უკვე წლებია OK! ბათუმის გუნდს წარმოვადგენ – პასუხისმგებლობით, ერთგულებითა და უდიდესი სითბოთი. ამ გზამ უამრავ, სხვადასხვა სფეროში წარმატებულ, პროფესიონალ ადამიანებთან დამამეგობრა, რომლებიც თავიანთ ენერგიასა და მიღწევებს ჩვენს ქალაქს, რეგიონს და სამშობლოს – საქართველოს უძღვნიან. მათთან საუბრისას ყოველთვის ვსვამ ერთ კითხვას: რას ნიშნავს ბათუმი მათთვის, რა შთაგონებას სძენს ეს ქალაქი მათ საქმიანობას, შემოქმედებას…
დღეს კი, ვფიქრობ, დადგა დრო ჩემს წილ ბათუმზე გესაუბროთ…
ჩემი ბათუმი სიხარულის ქალაქია, მაგრამ სევდისაც… ისეთი ქალაქია, შენი გულის რიტმს რომ ერგება… თუ გაღიმებული გადიხარ სახლიდან – მზეს გაგაყოლებს საგზლად, თუ გატკინეს, წვიმა გამოგყვება, რომ შენი ცრემლები შეუმჩნევლად გადარეცხოს, გაგათავისუფლოს…
ბათუმს შეუძლია იყოს ფერადი ფოიერვერკი ადამიანების ღიმილში, საოცარი დაისების სიჩუმეში, ყვავილების არომატში და მუსიკის იმ ნოტებში, რომელიც თან სდევს მის ქუჩებს…
ასეთია ჩემი ქალაქი „თუ შეგიყვარა, სულსაც გაატან და თუ დასჭირდა თავს გაიმეტებ“…
ადამიანებსაც აქ სხვა ენერგეტიკა აქვთ – ზღვას ვადანაშაულებ…
დიდი ენერგეტიკული ველია ბათუმი, რომელიც თითქოს არ გაძლევს უფლებას იყო უემოციოდ, სევდიანად… ზღვა აქ ყველაფრის თანაზიარია: შენი ბედნიერების, შენი უმწეობის, შენი ტკივილის, შენი ვერასრულებული ნატვრების… ის მუდამ გიბრუნებს ძალას, გამოუთქმელს, თავგადასავლებით სავსეს, ძალას, რომელიც მხოლოდ თავისუფლებას და ახალ გზებს გპირდება…
ბათუმი შთაგონების ქალაქია…
ქალაქი, რომელიც ყოველი დაცემისას ხელს გამოგიწვდის და ფეხზე წამოგაყენებს. გიბიძგებს – საკუთარ თავში ახალი ფერები, ახალი სიმძლავრეები, ახალი შესაძლებლობები აღმოაჩინო. და, თუ ოდესმე დაიკარგები, ისევ ზღვა გაჩვენებს სწორ გზას, თავისი ტალღებით, თავისი სუნთქვით…
მინდა, ამ ქალაქშიც და მთელ ქვეყანაში უფრო მკვეთრად ისმოდეს ქალის ხმა, ქალის, რომელიც აღარ მალავს თავის ძალას, აღარ აჩუმებს საკუთარ სურვილებს. მინდა, ქალებს მეტი შესაძლებლობა ჰქონდეთ, მეტი თავისუფლება, მეტი სივრცე საკუთარი ძალის გამოსავლენად. მინდა, ერთმანეთს ვაძლიერებდეთ, მეტად ვუჭერდეთ მხარს და გვესმოდეს, რომ გვერდში დგომა ყველაზე დიდი გამარჯვებაა.
ქალი, რომელიც საკუთარი ძალის კვალს უტოვებს სამყაროს, ზღვას ჰგავს, შეიძლება ჩუმად მიდიოდეს, მაგრამ, როცა ხმაურს იწყებს, მისი ძალა შეუჩერებელია…
ზღვისხელა სიხარული, ტალღასავით თავისუფლება და სიყვარულით სავსე ენერგია – სწორედ ეს არის ის, რაც ქალის ძალას ქმნის.
და ბოლოს… ეს ქალაქი მაძლევს უდიდეს შთაგონებას, ვიყო ძლიერი ქალი, ვთქვა ჩემი სიტყვა და ვატარებდე იმ ხმაურს, რომელიც მხოლოდ სიყვარულისგან, თანადგომისგან და თავისუფლებისგან იბადება…
სიყვარულით: ნანა აბულაძე
