანაში. მათ რიცხვს არც საქართველო ჩამორჩენია და დღეს უკვე ჩვენს ქვეყანაშიც ხელმისაწვდომია მისი შეძენა. ჟურნალი OK! გაგაცნობთ ქალბატონს, რომელიც სწორედ ამ საქმიანობით არის დაკავებული და საზოგადოებას ულამაზეს კიმონოებს სთავაზობს.
როგორ გაგიჩნდათ კიმონოების ქართულ ბაზარზე გამოტანის იდეა?
ყოველთვის მიზიდავდა მრავალფეროვანი და ფერადი სამოსი. მიუხედავად იმისა, რომ ამ სფეროში აქამდე არასოდეს მომისინჯავს თავი, პანდემიისგან გამოწვეული კრიზისიდან გამომდინარე, გადავწყვიტე დამეწყო იმის კეთება, რაც გარდა ფინანსური დატვირთვისა, სხვა მნიშვნელობასაც შეიძენდა და სასიამოვნოს გახდიდა ჩემთვის მუშაობის პროცესს.
რატომ კიმონოები?
თავდაპირველად, არავინ იცოდა კიმონოების მოხმარების წესი, მე კი რამდენსაც ვიპოვიდი, ვაგროვებდი და ვუფრთხილდებოდი. მზადდება ძალიან ფაქიზი აბრეშუმის ქსოვილით და რაც მთავარია, არის ხელნაკეთი. კიმონოები სრულიად ახალ შეფუთვებშია ჩალაგებული, ღილებზეც კი ფოლგებია გადაკრული, რათა ღილებმა არ დააზიანოს ქსოვილი.
როგორია დაინტერესება საზოგადოების მხრიდან?
წლების წინ ძალიან ძვირი ღირდა და მარტივადაც არ იშოვებოდა, ამიტომ მეგონა ვერც გავყიდდი და ვიფიქრე, ბალიშისპირებად გადავაკეთებდი ამ ქსოვილებს. რამდენიმე ისეთი მომხმარებელი დადიოდა ჩემთან, როლებსაც თურმე ძალიან მოსწონდათ კიმონოები და ერთ-ერთი სტუმრობისას, სრულიად შემთხვევით დაინახეს სხვა სამოსთან ერთად. ამან სრული შოკი გამოიწვია. მას შემდეგ გაიზარდა დაინტერესება, მომხმარებელთა რაოდენობა და ცნობადობა კიმონოების მიმართ. ბევრი ადამიანი აღმოჩნდა, ვინც ამ ქსოვილებზე და ნაქარგებზეა შეყვარებული.
როგორია კონკურენცია ბაზარზე შემოთავაზებულ კიმონოებს შორის?
ახლა „ზარამ“, „მანგომ“ და სხვა ბრენდებმაც შეკერეს კიმონოს სტილის ტანსაცმელი სინთეტიკური მასალით, მაგრამ განსხვავება ერთი შეხედვით იგრძნობა.
როგორ ფიქრობთ, რამდენად აქტიურად დაიწყებს საზოგადოება კიმონოების მოხმარებას საქართველოში?
საკმაოდ აქტიურად იცვამენ ახლაც და ვფიქრობ, აუცილებლად გაიზრდება მომხმარებელთა რიცხვი საქართველოში.
