დონალდ ტრამპი არა მხოლოდ ბიზნესითა და გავლენით, არამედ თავისი ხმაურიანი და ხშირად მდიდრული ქორწილებითაც არაერთხელ აღმოჩენილა საზოგადოების ყურადღების ცენტრში. წლების განმავლობაში მის ცხოვრებაში სამი განსხვავებული ქალი გამოჩნდა, რომლებთან ქორწილმაც თავის დროზე დიდი ინტერესი და აჟიოტაჟიც გამოიწვია.
ტრამპის პირველი ცოლი ივანა მარი ზელნიჩკოვა იყო, რომელიც მის ცხოვრებაში მაშინ გამოჩნდა, როდესაც ის 30 წლის იყო. 1977 წელს ნიუ-იორკში, პატარა და მყუდრო რეფორმატულ ეკლესიაში, 28 წლის ფოტომოდელი მისი მეუღლე გახდა. ივანას ეცვა 1970-იანი წლების სტილის უბრალო თეთრი საქორწილო კაბა — მრგვალი დეკოლტეთი, შესაკრავებითა და ფრიალა მკლავებით. მის ლუქს ამშვენებდა ყვავილებით გაფორმებული ფატა.
ქორწილი ტრამპის სტანდარტებით საკმაოდ მოკრძალებული იყო, თუმცა განქორწინება ძალიან ძვირი დაუჯდა: 1990 წელს მან ივანას 25 მილიონი დოლარი, ასევე გრინვიჩში მდებარე სასახლე და Trump Plaza-ს აპარტამენტები გადასცა. მათი დაშორების მიზეზი ტრამპის რომანი გახდა მსახიობ მარლა მეიპლზთან. ამ ქორწინებიდან ტრამპს 3 შვილი: დონ ჯუნიორი, ივანკა და ერიკი ჰყავს.
ტრამპის მეორე ქორწილი ნამდვილ სეკულარულ მოვლენად იქცა. 1993 წლის ზამთარში, 47 წლის ასაკში, მან ნიუ-იორკის Plaza Hotel-ის მთავარ საბანკეტო დარბაზში 29 წლის მსახიობ მარლა მეიპლზზე იქორწინა. მდიდრულ ცერემონიას ათასზე მეტი სტუმარი ესწრებოდა.
პატარძალი ბრწყინვალედ გამოიყურებოდა: მას ეცვა ამერიკელი დიზაინერის კაროლინა ჰერერას საქორწილო კაბა, მოცულობითი ფატა და 325 ბრილიანტით გაფორმებული ტიარა, რომლის ღირებულება 2 მილიონ დოლარს აღწევდა (ტიარა ნაქირავები იყო). მარლას თაიგული თეთრი ვარდებისგან შედგებოდა, ხოლო ქორწილის ცერემონია ტრამპს დაახლოებით 1 მილიონი დოლარი დაუჯდა. ნიშნობის ბეჭედი 110 000 დოლარი ღირდა, ხოლო კაბა — 15 000 დოლარზე მეტი. თუმცა ოთხი წლის შემდეგ ეს ქორწინებაც დასრულდა. მეორე ქორწინებიდან ტრამპს ერთი შვილი- ტიფანი ტრამპი ჰყავს.
მესამედ დონალდ ტრამპი 2005 წელს დაქორწინდა 34 წლის მელანია კნავსზე. ცერემონია ტრამპის საკუთრებაში არსებულ რეზიდენციაში Mar-a-Lago გაიმართა. ეს ქორწილიც ისეთივე მდიდრული იყო, როგორც წინა.
მელანია განსაკუთრებულად შთამბეჭდავად გამოიყურებოდა ფრანგული მოდის სახლის დიორის შეკვეთით შექმნილ საქორწილო კაბაში, რომელსაც ოთხმეტრიანი შლეიფი და ხუთმეტრიანი ფატა ამშვენებდა. კაბა 22 კილოგრამს იწონიდა და მისი ღირებულება დაახლოებით 100 000 დოლარი იყო. ბოლო, ამჟამინდელი ქორწინებიდან დონალდს და მელანიას 1 შვილი – ბარონ ტრამპი ჰყავთ.
