წარმოგიდგენთ რუბრიკა OK! მენეჯერის სტუმარს – თათია ხორბალაძეს. პროფესიით საზოგადოებასთან ურთიერთობის მენეჯერი და ჟურნალისტია. უკვე სამი წელია „თეგეტა ჰოლდინგში“ მუშაობს და ნახევარი წელია რაც სტრატეგიული კომუნიკაციების დეპარტამენტს ხელმძღვანელობს. წარმატების მთავარ ფორმულაზე საუბრისას აღნიშნავს: „მთავარია ძალიან გინდოდეს რაღაც, გზა რთულია, გამოწვევებით სავსე, თუმცა, მიზნამდე მისასვლელად ყველა კარი უნდა გააღო“. გთავაზობთ ინტერვიუს, რომელიც უკეთ გაგაცნობთ თათია ხორბალაძეს.
თათია, უპირველესად გვიამბეთ თქვენი საქმიანობის შესახებ.
მე ვარ თათია ხორბალაძე, პროფესიით საზოგადოებასთან ურთიერთობის მენეჯერი და ჟურნალისტი. უკვე 3 წელია რაც „თეგეტა ჰოლდინგში“ ვმუშაობ და ამჯერად სტრატეგიული კომუნიკაციების დეპარტამენტის ხელმძღვანელი ვარ. ზოგადად, კომუნიკაცია ჩემი საყვარელი სფეროა და ამ მიმართულებით სიახლეების ძიება ჩემს ყოველდღიურობად იქცა. ნამდვილად სასიამოვნოა, რომ ჩემს ცოდნასა და გამოცდილებას ერთ-ერთი მსხვილი კომპანიის კომუნიკაციების დაგეგმვაში ვიყენებ.
სტრატეგიული კომუნიკაციების დეპარტამენტი „თეგეტაში“ ცენტრალიზებულად ფარავს ჰოლდინგის რამდენიმე მიმართულებას და 30-მდე შვილობილ კომპანიას. მათ შორის არიან ისეთი მსხვილი ბრენდებიც, როგორებიც არის Porsche, Mazda, Volvo, Toyota, MAN, JCB და ბევრი სხვა. ჯამურად, მათ საკომუნიკაციო სტრატეგიაზე მუშაობა ძალიან მრავალფეროვანი და საინტერესო პროცესია.
თქვენი გამოცდილების შესახებაც რომ მოგვიყვეთ. გზა, რომელიც დღევანდელ დღემდე გაიარეთ.
ჩემი კარიერული გზა 14 წლის წინ, ტელეკომპანია „რუსთავი 2“-ის საინფორმაციო გამოშვება „კურიერში“ დაიწყო. სტაჟირებაზე რამდნიმე თვით მისული, ძალიან მალე რეპორტიურად ამიყვანეს და ჩემი კარიერის 6 წელი სწორედ „კურიერის“ ნიუსრუმში გავატარე. ეს იყო შესაძლებლობებისა და ახალი გამოცდილებების პერიოდი. შედმეგ იყო სახელმწიფო უწყება – თითქმის ერთი წელი შინგან საქმეთა სამინისტროს საზოგადოებასთან ერთიერთობის დეპარტამენტში ვიმუშავე.
2019 წელს კი „ევექსის“ საზოგადოებასთან ურთიერთობის მიმართულებაში დავიწყე მუშაობა. აქ ჩემი ყოფნა პანდემიის პერიოდს დაემთხვა და ეს იყო გამოწვევებით სავსე პერიოდი. ფაქტობრივად, ჩვენი საკომუნიკაციო სტრატეგიის სრული ტრანსფორმაცია მოგვიხდა. საქართველოს მოსახლეობა ექიმებისგან ელოდა რჩვებს, რეკომენდაციებს და ახალ რეალობაში ცხოვრების გზებს. სწორედ ამ გამოწვევას მოვარგეთ ჩვენი სტრატეგია, საზოგადოების ინფორმირება დავისახეთ მიზნად და ეს რთული პერიოდი დავასრულეთ ვაქცინაციის კამპანიით, რომელმაც ვფიქრობ, დიდი როლი ითამაშა ამ ძალიან მნიშვნელოვან პროცესში. ასეთ განსხვავებულ და კრიზისულ პერიოდში მუშაობამ კიდევ უფრო მეტი გამოცდილება მომცა.
რაც შეეხება „თეგეტას“, ჰოლდინგში უკვე 3 წელია ვმუშაობ. თითქმის 6 თვეა რაც სტრატეგიული კომუნიკაციების მიმართულებას ვხელმძღვანელობ და ძალიან ძლიერ გუნდთან ერთად – ვცდილობთ ავტოინდუსტრია კიდევ უფრო საინტერესო გავხადოთ საზოგადოებისთვის.
როგორ ფიქრობთ, რა არის მთავარი მიზნების და შემდეგ უკვე წარმატების მისაღწევად?
საქმის სიყვარული და შრომა – ჩემთვის ეს ცხოვრების კრედოა. როდესაც გიყვარს შენი საქმე, არ გეშინია დაბრკოლებების და ყველაფერს ახალ გამოწვევად იღებ. მთავარია ძალიან გინდოდეს რაღაც, გზა რთულია, გამოწვევებით სავსე, თუმცა, მიზნამდე მისასვლელად ყველა კარი უნდა გააღო.
რა გაძლევთ მოტივაციას?
მოტივაციას მაძლევს ჩემი საქმის სიყვარული და მრავალფეროვნება. კომუნიკაცია ის სფეროა, სადაც მუდმივად ახლის აღმოჩენის პროცესში ხარ და ეს კიდევ უფრო მეტ ინტერესს გიჩენს.
რას ურჩევდი მათ, ვინც ახლა იწყებენ კარიერას?
ვურჩევდი, რომ იპოვონ ის საქმე, რაც ძალიან უყვართ. ამისათვის შესაძლოა ბევრი პროფესიის შეცვლა, სხვადასხვა გამოწვევის დაძლევა, საინტერესო და რთული გზის გავლა მოუხდეთ, თუმცა, საყვარელი საქმის აღმოჩენად ეს ღირს.
