OK! გაესაუბრა ინტერიერის დიზაინერ ნუცა ბახტაძეს საკუთარი საქმიანობისა და სამომავლო გეგმების შესახებ. ნუცა ინტერვიუში აღნიშნავს, თუ რამდენად დიდი ადგილი უჭირავს მის ცხოვრებაში ბუნებასა და იმ ადამიანებს, რომელთა სურვილითაც ყოველ ჯერზე ხელოვნების ახალ ნიმუშს ქმნის და აცოცხლებს მათ იდეას. ნუცასთვის ინტერიერის დიზაინერობა პროფესიადქცეული ჰობია.
ნუცა, დღეს თქვენ ინტერიერის ერთ-ერთი ყველაზე მოთხოვნადი დიზაინერი ხართ საქართველოში. გვიამბეთ იმ გზის შესახებ, რომელიც დღემდე გამოიარეთ.
პროფესიით ეკონომისტი ვარ, მაგისტრის ხარისხით. ვინაიდან ბავშვობიდან ვხატავ, 4 წლის წინ გადავწყვიტე ჩემი ხედვები გადამეტანა სხვა სფეროში და შევიცვალე პროფესია ინტერიერის დიზაინის მიმართულებით. აქედან გამომდინარე, განათლება მივიღე გრაფიკული დიზაინის კუთხით, ასევე გავიარე საერთაშორისო New Skills Academy, ინტერიერის დიზაინის თეორიული და პრაქტიკული კურსი. შეიძლება ითქვას, ჩემი ჰობი გახდა ჩემივე პროფესია, რაც ერთდროულად სამსახურიცაა და გართობაც.
უფრო დეტალურად გვიამბეთ თქვენი საქმიანობის შესახებ.
ჩემი გემოვნება მაძლევს საშუალებას, შევითავსო დიზაინში დეკორატორის ფუნქცია. შემიძლია, ვთქვა, რომ კარგი მსმენელი ვარ, ვეხმარები ადამიანებს გააცოცხლონ საკუთარი იდეები, ხედვები, და დავუხატო სასურველი სურათი. მნიშვნელოვანია უნიკალური და პერსონალური გარემოს გამოკვეთა. ეს პროცესი აცოცხლებს ისეთ სივრცეებს, რომლებიც კლიენტის ინტერესების დახვეწილი და დელიკატური გაგრძელებაა. ინტერიერს აღვიქვამ, როგორც ხელოვნების ნიმუშს, სადაც ყველა ელემენტს მნიშვნელოვანი როლი აქვს, სივრცეში საერთო ჰარმონიის შესაქმნელად. ჩემი პროექტები წარმოადგენს მომხმარებელთა ინტერესებსა და გემოვნებას.
რა არის თქვენი ინსპირაციის მუდმივი წყარო მუშაობის პროცესში?
ინსპირაციის ძირითად წყაროს ბუნება წარმოადგენს. ჩემთან ყოველთვის ახლოს იყო ბუნება, სადაც ვხედავ წარმოუდგენელ ფერთა პალიტრას. შესაბამისად, მუდმივად შთაგონებას ვიღებ ჩემი მოგზაურობისგან, სადაც ვცდილობ, რაც შეიძლება მეტი ვისწავლო სხვადასხვა კულტურისგან, ხელოვანებისგან და მხატვრებისგან. აგრეთვე, მინდა აღვნიშნო, რომ კულტურული მრავალფეროვნება ჩემთვის ინსპირაციის დიდი წყაროს წარმოადგენს.
პანდემიამ რაიმე სახის გავლენა იქონია თქვენს საქმიანობაზე?
პანდემიამ, რა თქმა უნდა, იქონია გავლენა, მაგრამ ძალიან მცირე ხნით. პანდემიის დროს საკუთარ თავთან უფრო მეტი ხნით დავრჩი, ვიდრე ეს სხვა დროს ხდებოდა. ამ პერიოდში დამებადა ბევრი იდეა და აზრი, გარეთ გამოვიდა ყველა ის დაგროვილი შემოქმედებითი უნარი, რომელიც ჩემს პროფესიას უკავშირდება.
სამომავლო გეგმები.
ვაპირებ მოგზაურობას, მეგობრებთან შეხვედრას, იოგათი დაკავებას და იმ მუზეუმების მონახულებას, რომლებიც დამეხმარება, სამომავლო პროექტებს ახალი ხედვებით შევუდგე.
საკონტაქტო ინფორმაცია:
NBInteriorExteriordesign
NutsaBakhtadze Interior design
+995555565464
ტექსტი: მარიამ მთივლიშვილი
ფოტო: ალექსეი სეროვი
