იტალიური წარმოშობის ამერიკელი კინორეჟისორი, პროდიუსერი და სცენარისტი ფრენსის ფორდ კოპოლა, რომელიც ცნობილია ტრილოგიით „ნათლია“ და ფილმით „აპოკალიფსი დღეს“, ფინანსურ კრიზისს ებრძვის. მას შემდეგ, რაც მისმა ახალმა ფილმმა კინოგაქირავებაში მოსალოდნელზე ცხრაჯერ ნაკლები შემოსავალი მიიღო, ლეგენდარული რეჟისორი იძულებული გახდა, რომ ბელიზში, ერთ-ერთ კუნძულზე მდებარე უძრავი ქონება გაეყიდა.
„მეგალოპოლისის“ შექმნაზე კოპოლამ 120 მილიონ დოლარზე მეტი დახარჯა, თუმცა ფილმს მაყურებელიცა და კრიტიკოსებიც გულგრილად შეხვდნენ. კინოგაქირავებამ მხოლოდ 14,4 მილიონი დოლარი მოიტანა, ამიტომ ახლა რეჟისორი ცდილობს, მიღებული ზარალი როგორმე აანაზღაუროს.
როგორც The Hollywood Reporter წერს, წარსულში კოპოლა ამ ადგილზე ხშირად ისვენებდა, თუმცა ბოლო ცხრა წლის განმავლობაში ქონებას სხვებზე აქირავებდა. კუნძული, რომლის ფართობი ერთ ჰექტარს შეადგენს, ამერიკელ იურისტს ეკუთვნის. კუნძულზე მდებარე სამი სახლიდან ორი სახლი და ნავმისადგომი თავად კოპოლამ ააშენა.
„ბატონმა კოპოლამ ძალიან მოიწყინა, რადგან კუნძულზე ყოფნის ვადა დასრულდა. ის ძალიან აფასებდა დროს, რომელიც ამ სამოთხის მსგავს კუნძულზე გაატარა. მისთვის ეს განსაკუთრებული ადგილი იყო,“ — განაცხადა Corcoran Group-ის წარმომადგენელმა პიტერ მაკლინმა გამოცემასთან საუბარში.
სახლის ახალი მფლობელი კუნძულზე დამატებითი ინფრასტრუქტურის მშენებლობას და კურორტის მოწყობას გეგმავს. გარიგების თანხამ 1,8 მილიონი დოლარი შეადგინა.
The New York Times-თან ინტერვიუში კოპოლამ განაცხადა, რომ პირადი ნივთების ნაწილის გაყიდვასაც გეგმავს, რომ მუშაობის გაგრძელება შეძლოს. უახლოეს ხანებში Phillips-ის აუქციონზე მისი მაჯის საათების კოლექციას გამოიტანენ. მთავარი ლოტი იქნება მოდელი, რომელიც რეჟისორმა 2014 წელს, საათების ცნობილ ბრენდ F.P.Journe-თან ერთად შექმნა. მსგავსი ნიმუში 2021 წელს საქველმოქმედო აუქციონზე 5 მილიონ დოლარად გაიყიდა. ვარაუდობენ, რომ დანარჩენი კოლექციის გაყიდვით კოპოლა 163 000-დან 324 000 დოლარამდე მიიღებს.
ფინანსური სირთულეების მიუხედავად, რეჟისორი იმედს არ კარგავს, რომ საბოლოოდ, „მეგალოპოლისი“ მის შექმნაზე დახარჯულ თანხას ამოიღებს.
„ჩემმა ბევრმა ფილმმა ხარჯები დროთა განმავლობაში დაფარა“ — აღნიშნა მან The New York Times-თან საუბარში და თავისი ლეგენდარული ფილმი „აპოკალიფსი დღეს“ გაიხსენა. რეჟისორი მაშინაც დიდ ვალებში აღმოჩნდა, თუმცა შემდეგი ათწლეულების მანძილზე ფილმმა 150 მილიონ დოლარზე მეტი შემოსავალი მოუტანა.
ფრენსის ფორდ კოპოლა კარიერის განმავლობაში ორჯერ გახდა კანის კინოფესტივალის ტრიუმფატორი, მოპოვებული აქვს 5 ოსკარისა და 5 ოქროს გლობუსის ჯილდო.
ასევე დაგაინტერესებთ
