წარმოგიდგენთ რუბრიკა OK! მენეჯერის სტუმარს თამარ ფილიშვილს, რომელსაც მისი მიზნისთვის სწრაფვა არასოდეს შეუწყვეტავს, მიუხედავად სირთულეებისა მუდმივად იბრძვის, რათა დაწყებული საქმე ბოლომდე მიიყვანოს. როგორც ჩვენთან საუბრისას აღნიშნა, აუცილებელია იშრომო იმისთვის, რომ საკუთარი თავის საუკეთესო ვერსია შექმნა.
მაშ ასე, გაიცანით ჩვენი რუბრიკის სტუმარი უფრო ახლოს.
გაგვეცნით და გვიამბეთ თქვენი საქმიანობის შესახებ.
მე გახლავართ თამარა ფილიშვილი, ძირითადი პროფესიით ზოგადი პროფილის ექიმი, ხოლო მეორადი პროფესიით ჰოტელიერი. დაახლოებით 15 წელია სასტუმრო ბიზნესში ვმოღვაწეობ როგორც საქართველოში, ასევე საქართველოს ფარგლებს მიღმა.
გზა, რომელიც დღევანდელ დღემდე გაიარეთ. თქვენი სამუშაო გამოცდილებების შესახებ გვიამბეთ.
მედიცინაში ბაკალავრის ხარისხის მიღების შემდგომ, ვერ შევძელი მაგისტრატურის გაგრძელება. გადავწყვიტე დროებით ისეთ საქმიანობაში მომესინჯა თავი, სადაც ჩემი უნარებით მოკლე დროში შევძლებდი სწავლისთვის საჭირო თანხის დაგროვებას. მოცემულ პერიოდში სასტუმროში მუშაობა პრესტიჟულ საქმიანობად არ ითვლებოდა, თუმცა სხვა დანარჩენ სფეროებთან შედარებით, უფრო მაღალანაზღაურებადი იყო. გამოგიტყდებით, ცხოვრების იმ ეტაპზე ჩემს თვითმიზანს სასტუმროში მუშაობის გაგრძელება არ წარმოადგენდა. ყოველთვის თვალწინ მედგა თეთრ ხალათიანი თამარა და ეს სურათი ჩემი შთაგონება გახდა. სასტუმრო ბიზნესში სრულიად ახალბედა, ვცდილობდი, ახალი საქმიანობისთვის ამეღო ალღო, გამომეყენებინა ის უნარები, რაც სამედიცინოზე სწავლამ ჩამომიყალიბა – თვითდისციპლინა, სიმშვიდე, მოთმინება, მოსმენის უნარი და ემპათია. ვცდილობდი მედგრად და მტკიცედ გავმკლავებოდი სხვადასხვა ცხოვრებისეულ გამოწვევებსა თუ სამსახურეობრივ სირთულეებს, ვინაიდან ეს გზა საბოლოო მიზანთან – თეთრ ხალათთან მაახლოებდა. ამ მიზანთან ყველაზე ახლოს მყოფმა კი აღმოვაჩინე, რამდენად ღრმად მოიკიდა ახალმა საქმიანობამ ჩემს გულსა და გონებაში ფეხი. აღმოვაჩინე, რომ მე სამყაროს იმ უმცირეს ნაწილში ჩავეწერე, ვისთვისაც სამსახური მხოლოდ ფულის გამომუშავების წყარო კი არა, ერთგვარი ჰობია, საყვარელი საქმიანობაა, სადაც თავს კომფორტულად და სასიამოვნოდ ვრძნობ. გავაცნობიერე რამდენად ჩემი იყო ის, რასაც ვაკეთებდი და იმასაც მივხვდი, რომ ერთ დღეს აუცილებლად გავხდებოდი წარმატებული.
როგორ ფიქრობთ რა არის მთავარი წარმატების მისაღწევად? როგორ ვიპოვოთ საყვარელი საქმე?
ჩემი მოკრძალებული აზრით, წარმატების მიღწევისთვის მნიშვნელოვანი კომპონენტებია: მიზანსწრაფვა, ნებისყოფა და შრომისმოყვარეობა. ერთია ადამიანს გააჩნდეს მიზანი და მეორეა – მისი შესრულებისკენ ისწრაფოდეს. ასევე, გააჩნდეს გარკვეული გეგმა – დაახლოებით როგორ და რა პერიოდში შეძლებს მიზნის განხორციელებას. ნებისყოფა, რომ ბოლომდე მიიყვანო დაწყებული, მიუხედავად სირთულეებისა. შრომისმოყვარეობა – იშრომო მეტი, ვიდრე დანარჩენებმა… იშრომო იმისთვის, რომ საკუთარი თავის საუკეთესო ვერსია შექმნა.
რა გაძლევთ მოტივაციას?
ბავშვობიდან მამაჩემი მაჩვევდა იმას, რომ არასოდეს არაფერში ვყოფილიყავი საშუალო ან უბრალოდ კარგი. მეუბნებოდა, რომ წარმატების მისაღწევად საუკეთესო უნდა ვყოფილიყავი. ყოველთვის ძალიან ბევრს ითხოვდა ჩემგან და მაგრძნობინებდა, რომ განსაკუთრებული ვიყავი, რომ ყველაფერი შემეძლო, რასაც მოვინდომებდი. 15 წლის წინ მამა ჯანმრთელობის ძლიერი დაზიანების გამო ნახევრად პარალიზებული აღმოჩნდა, ხოლო რამოდენიმე თვის წინ გარდაიცვალა. მთელი ჩემი შეგნებული ცხოვრება ყოველთვის მას ვუძღვნიდი და ვუძღვნი ჩემს მცირე თუ დიდ წარმატებებს, ვინაიდან მე ასეთი სწორედ მის გამო ვარ.
რას ურჩევდი მათ, ვინც ახლა იწყებენ კარიერას?
პირველივე წარუმატებლობაზე ხელი არ ჩაიქნიონ. მიღწეულით არ დაკმაყოფილდნენ. თვითკმაყოფილება ან პირიქით, გადაჭარბებული თვითკრიტიკა ხელს უშლის კარიერულ წინსვლას. მიუხედავად იმისა, რა საქმიანობას ეწევი, აუცილებელია მუდმივად ვითარდებოდე. არაა აუცილებელი უმაღლესი აკადემიური განათლება გქონდეს დარგში. დღეს დღეობით ცოდნის მიღების უამრავი მეთოდი არსებობს: პროფესიული სასწავლებლები, სასერტიფიკატო პროგრამები, ონლაინ სწავლებები და სხვა.
როგორია თქვენი მიზნები და სამომავლო გეგმები?
სულ ცოტა ხანში შეერთებულ შტატებში გავივლი სპეციალურ სემინარებს ჩემს დარგში. რაც შეეხება გრძელ ვადიან გეგმებს, საკუთარ სასტუმროს გავხსნი აუცილებლად.
