დღეს საზოგადოების ყოველდღიურობა სოციალურ ქსელებზეა მიბმული. TikTok, Instagram, YouTube და სხვა პლატფორმები არა მხოლოდ გასართობი საშუალებაა, არამედ ცოდნის, მეგობრებისა და ახალი გამოცდილებების მთავარი წყარო გახდა. სწორედ აქ დაიბადნენ ონლაინვარსკვლავები – ადამიანები, რომლებიც ყოველდღიურობას, აზრებსა და რჩევებს უზიარებენ მილიონობით მაყურებელს. თუმცა, როგორც ბევრ სხვა ახალ ფენომენს, ამასაც აქვს, როგორც დადებითი, ისე უარყოფითი მხარეები.
ფსიქოლოგები აღნიშნავენ, რომ მოზარდები განსაკუთრებით მოწყვლადები არიან ინფლუენსერების ზეგავლენის მიმართ. მუდმივი შედარებები საკუთარ თავთან, როგორც გარეგნობასა და სტილში, ისე ცხოვრებაში, ხშირად იწვევს თვითშეფასების დაქვეითებას. ასევე ზრდის სტრესს და შეიძლება გამოიწვიოს დეპრესიული ან შფოთვითი სირთულეები. გარდა ამისა, ზოგიერთი ვირუსული ვიდეო, ჩელენჯები ან დიეტური რჩევები ჯანმრთელობისთვის საფრთხეს ქმნის. ხშირად მოზარდები ვერ აცნობიერებენ, რომ რაც ეკრანზე ჩანს, ეს იდეალური რეალობა არ არის, არამედ შოუ და სელექციური კონტენტი.
მეორე მხრივ, ინფლუენსერებს შეუძლიათ პოზიტიური გავლენა მოახდინონ. მათ შორის არიან ისეთი ადამიანები, რომლებიც კრეატიულობაზე მუშაობენ, ამაღლებენ კულტურულ ცნობიერებას, ასწავლიან უცხო ენებს და სოციალური საკითხების, მაგალითად მენტალურ ჯანმრთელობასთან დაკავშირებულ თემებს და მოზარდებს ახალი ჰობის დასაწყებად ინსპირაციას აძლევენ.
მნიშვნელოვანია, რომ მშობლები, მასწავლებლები და ფსიქოლოგები აქტიურად ჩაერთონ პროცესში. მოზარდებს ასწავლონ, როგორ გაარჩიონ რეალობა და ონლაინ შოუ, რა არის ჯანსაღი შეხედულება საკუთარ ცხოვრებაზე და როგორ მართონ დრო სოციალურ ქსელებში.
მნიშვნელოვანია შევეჩვიოთ არა მხოლოდ ონლაინ კონტენტის მოხმარებას, არამედ მის გააზრებულ, შეგნებულ გამოყენებას. ონლაინვარსკვლავების გავლენა მოზარდებზე იმაზე მეტია, ვიდრე ხშირად გვგონია. სწორად მიღებული ინფორმაცია ახალგაზრდებს შესაძლებლობას აძლევს განვითარდნენ, აღმოაჩინონ საკუთარი ინტერესები და ჩაერთონ აქტიურ საზოგადოებრივ ცხოვრებაში.
