თუ ხართ ტკბილეულის მოყვარული და თქვენთვის წარმოუდგენელია წარმატებული დღის გემრიელი დესერტის გარეშე დაწყება, მაშინ სწორ ადგილას მოხვდით, რადგან ჟურნალი OK! ყველაზე ტკბილი და არომატული ყუთის – Cocosweetbox-ის შესახებ გიამბობთ. რას აღმოაჩენთ მასში და როგორი გემოები ერთიანდება ამ ჯადოსნურ ყუთში? − ამის შესახებ კომპანიის დამფუძნებელი ანა დოლიძე გვიამბობს.
როდიდან დაიწყო კომპანიამ ქართულ ბაზარზე ოპერირება?
თვეც არ გასულა მას შემდეგ, რაც ქართულ ბაზარზე გამოვჩნდით, თუმცა სასიამოვნოდ გაოცებულები ვართ, რადგან მცირე დროში დიდი გამოხმაურება და ნდობა მოვიპოვეთ, რაც ძალიან მახარებს და მოტივაციას მაძლევს, გავაკეთო უფრო მეტი და საზოგადოებას მრავალფეროვანი პროდუქცია შევთავაზოთ.
როგორ გაჩნდა იდეა?
იდეა − შემექმნა ტკბილეულის ყუთი, გამიჩნდა ესპანეთში სწავლის დროს. ჩემთვის წარმოუდგენელია დღე გემრიელი დესერტის გარეშე. სწორედ ასეთი დამოკიდებულების გამო, იქ ყოფნის პერიოდში ხშირად ვსტუმრობდი ისეთ ადგილებს, სადაც უგემრიელეს ჩუროსს, ვაფლებს და სხვა გემრიელ დესერტს ამზადებდნენ. ამ გემოებმა უდიდესი გავლენა იქონია ჩემზე და დავიწყე ფიქრი იმაზე, თუ როგორ შემეძლო მსგავსი რამ მეც გამეკეთებინა. როდესაც პანდემია დაიწყო, იძულებული გავხდი თბილისში დავბრუნებულიყავი და შანსი მომეცა, ჩემი იდეა რეალობად მექცია.
რას სთავაზობთ მომხმარებლებს?
ჩვენს მომხმარებელს ვთავაზობთ უდიდესი სიყვარულით მომზადებულ უმაღლესი ხარისხის ტკბილეულის ორ განსხვავებულ ყუთს: სტანდარტულს და ჯანსაღს. თითოეულ ყუთში ექვსი სხვადასხვა სახეობის დესერტია. სტანდარტულ ყუთში შეგიძლიათ აღმოაჩინოთ მინი-ფანქეიქები, დარიჩინის ფუნთუშები, ორცხობილები, ქინდერისა და კლასიკური ჩიზქეიქი, ჩუროსი და ბელგიური ვაფლები. რაც შეეხება ჯანსაღ ყუთს, ესეც გამოირჩევა მრავალფეროვნებით. კერძოდ: დიეტური ბელგიური ვაფლები, ავოკადოს ორცხობილები, ბრაუნები, სტაფილოს კექსები, ჩიზქეიქები და ჩიას პუდინგები სხვადასხვა ხილით. მათ, ვისაც უყვართ ტკბილეული, მაგრამ ერიდებიან შაქრისა და თეთრი ფქვილისგან დამზადებულ პროდუქტს, „კოკოს“ ჯანსაღი ყუთი საუკეთესო არჩევანია!
გვესაუბრეთ კომპანიის უპირატესობებსა და ნიშაზე, რომელიც სხვებისგან გამოგარჩევთ.
განსხვავებული დიზაინის შეფუთვა, როგორც დესერტების, ასევე სოუსების, რომლებიც შპრიცებშია განთავსებული, ძალიან მოსახერხებელია.
ონლაინსერვისის დახმარებით, შინიდან გაუსვლელად უგემრიელესი დესერტის დაგემოვნება მომხმარებლისთვის კომფორტულია.
ჯანსაღი ყუთი, რომელიც დამზადებულია ბიოორგანულ პროდუქტზე, არის უგლუტენო და დაბალკალორიული. ტკბილეულში შაქრის ნაცვლად გამოყენებულია ერითრიტოლი/სტევია, რომელიც არ ზრდის სისხლში შაქარს და ინსულინის გამოყოფას, რაც განსაკუთრებით მნიშვნელოვანია დიაბეტიკებისთვის და კეტოდიეტაზე მყოფი ადამიანებისთვის. პროდუქტებში გამოყენებულია ქოქოსისა და შვრიის ფქვილი, რომელიც იდეალურია მათთვის, ვისაც გლუტენის აუტანლობა აქვთ. ყუთს მოყვება მასში მოთავსებული თითოეული დესერტის კალორიების ცხრილი.
როგორია თქვენი მიდგომა და მუშაობის სპეციფიკა?
ეს წამოწყება ძალიან დიდ პასუხისმგებლობას მოითხოვს. ჩვენთვის მთავარია მომხმარებელი იყოს კმაყოფილი და მოსწონდეს „კოკოს“ ტკბილეული. შესაბამისად, უპირატესობას ვანიჭებთ უმაღლესი ხარისხის პროდუქტს, რომელიც ყოველდღე ახლად მომზადებულია. მათთვის ხშირად გვაქვს სხვადასხვა აქცია და ფასდაკლებები. შეკვეთის მიღებისთანავე ვიწყებთ გამზადებას და 50 წუთის განმავლობაში სასურველი ყუთის ადგილზე მიტანას. ყოველი შეკვეთის შემდეგ, ვცდილობთ გავიგოთ, რამდენად მოეწონათ და შეგვიძლია თუ არა ცვლილებების შეტანა. ეს დამოკიდებულება ძალიან მნიშვნელოვანია.
სამომავლო გეგმები…
მაქსიმალურად ვცდილობთ დავიმკვიდროთ ღირსეული ადგილი უდიდესი კონკურენციის პირობებში. ბრენდის განვითარების თვალსაზრისით, საკმაოდ ბევრი სამომავლო გეგმა გვაქვს. უპირველესად, გვინდა გავხსნათ მაღაზია და პირისპირ შევძლოთ კომუნიკაცია მომხმარებელთან, თუმცა მანამდე ვცდილობთ ყოველდღე ვიმუშაოთ ახალ გემოებზე და გავაფართოოთ ასორტიმენტი, რათა უფრო და უფრო გემრიელი პროდუქტის შემოთავაზება შევძლოთ. მიმაჩნია, რომ ეს ჯერ კიდევ დასაწყისია და ყველაფერი წინ არის. მთავარია მონდომება და საქმისადმი სიყვარული. ასევე, მთელი გულით წარმატებებს ვუსურვებთ მათ, ვინც ამავე საქმიანობით არიან დაკავებულნი.
