სოხუმიდან პარიზამდე განვლილი გზა, დევნილობის ტკივილი და ემიგრანტობა – ეს ყველაფერი შემოქმედებაში გამოხატა. ქართველი დიზაინერი, დემნა გვასალია იტალიური მოდის სახლის, Gucci – ის შემოქმედებით დირექტორად დაინიშნა, მაგრამ სანამ მისი ცხოვრების ახალ ეპიზოდზე გადავალთ, დავიწყოთ იქიდან, საიდანაც ყველაფერი დაიწყო.
1981 წელს სოხუმში დაიბადა. მას შემდეგ, რაც 1990 წელს რუსეთმა აფხაზეთის ოკუპაცია მოახდინა, დემნასა და მისი ოჯახის წევრებს საცხოვრებლის იძულებით შეცვლა მოუწიათ.
„ომი და მიგრაცია ჩემი მემკვიდრეობის ნაწილია. ეს არასდროს გაქრება და არც უნდა გაქრეს. ის მეხმარება დავინახო, რას განიცდის ადამიანი, რომელმაც ყველაფერი დაკარგა“ – Demna Gvasalia for Vogue (2022).
საზღვარგარეთ წასვლამდე დემნამ თბილისის სახელმწიფო უნივერსიტეტის ეკონომიკის ფაკულტეტი დაამთავრა და მცირე ხნით ჟურნალისტად “საქართველოს ტელევიზიაშიც” მუშაობდა. მაგისტრატურა ეკონომიკის მიმართულებით უნდა გაეგრძელებინა, მაგრამ მისი ოჯახი საცხოვრებლად გერმანიაში გადავიდა და დიზაინერმა გადაწყვიტა ანტვერპენში, ხელოვნების აკადემიაში ჩაებარებინა. პირველი კურსის ბოლოს 70 სტუდენტიდან 16 რჩეულში დატოვეს, ხოლო სწავლის დასრულების შემდეგ, ვალტერ ვან ბეირენდონკმა, რომელიც აკადემიის რექტორი და დემნას პროფესორი იყო, მას თავის ბრენდში, მამაკაცის ტანსაცმლის დიზაინერობა შესთავაზა. გვასალია ბელგიაში, ბეირენდოკთან წელიწადნახევარი მუშაობდა. შემდეგ საკუთარი ნამუშევრები საფრანგეთში გააგზავნა და პარიზში მიიწვიეს, სადაც Maison Margiela – ში განაგრძო კარიერა.
„მარჯიელაში მუშაობა აკადემიის გაგრძელება იყო. იქ მივხვდი, რომ ჩემი მიმართულება ნივთების ახლიდან გადააზრებას და იმაზე ფიქრს წარმოადგენდა, როგორ შეიძლება ყოველდღიურ საგნებს ახალი სიცოცხლე მივცეთ“ – Interview with Highsnobiety, 2016
2013 წელს ის Louis Vuitton – ში გადავიდა, სადაც ნიკოლა ჟესქიერთან მუშაობდა.
Vetements
2014 წელს ძმასთან, გურამ გვასალიასთან ერთად შექმნა ბრენდი Vetements – ეს იყო ირონიული განაცხადი და სტანდარტების ამოტრიალება. მისმა DHL მაისურმა კრიტიკოსები და ქუჩის სტილის მიმდევრები ერთ სივრცეში მოაქცია.
2019 წელს დემნამ Vetments დატოვა, რათა მთელი ყურადღება ბალენსიაგასთვის დაეთმო, ხოლო ბრენდის კრეატიული დირექტორი გურამ გვასალია გახდა.
ბალენსიაგა
2015 წელს ბალენსიაგას კრეატიულ დირექტორად დაინიშნა, რომელიც ავანგარდულ და პროვოკაციულ ბრენდად გარდაქმნა. გააერთიანა მაღალი მოდა (haute couture) და ქუჩის სტილი (streetwear). 2021 წელს haute couture კოლექცია დააბრუნა.
2022 წლის შემოდგომა/ზამთრის კოლექციის მთავარ თემად მიგრაცია, იძულებითი გადაადგილებისა და ომის თემები იყო. შოუზე მოდელები გადიოდნენ ყინულზე, ხელში ეკავათ ჩანთები და მათი ჩაცმულობა სიმბოლურად დემნას პირადი ისტორიის ხელოვნებაში გადმოტანას გულისხმობდა.
დემნამ მოდა წარმოაჩინა, როგორც სოციალური სარკე და მისი მეშვეობით ბალენსიაგა ახალი სახით დაიბადა სამყაროში
„დავიბრუნე თავი, გავთავისუფლდი შიშებისგან. აღარ მაინტერესებს, რას იტყვიან სხვები – მხოლოდ ის მაინტერესებს, ვის ვარ მე“ – The Cut, 2021
პირადი ცხოვრება
პირად ცხოვრებაზე ხშირად არ საუბრობს, თუმცა ცნობილია მისი ურთიერთობა მომღერალ ლოიკ გომეზთან. ისინი 2016 წელს დაინიშნნენ და ერთი წლის შემდეგ დაქორწინდნენ. პირველად „ვეტმანის“ შოუს წინ შეხვდნენ, სადაც დემნამ 2016 წლის ჩვენებისთვის სიმღერის ჩაწერა სთხოვა. ლოიკი BFRND-ის სასცენო სახელით მოღვაწეობს და ძალიან წარმატებული კარიერა აქვს. მომღერალი ხშირად ქმნის მუსიკას დემნას ჩვენებებისთვის.
შეგახსენებთ, რომ დემნა გვასალია 2025 წელს იტალიური მოდის სახლის, Gucci-ის შემოქმედებით დირექტორად დაინიშნა.
მილანის მოდის კვირეულზე დიზაინერმა სადებიუტო კოლექცია, სახელწოდებით – La Famiglia წარადგინა, რომელიც 38 ლუქს მოიცავდა და დასავლური გამოცემების მიერ, Gucci-ის „ახალი ეპოქის დასაწყისად“ შეფასდა.
დემნას სადებიუტო ჩვენების შემდეგ, ანალიტიკურმა კომპანია Placer.ai-მ Gucci-ს მაღაზიებში მოთხოვნის მნიშვნელოვანი ზრდა დააფიქსირა. მაგალითად, ლოს-ანჯელესის მაღაზიებში წინა კვირასთან შედარებით, მოთხოვნა 53%-ით, ნიუ-იორკში კი 19%-ით გაიზარდა.
ექსპერტები აღნიშნავენ, რომ Gucci-ს ახალი კომერციული მიდგომა ბრენდს ახალგაზრდა, ნაკლებად შეძლებული მომხმარებლების მოზიდვაში დაეხმარება.
„ძალიან მიხარია, რომ Gucci-ის ოჯახს შევუერთდი, ბრენდს, რომელსაც დიდი ხანია ვეთაყვანები“ – ამბობს დიზაინერი.
ასევე დაგაინტერესებთ
#OK! ისტორიაში პირველად – დემნა გვასალია Times-ის 100 ყველაზე გავლენიან ადამიანს შორისაა
