საკონდიტრო „ბულანჟერია ელლე“ ჯერ მხოლოდ 5 თვეა, რაც ქუთაისში გამოჩნდა და უკვე შეძლო მიმზიდველი გარემოსა და დესერტების წყალობით მომხმარებლისთვის დაუვიწყარი შთაბეჭდილება შეექმნა. როგორც დამფუძნებელმა, ელენე ჯანაშიამ ჩვენი ჟურნალის მკითხველს უამბო, პირადი სურვილების რეალურ მიზნამდე მიღწევის პროცესში, მასთან ერთად ოჯახის თითოეული წევრი მონაწილეობდა, თავად ქმნიდნენ იდეას და განსაკუთრებულ, ემოციურ მნიშვნელობას ანიჭებდნენ მას. „ბულანჟერია ელლე“ სამომავლოდ მომხმარებელს ბევრ სიახლესა და სტაბილურობას ჰპირდება.
„ბულანჟერია ელლეს“ შექმნის ისტორია
სულ მინდოდა საკუთარი, პატარა ვარდისფერი კაფე-საკონდიტრო მქონოდა, სადაც ყველაფერი ვარდისფერი იქნებოდა. ერთ დღეს, როცა მთელი ოჯახი მანქანით მივდიოდით, ხმამაღლა ვფიქრობდი, თუ როგორი ფრანგული საკონდიტრო მინდოდა მქონოდა. ჩემი ეს ფიქრები ჩემმა შვილმა ფურცელზე გადაიტანა და ზუსტად ისეთი დახატა, როგორზეც ვოცნებობდი. სწორედ ჩემი გოგოა ბულანჟერიის ინტერიერის დიზაინერი. მაშინ სკოლის მოსწავლე იყო, ახლა კი სამხატვრო აკადემიის სტუდენტია და არქიტექტურულზე სწავლობს. მთელი ოჯახი ვიყავით ჩართული ამ პროცესში, ვარდისფერი კედლების ოქროსფერი დეტალები და დეკორაციები ჩემმა შვილებმა საკუთარი ხელებით მოხატეს. ხელოსნებთან ერთად მე და ჩემი მეუღლეც აქტიურად ვმუშაობდით.ძალიან მინდოდა ჩემი სახელი ყოფილიყო სახელწოდებაშიც. „ბულანჟერია boulangerie ელლე“ ქართულად ჟღერს, როგორც ელლეს საცხობი.
რას სთავაზობთ მომხმარებლებს?
„ბულანჟერია ელლე“ მომხმარებელს სთავაზობს პრემიუმ ხარისხს, რაც აერთიანებს ფრანგულ და ევროპულ დესერტებს, გვაქვს უამრავი სახეობის მუსის დესერტი. ასევე, უგემრიელესი კრუასანები. ვმუშაობდი ერთ-ერთ ქსელურ სკონდიტროში შეფკონდიტერად. ასევე, ვეხმარები სხვადასხვა ობიექტს კვალიფიციური კადრის გადამზადებაში.
გარემო, რომელიც ადგილზე მოსულ სტუმრებს ხვდებათ.
ჩვენი ობიექტი ქუთაისის უძველეს უბანში მდებარეობს, შესაბამისად, ძალიან ბევრი ტურისტის ყურადღების ცენტრშიც ექცევა. გარემო იმდენად მომხიბვლელია, ერთნაირად იზიდავს უცხოელსაც და ადგილობრივებსაც, ამიტომ გვერდს ვერ უვლიან ბულანჟერიას და მაშინვე გვსტუმრობენ, გარემოსთან ერთად გვაქვს ულამაზესი და უგემრიელესი დესერტები.
რა უპირატესობებით სარგებლობთ ბაზარზე?
ქუთაისის ბაზარზე გამორჩეულები ვართ იმ კუთხით, რომ განსხვავებულ გემოებს ვთავაზობთ მომხმარებლებს და ამას ისინი გულწრფელად აღნიშნავენ. გვაქვს ასევე უამრავი საიდუმლო ინგრედიენტი, რომელიც უფრო ამრავალფეროვნებს და მიმზიდველს ხდის ჩვენს საკონდიტროს.
გუნდი და მუშაობის ხარისხი
მინდა ხაზგასმით აღვნიშნო, რომ ძალიან კარგი გუნდი მყავს, რომელიც თავად გადავამზადე და ჩემი რეცეპტები შევასწავლე. ყველაფერს ძალიან მაღალი ხარისხითა და პასუხისმგებლობით უდგებიან, მათ შორის არის 19 წლის გოგონაც, რომელიც საუცხოოდ ამზადებს ყველაფერს.
ტექსტი: მაკუნა შავგულიძე
ფოტო: ლანა ვახტანგაძე
