აქსესუარები ერთი შეხედვით ძალიან სადა ჩაცმულობასაც კი თვალშისაცემსა და ორიგინალურ შესახედაობას ანიჭებს. მთავარია შევარჩიოთ გემოვნებიანი და ხარისხიანი სამკაულები, რომლებიც განსაკუთრებულ ელფერს შესძენს ჩვენს ყოველდღიურ სამოსს. ჟურნალი OK! Ocean Jewelry‑ის დამფუძნებელ ელენე ზვანბაიას ესაუბრა, რომელიც საკუთარი ბრენდისა და სამკაულების განსაკუთრებული დატვირთვის შესახებ გვიამბობს.
გვიამბეთ ბრენდის დაარსების იდეასა და განხორციელებაზე.
ბრენდის დაარსების იდეა 4 წლის წინ გამიჩნდა, თუმცა თავდაპირველად ფართო აუდიტორიაზე არ გავსულვართ. Ocean Jewelry ეტაპობრივად გახდა ცნობილი საზოგადოებისთვის და დღეს მომხმარებლებს ვთავაზობთ როგორც ქალბატონების, ასევე მამაკაცების აქსესუარებს.
უფრო ვრცლად გვიამბეთ, რას სთავაზობთ მომხმარებლებს?
მომხმარებლებს ვთავაზობთ ვერცხლის აქსესუარებს, რომელიც არის ძალიან კომფორტული ყოველდღიური მოხმარებისთვის. კოლექციაში წარმოდგენილია ყველანაირი სტილის სამკაულები, რომელიც ყოველდღიურ სამოსსაც ძალიან უხდება, კლასიკურსაც და შერეულ სტილსაც. ზოგიერთ აქსესუარზე ბუნებრივ ქვებსაც ვიყენებთ, რაც კიდევ უფრო ორიგინალურსა და დახვეწილს ხდის ჩვენს სამკაულებს.
ვინ მუშაობს სამკაულების დიზაინზე?
სამკაულების დიზაინზე მე და ჩემი და – ნინო ზვანბაია ვმუშაობთ. თავდაპირველად, ესკიზს ვქმნით, ხოლო შემდეგ ოქრომჭედელი გვეხმარება ყალიბის დამზადებასა და ტექნიკურ სამუშაოებში.
სად არის პროდუქციის შეძენა შესაძლებელი?
პროდუქციის შეძენა ამჟამად შესაძლებელია „სტამბის“ მაღაზიაში.
ვინ არიან თქვენი მომხმარებლები?
მომხმარებლები არიან ახალგაზრდა ადამიანები. პანდემიამდე, ტურისტებიც ძალიან აქტიურად იძენდნენ ჩვენს პროდუქციას და უზომოდ დიდი დაინტერესებაც იყო მათგან.
როგორია თქვენი სამომავლო გეგმები?
ახლო მომავალში ვგეგმავთ გაფართოებას და ონლაინგაყიდვებზე აქტიურად გადასვლას. სამომავლოდ, სხვა მასალებითაც ვაპირებთ სამკაულების დამზადებას. გვინდა კიდევ უფრო მეტი მოდელი შევთავაზოთ ჩვენს მომხმარებლებს.
