დიდი ხანია ჟურნალ OK-სთან ვთანამშრომლობ, თუმცა მოწვეული რედაქტორის ამპლუაში პირველად ვარ. ძალიან საინტერესო პროცესია ჟურნალზე მუშაობა, ამბის შექმნა, რომელიც უნდა მიიტანო მკითხველამდე და ისე გადასცე სათქმელი, რომ დააინტერესო, წააკითხო.
ვფიქრობ, ერთობლივი მუშაობით ეს საპასუხისმგებლო საქმე გამოგვივიდა.
ამ ნომერში მოგიყვებით სივრცეზე, რომელმაც ბოლო თვეების განმავლობაში ყველა აალაპარაკა, რადგან შეიქმნა რაღაც განსხვავებული, ერთი დიდი მრავალფუნქციური პავილიონი, რომელიც მუდმივად ტრანსფორმირდება და ყოველ ჯერზე ახერხებს მაყურებლის გაოცებას.
Dinner Theatre – როდესაც ამ პროექტის შესახებ პირველად გავიგე, გავიცანი ადამიანები, რომლებიც დიდი ენთუზიაზმით, დიდი ხნის განმავლობაში ემზადებოდნენ რაღაც ისეთის შესაქმნელად, რაც ახალ მუხტს, ენერგიას შემატებდა ქართულ კულტურასა და გასტრონომიას და ძალიან დავინტერესდი. რაც მთავარია, არ შეუშინდნენ გამოწვევებს,რადგან სჯეროდათ იდეის, რასაც „თეატრი“ უწოდეს, და იმის, რომ იგი გახდებოდა ისეთივე პოპულარული, როგორიც მსგავსი კონცეფციის სივრცეებია ევროპასა თუ ამერიკაში.
„წისქვილი ჯგუფის“ დამფუძნებლების ინიციატივით საქართველოში გაიხსნა პირველი „სავახშმო თეატრი“. ეს არის მულტიფუნქციური სივრცე, სადაც ყველა დეტალი, ყველა ამბავი ხელოვნებაა: შოუც, გასტრონომიაც და სერვისიც.
როგორც კი პირველი ვიდეორგოლი გამოჩნდა სოციალურ სივრცეში, მაშინვე გაჩნდა უდიდესი ინტერესი და ჩართულობა, რომელიც არ განელებულა ამ თვეების განმავლობაში.
რაღაცნაირად შეივსო ის ცარიელი ადგილი, რომელსაც თითქოს საზოგადოება ძალიან დიდხანს ელოდა. „თეატრის“ თითოეული შოუ არის თავგადასავალი, რომელიც დიდხანს მიჰყვება მაყურებელს.
როდესაც კომუნიკაციაზე დავიწყეთ მუშაობა, თეატრის სამხატვრო ხელმძღვანელმა, ზაალ ჩიქობავამ ერთ-ერთ ინტერვიუში თქვა: „ამ „თეატრში“ ყველაფერია და აქ ყველას შეუძლია იპოვოს თავისი თეატრი“. ჰოდა, მართლაც ასე აღმოჩნდა, აქ სხვადასხვა ასაკის, პროფესიის, სტილის, გემოვნების ადამიანმა ნამდვილად იპოვა თავისი თეატრი და, რაც მთავარია, შეიყვარა.
OK BOOK-ის ამ სპეციალურ გამოცემაში, რომელიც სრულად თეატრს ეძღვნება, მოგიყვებით ყველაფერს, საიდან დავიწყეთ, რატომ, ვინ დაიწყო, რას ვაკეთებთ, რა მიზანი გვაქვს, ვინ არის ის არაჩვეულებრივი გუნდი, რომელიც ამ ყველაფრის შემოქმედია.
მოკლედ, მოემზადეთ, ღრმად ამოისუნთქეთ და გადაფურცლეთ, საინტერესო თავგადასავლების სანახავად და წასაკითხად გეპატიჟებით.
