სოციალურ ქსელებში უელსის პრინცესას ახალი ფოტოები გამოჩნდა – ჯანმრთელობის პრობლემების მიუხედავად, ქეით მიდლტონი ბავშვთა განვითარების ცენტრში საქველმოქმედო ღონისძიებას ეწვია. კენსინგტონის სასახლის მიერ გავრცელებული ინფორმაციით, ამჟამად უელსის პრინცესას წონა დაახლოებით 41 კილოგრამს შეადგენს და ფოტოებიც ადასტურებს, რომ ქეითი ძალიან გამხდარია.
გავრცელებული ინფორმაციით, სამეფო ოჯახის წევრი ბავშვთა განვითარების ცენტრს საქველმოქმედო ვიზიტით ეწვია. საქველმოქმედო ორგანიზაციასთან ერთად მან ვიდეოების სერია მოამზადა, რომელიც სპეციალისტებს ოჯახების მხარდაჭერაში დაეხმარება. ერთ-ერთ ვიდეოში, რომელიც ცენტრის სოციალურ ქსელში გავრცელდა, ქეითი აღნიშნავს, რომ ადამიანის ცხოვრების პირველი ხუთი წელი უნიკალურ შესაძლებლობას იძლევა, რომ საზოგადოება უკეთესობისკენ შევცვალოთ.
პრინცესა ანიმაციური ფილმების შექმნის პროცესშიც აქტიურად მონაწილეობდა. მან ორ ილუსტრატორთან ერთად გარკვეული დრო გაატარა და პროექტზე მომუშავე ახალგაზრდა სპეციალისტები გაიცნო. ამ შეხვედრებზე ქეითი Veronica Beard–ის მწვანე ფერის კოსტიუმში გამოჩნდა.
გამოცემა Radar Onlin ქეით მიდლტონის შესახებ გავრცელებულ ბოლო ცნობებში აღნიშნავს, რომ პრინცესა წონის მკვეთრი კლებით იტანჯება, რაც არა მხოლოდ თაყვანისმცემლებში, არამედ სამეფო ოჯახშიც შეშფოთებას იწვევს.
ვარაუდობენ, რომ წონის ასეთი კლება შესაძლოა, ონკოლოგიური დაავადების მკურნალობის დროს გადატანილ ქიმიოთერაპიას უკავშირდება. როგორც ექიმმა გეიბ მირკინმა Radar Online-თან ინტერვიუში აღნიშნა, პრინცესას სიგამხდრე შეიძლება მიუთითებდეს იმაზე, რომ მკურნალობაზე ცუდი რეაქცია ჰქონდა.
„წონის მნიშვნელოვანი კლება შესაძლოა, ქიმიოთერაპიით, არასათანადო კვებით ან წარუმატებელი მკურნალობით იყოს გამოწვეული“ – აღნიშნა მირკინმა.
შეგახსენებთ, რომ ქეით მიდლტონის დიაგნოზის შესახებ საზოგადოებამ 2024 წლის 22 მარტს შეიტყო, როდესაც პრინცესამ ოფიციალური ვიდეომიმართვა გამოაქვეყნა. უელსის პრინცესამ საკუთარი დიაგნოზის შესახებ ვიდეომიმართვის გამოქვეყნებამდე სამი თვით ადრე გაიგო.
სიმსივნის დიაგნოზის გამოცხადებისა და 2024 წლის იანვარში მუცლის ღრუს ოპერაციის შემდეგ, პრინცესას მილიონობით ადამიანი გულშემატკივრობდა. 2024 წლის განმავლობაში პრინცესა მკურნალობის კურსს გადიოდა, რის გამოც საჯარო აქტივობებისგან თავს იკავებდა. ქეითმა ქიმიოთერაპიის კურსი 2024 წლის ბოლოს დაასრულა, 2025 წლის იანვარში კი ცნობილი გახდა, რომ პრინცესას დაავადება რემისიის ფაზაში გადავიდა. გაზაფხულიდან ქეით მიდლტონი საჯარო ცხოვრებას დაუბრუნდა და ბოლო ინფორმაციით, გამოჯანმრთელობის პროცესი გრძელდება.
