ჟურნალი OK!-ის მკითხველი კარგად იცნობს ტურისტულ კომპანიას, Top Travel-ს, რომელიც უკვე მეთერთმეტე წელია მომხმარებლებს ტურებს მთელი მსოფლიოს მასშტაბით სთავაზობს. კომპანია მეთერთმეტე წელია მოწინავე ადგილს იკავებს ბაზარზე. ეს წარმატება კი მომსახურების მაღალმა ხარისხმა, ხელმისაწვდომმა ფასებმა და, რა თქმა უნდა, კომპანიის დამფუძნებლის მიზანდასახულობამ განაპირობა. ანნა გრიგოლიშვილმა შეძლო და ტურისტული კომპანია დამოუკიდებლად და ნულიდან შექმნა.
ანნა, რამდენად დატვირთული რეჟიმი გაქვთ?
შეიძლება ითქვას, რომ ჩემს საქმიანობას ჩემი ცხოვრების 80% უჭირავს, რადგან თავიდან ბოლომდე ჩართული ვარ „ტოპ თრეველის“ ყოველდღიურ საქმიანობაში. ზოგადად, ტურიზმი ისეთი სფეროა, ერთი წამითაც ვერ მოდუნდები, მითუმეტეს, როცა უამრავ ადამიანზე გაქვს პასუხისმგებლობა აღებული. კვირა დღე მაქვს მხოლოდ დასვენებისთვის, როდესაც საკუთარ თავს უფრო დიდ დროს ვუთმობ და სახლში დასვენებას ვახერხებ, თუმცა, სიმართლე გითხრათ, ამ დროს ჩემი სამსახური უკვე მენატრება.
როგორ გაჩნდა Top Travel-ის შექმნის იდეა?
„ტოპ თრეველის“ შექმნის იდეა როცა დამებადა, საბაზისოდ არაფერი არ გამაჩნდა. უბრალოდ, მოგზაურობა ძალიან მიყვარს და ძალიან დიდი სურვილი მქონდა ამ სფეროში ყველაფერი შემესწავლა. თავდაპირველად დავიწყე ბაზრის მოკვლევა, ღამეებს ვათენებდი ინფორმაციის მოსაპოვებლად. მოვიძიე და დავუკავშირდი უცხოურ მომწოდებლებს, რომლებთანაც კონტრაქტები გავაფორმე და ყველაფერი დავიწყე ნულიდან.
თავდაუზოგავი შრომის შედეგია, რომ უკვე მეთერთმეტე წელია, რაც „ტოპ თრეველი“ ოპერირებს ტურისტულ ბაზარზე და საკმაოდ წარმატებულად. ჩვენი კომპანია ყოველ წელს არის ლიდერი და ტურების გაყიდვების რაოდენობითაც უკვე წლებია ვინარჩუნებთ პირველ ადგილს. რაც ყველაზე მნიშვნელოვანია, ჩვენ გვენდობიან ჩვენი მომხმარებლები და მათი რაოდენობა ყოველდღიურად იზრდება.
საკმაოდ დიდი კონკურენციაა ბაზარზე, როგორ ინარჩუნებთ პოზიციებს?
გეთანხმებით, გარე დამკვირვებლის თვალით თუ შევხედავთ, ბაზარზე ძალიან ბევრი ტურისტული კომპანიაა, თუმცა მათ 85%-ს კონკურენტებად არ მივიჩნევთ. არავის ვაკნინებ, მაგრამ არსებულ ტურისტულ კომპანიებს არ გააჩნიათ ფინანსური დაზღვევა და შეიძლება ითქვას, რომ გამართლებაზე მუშაობენ. ვგულისხმობ იმას, რომ მათ მომხმარებელს რამე რომ გაუჭირდეს, არანაირი ფინანსური რესურსი არ გააჩნიათ აღნიშნული საკითხის მოსაგვარებლად. როცა ამხელა პასუხისმგებლობა გვაქვს აღებული მომხმარებლის მიმართ, კომპანიას აუცილებლად უნდა გააჩნდეს თავისი ფინანსური რესურსი ყველა პრობლემის გადასაჭრელად, რათა მომხმარებელი არ დაზარალდეს. აღნიშნულ საკითხში სანდოობის გამო ჩვენ გვყავს ათიათასობით მომხმარებელი, რომელსაც აქვს ჩვენი კომპანიის იმედი კრიზისულ სიტუაციებში და ასეთი ადამიანების რიცხვი ყოველდღიურად იზრდება. მათ მხოლოდ უნდა გადაწყვიტონ მოგზაურობა და მასთან დაკავშირებულ ყველა დეტალზე „ტოპ თრეველი“ იღებს პასუხისმგებლობას.
