მაკიაჟით, ვარცხნილობითა და აქსესუარებით ჰარმონიული იმიჯის შექმნა შეგვიძლია. ისევე, როგორც ტანსაცმელში, აქაცაა გარკვეული მიმართულებები, რაც აუცილებლად უნდა გავითვალისწინოთ. მოდის მოყვარულები რამდენიმე თვით ადრეც კი ამზადებენ სხვადასხვა სეზონის Look-ებს, აქსესუარებს და რა თქმა უნდა, მაკიაჟის ტენდენციურ ფერებსაც იკვლევენ. მაკიაჟის ტენდენციები ძალიან სწრაფად ვითარდება და იცვლება. ის, რაც 2 წლის წინ იყო მოდაში, დღეს შესაძლოა ღიმილს გვგვრიდეს. აღსანიშნავია თვალის მაკიაჟის განვითარება, რომელიც უკვე რამდენიმე წელია საკმაოდ ორიგინალური ვერსიებით გვაოცებს. თვალის მაკიაჟის განსხვავებულმა ტენდენციამ ყურადღება სერიალიდან „ეიფორია“ მიიპყრო. შეიძლება ითქვას, რომ სწორედ უნიკალური მაკიაჟი და პერსონაჟების სტილი გახდა ტელეშოუს წარმატების მიზეზი. დღეს „ინსტაგრამ“-ინფლუენსერებისა და Beauty-ბლოგერების გვერდებზე ასეთი სტილის უამრავ ვარიაციას ვხედავთ.
ერთად გადავხედოთ, თუ რა სიახლეები შემოგვთავაზა სილამაზის ინდუსტრიამ 2022-2023 წლების შემოდგომა/ზამთრის სეზონისთვის.
მნიშვნელოვანია აღინიშნოს, რომ ახლა ტუჩის გადიდების პროცედურის პოპულარობა ქრება, ბუნებრიობა კი მოდას უბრუნდება. რაც შეეხება თავად მაკიაჟს, ბევრი ბრენდი ყურადღებას ამახვილებს სადა პრიალა ზედაპირისა და ტუჩის კონტურის გამოყენებაზე. თუმცა, ნუ შეგეშინდებათ საკუთარ თავს ექსპერიმენტების საშუალება მისცეთ. 2022 წელს წითელი ფერის ტუჩსაცხი უფრო აქტუალური იქნება, ვიდრე ოდესმე.
ისეთმა ბრენდებმა, როგორებიც არიან Lanvin, Gucci, Blumarine, Versace და სხვა, ტუჩის ყველაზე მუქ ტონალობაზე შეაჩერეს არჩევანი. მათ ჩვენებებზე ვიხილეთ როგორც შავი, ისე მუქი ლურჯი და მუქი იისფერი ტუჩსაცხები. ასე რომ, შეგიძლიათ ამ სეზონზე თამამად მოირგოთ Drama Queen-ის როლი.
შეუძლებელია არ ვახსენოთ Blumarine, Off-White, Koche, Givenchy, რომლებმაც ტუჩის პირსინგები შემოგვთავაზეს და ეს აქსესუარი მომენტალურად ტენდენციური გახადეს.
შემოდგომა/ზამთრის კიდევ ერთი ექსპერიმენტი გამქრალი წარბებია. არაერთმა ბრენდმა სრულიად სხვადასხვა სტილსა და განსხვავებულ მაკიაჟზე შემოგვთავაზა გამქრალი წარბების ეფექტი. ვიხილეთ როგორც ძალიან გაღიავებული, ასევე მთლიანად გაპარსული წარბებიც. ეს ტენდენცია უკვე არაერთმა ვარსკვლავმა თუ სუპერმოდელმა აითვისა. როგორც ჩანს, უწარბო გოგონებს ამ სეზონზე მრავლად ვიხილავთ.
რაც შეეხება თვალის მაკიაჟის ტენდენციურ ფერებს, შემოდგომის ჩვენებებზე ლურჯი და ვარდისფერი დომინირებდა. ორივე ფერი ახალგაზრდულ სულისკვეთებასთან, კარგ განწყობასა და სითამამესთან ასოცირდება. მსგავსი მაკიაჟი, თქვენს ნებისმიერ Look-ს გაახალისებს და მეტ ქალურობასაც შესძენს.
შემოდგომა/ზამთრის ერთ-ერთი მთავარი Beauty-ტენდენცია კი სახეზე დაწებებული ფერადი ქვები გახლავთ. სხვადასხვა ფერის, ფორმისა და ზომის ქვები ვიხილეთ ისეთი ბრენდების კოლექციებში, როგორებიც არიან Gucci, Simone Rocha, Burberry, Koche, Givenchy და სხვა.
