ჰოლივუდის მსახიობმა, ანჯელინა ჯოლიმ ჟურნალ Time France-ის გარეკანისთვის გაიხადა და 2013 წელს ჩატარებული პროფილაქტიკური მასტექტომიისგან დატოვებული იარები გამოაჩინა. ჟურნალთან ინტერვიუში 50 წლის მსახიობმა თავის ახალ ფილმზე ისაუბრა, რომელშიც მკერდის კიბოთი დაავადებული რეჟისორის როლს ასრულებს.
„ამ იარებს უამრავ ქალს ვუზიარებ, რომელიც მიყვარს. ძალიან ამაღელვებელია, როდესაც ვხედავ, რომ სხვა ქალები თავიანთ იარებს მიზიარებენ. მინდოდა მათთან ერთად ვყოფილიყავი“, – განმარტა მსახიობმა თავისი გადაწყვეტილება.
ჯოლიმ ისაუბრა ფილმზე „Couture“, რომელშიც მკერდის კიბოთი დაავადებული ამერიკელი რეჟისორის როლს ასრულებს. მისი თქმით, ფილმის სცენარი მისთვის „პირადი ისტორია“ იყო, რადგან მანაც უამრავი გაჭირვება, ავადმყოფობა და ტკივილი ნახა.
ჯოლიმ ასევე აღიარა, რომ გადაღებების დროს დედის ფერფლის შემცველ სამკაულებს ატარებდა. ცნობისთვის, ანჯელინას დედა, მარშელინ ბერტრანი დიდი ხნის განმავლობაში საკვერცხეების კიბოს ებრძოდა და 56 წლის ასაკში გარდაიცვალა.
დედის ამბავმა ანჯელინას ორმაგი მასტექტომიის პრევენციული ოპერაციის ჩატარებისკენ უბიძგა, რასაც საკვერცხეების და ფალოპის მილების ამოკვეთა მოჰყვა. თითოეული ოპერაციის შემდეგ, მსახიობი თავისი გამოცდილების შესახებ The New York Times-ის სვეტებში ვრცლად წერდა.
„ადამიანებს საკუთარ გამოცდილებას ინფორმირებული არჩევანის წასახალისებლად ვუზიარებდი. ჯანდაცვის გადაწყვეტილებები უნდა იყოს პირადი და ქალებს ინფორმაცია და მხარდაჭერა უნდა ჰქონდეთ, რომელიც ამ გადაწყვეტილებების მისაღებად სჭირდებათ. სკრინინგსა და მკურნალობაზე წვდომა არ უნდა იყოს დამოკიდებული ფინანსურ რესურსებზე ან საცხოვრებელ ადგილზე“, – განუცხადა ჯოლიმ ჟურნალს.
ანჯელინა ჯოლიმ, რომელიც მსოფლიოში ერთ-ერთი ყველაზე პოპულარული ვარსკვლავია, 2013 წელს მასტექტომიის ოპერაციის შესახებ განაცხადა, რითაც ძუძუს კიბოს დროული პრევენციისთვის სკრინინგის აუცილებლობაზე ყურადღება გაამახვილა. ექსპერტების თქმით, მსახიობის გადაწყვეტილებას საზოგადოებაზე უზარმაზარი გავლენა ჰქონდა, რასაც „ანჯელინას ეფექტს“ უწოდებენ – საფრანგეთში ამას სკრინინგების 20%-ით ზრდა მოჰყვა.
ანჯელინა ჯოლი სამჯერ იყო დაქორწინებული. მისი ბოლო ქმარი ბრედ პიტი იყო, რომელთანაც ექვსი შვილი (მათ შორის სამი ნაშვილები)ჰყავს. წყვილი ერთმანეთს 2024 წლის დეკემბერში, ხანგრძლივი დავის ფონზე დასცილდა.
ასევე დაგაინტერესებთ
