ქველმოქმედება ის სფეროა, რომელსაც დიდი ბრიტანეთის სამეფო ოჯახში ბავშვობიდან აჩვევენ. პრინცი უილიამი 11 წლის იყო, როდესაც დედამ, პრინცესა დიანამ ლონდონის საქველმოქმედო ორგანიზაციაში, რომელსაც თავად ეხმარებოდა, პირველად მიიყვანა. მას შემდეგ, პრინცი უილიამისთვის უსახლკაროთა და სოციალურად დაუცველთა ყველაზე დიდ რესურს-ცენტრში – The Passage-ში სადღესასწაულო სადილის მომზადება ყოველწლიურ ტრადიციად იქცა. წელს ამ ტრადიციას ტახტის მემკვიდრე, 12 წლის პრინცი ჯორჯიც შეუერთდა.
თეთრ წინსაფარში გამოწყობილი პრინცი შეფ-მზარეულს საშობაო სადილის მომზადებაში დაეხმარა, შემდეგ კი მამასთან, პრინც უილიამთან ერთად, სადღესასწაულო ნაძვის ხე მორთო. ამ მოვლენის ამსახველი ამაღელვებელი კადრები ქეითისა და უილიამის ოფიციალურ სოციალურ ქსელებში გამოქვეყნდა.
მათ შორის მოხვდა ერთი განსაკუთრებული ფოტო – სტუმრების წიგნის ფურცელი, რომელსაც სამი თაობა აწერს ხელს: 1993 წლის დეკემბერში – პრინცესა დიანა, იმავე წლის ოქტომბერში – პრინცი უილიამი, ახლა კი პრინცი ჯორჯი.
2024 წლის დოკუმენტურ ფილმში „პრინცი უილიამი: ჩვენ შეგვიძლია დავასრულოთ უსახლკარობა“, უელსის 43 წლის პრინცი იხსენებდა, თუ როგორ შთააგონებდა დედა თავისი გულუხვობით:
„მანამდე ასეთ ადგილზე არასდროს ვყოფილვარ და ცოტას ვნერვიულობდი, რადგან არ ვიცოდი, რა დამხვდებოდა. დედა, როგორც ყოველთვის, ცდილობდა, რომ ყველას თავი თავისუფლად ეგრძნო, იცინოდა და ყველას ეხუმრებოდა. მახსოვს, მაშინ გავიფიქრე – თუ ამ ხალხს სახლი არ აქვს, ალბათ ყველა ძალიან სევდიანია, მაგრამ იქ საოცრად მხიარული ატმოსფერო სუფევდა“.
შემდეგ, რაც პრინცი უილიამი The Passage-ს პირველად ეწვია, ამ ადგილს მის საზოგადოებრივ ცხოვრებაში მთავარი ადგილი უჭირავს. 2019 წელს ის ამ ორგანიზაციის სამეფო მფარველი ოფიციალურად გახდა.
ასევე დაგაინტერესებთ