რას მოაქვს წარმატება?
ჩემთვის ეს სიტყვა სხვადასხვა ასოციაციას იწვევს. უპირველესად, ვფიქრობ, რომ წარმატება შინაგანი სიმშვიდეა. თუ სულიერი სიმშვიდე არ აქვს ადამიანს, ვერაფერს ვერ შეძლებს და ვერც განვითარდება. ასევე, მნიშვნელოვანია მუდმივი განვითარება, არასოდეს არ უნდა დასჯერდე მიღწეულს და, რა თქმა უნდა, საქმის სიყვარულის გარეშე არაფერი გამოვა.
მე „ტოპ თრეველს“ ჩემს მესამე შვილსაც ვუწოდებ. როგორც უკვე ვახსენე, უდიდესი პასუხისმგებლობაა, როცა ადამიანი შენს კომპანიას ენდობა და ირჩევს მომსახურე კომპანიად, მას არათუ იმედი არ უნდა გაუცრუო, უფრო მეტიც, ბონუსად ისეთი მომსახურება, კეთილგანწყობა და პასუხისმგებლობა უნდა აგრძნობინო, რომელსაც არ ელოდება. ამ ყველაფრის ერთიანობას მოაქვს წარმატებაც.
ანნა, გაგვაცანით თქვენი ოჯახი…
ვარ დაოჯახებული და მყავს ორი არაჩვეულებრივი გოგონა. ყველაზე ძალიან რითიც ცხოვრებაში ვამაყობ, სწორედ ჩემი შვილები არიან. ისინი არიან ყველაზე დიდი მოტივატორები და ყველაზე ახლო მეგობრები ჩემთვის. ორივეს თავისი პროფესია და საქმე აქვს, მათი აზრი ყველაზე მნიშვნელოვანია ჩემთვის.
რა რჩევას მისცემდით იმ ქალებს, რომლებსაც სურთ საკუთარი საქმის წამოწყება?
უპირველესად, ვეტყვი, რომ ყველა ქალს აქვს უშრეტი რესურსი, ენერგია, შემართება და შესაძლებლობების ფართო სპექტრი. ჩემი დიდი სურვილია, ყველა ქალი იყოს დამოუკიდებელი, რაც, ვფიქრობ, მნიშვნელოვანია ჩვენი ცხოვრების ყველა ასპექტში. დაისახეთ მიზნები და იშრომეთ მათ მისაღწევად. გახსოვდეთ: ცოდნით, მონდომებითა და დისციპლინით ყველა ბარიერის გადალახვა შესაძლებელია. მინდა ყველა ქალმა უთხრას საკუთარ თავს – მე ეს შემიძლია! მე ეს შევძელი!
სამომავლო გეგმები…
სამომავლო გეგმებზე წინასწარ არ მიყვარს საუბარი, თუმცა გეტყვით, რომ „ტოპ თრეველი“ დიდ სიურპრიზს უმზადებს თავის მომხმარებლებს: როგორც ქართველ დამსვენებლებს, ისე უცხოელ ტურისტებს. აღნიშნულის დაანონსების დრო როცა მოვა, გპირდებით, პირველად თქვენი ჟურნალიდან გაიგებს საზოგადოება.
ტექსტი: სოფიო მალანია
ფოტო: ალექსეი სეროვი
