ზაფხულის შვებულების დაგეგმვა ერთ-ერთი ყველაზე მნიშვნელოვანი პროცესია თითოეული ადამიანისთვის. ამ დროს ყველა ჩვენგანი ვცდილობთ შევარჩიოთ მიმართულება და დავგეგმოთ საკუთარი დასვენების დღეები ისე, რომ შევძლოთ და რამდენიმე დღით მაინც მოვწყდეთ ჩვენს დამღლელ ყოველდღიურობას და ქაოსს. სწორედ ამიტომ Travel Book გთავაზობთ რამდენიმე რჩევას მოგზაურობის დაგეგმვამდე, რათა არცერთი დეტალი არ დაგრჩეთ გაუთვალისწინებელი და ისიამოვნოთ თითოეული მომენტით.
გსურთ თქვენი შვებულება რომელიმე ქვეყანაში გაატაროთ? ამ შემთხვევაში შესაძლებელია სხვადასხვაგვარად დაიგეგმოს თქვენი მოგზაურობა, რადგან საშუალება გაქვთ აირჩიოთ ერთი კონკრეტული ქალაქის ან თუნდაც რამდენიმე ქალაქის კომბინაციაც. მიუხედავად იმისა, რომ ადამიანების უმეტესობა ზაფხულს ველოდებით, შვებულების გამოსაყენებლად საუკეთესო პერიოდი გაზაფხული და შემოდგომაა, როდესაც არც ძალიან ცხელა, არც ცივა და ფასებიც შედარებით მისაღებია. ამ დროს დიდი არჩევანი გვაქვს თუნდაც სასტუმროების მიმართულებით.
ქალაქის ტიპის მოგზაურობის დროს შესაძლოა გავითვალისწინოთ საახალწლო პერიოდიც, როდესაც ევროპის ქალაქებში ულამაზესი საშობაო მარკეტებია გახსნილი. დროის ეს მონაკვეთი თითოეულ ჩვენგანს განსაკუთრებული სანახაობის ხილვისა და დაუვიწყარი ემოციების მიღების საშუალებას გვაძლევს. თანაც, წინასწარ შეგვიძლია დავგეგმოთ სასურველი მიმართულებით მოგზაურობა და ბევრად ბიუჯეტურ, მისაღებ ფასად შევიძინოთ ბილეთი, დავჯავშნოთ სასტუმრო.
კიდევ ერთი მიმართულება და არჩევანი საზღვაო ტიპის დასვენებაა, რომელიც მართლაც რომ დაუვიწყარ მოგონებებს დაუტოვებს თითოეულ ჩვენგანს, თუმცა რეკომენდაციების დაცვა და გათვალისწინება აქაც ძალიან მნიშვნელოვანია.
სასურველია ჯავშანი გავაკეთოთ გარკვეული პერიოდით ადრე, რათა ამ შემთხვევაში არჩევანიც უფრო მეტია და ფასიც შედარებით მისაღებია. მოგეხსენებათ, ბოლო მომენტში ყოველთვის იზრდება ფასები ნებისმიერი მიმართულებით. ვისაც განტვირთვა სურს, ვურჩევთ, რეზორტული ტიპის დასვენება აირჩიოს, რადგან ერთ სივრცეშია თავმოყრილი ყველა ის სერვისი, რითაც შეიძლება ადამიანმა ისარგებლოს. კრუიზები ნებისმიერი ასაკის დამსვენებელს ერგება და სთავაზობს სხვადასხვა ტიპის გასართობ სივრცეებსა და კვების ობიექტებს.
მათთვის, ვინც არ არიან მხოლოდ ზაფხულის დასვენებაზე ორიენტირებულნი, შემოდგომა-ზამთრის პერიოდში ძალიან დიდი არჩევანია თუნდაც აზიის მიმართულებით. საოცარი სანახავია ტაილანდი, ინდოეთი, მალდივები… ეს მიმართულებები გვაძლევს როგორც რეზორტული, ასევე სათავგადასავლო მოგზაურობის საშუალებას და არჩევანს. რა თქმა უნდა, აქაც ძალიან მნიშვნელოვანია გავთვალოთ ყველა დეტალი, რადგან ფასები წინასწარ დაჯავშნის შემთხვევაში უფრო მისაღები იქნება.
აქვე უნდა აღინიშნოს, რომ მათთვის, ვისთვისაც მნიშვნელოვანია სხვადასხვა ტიპის კონცერტები და ფესტივალები, ყოველივე ეს წლის განმავლობაში უამრავია. ამიტომ ნებისმიერი გემოვნების ადამიანს შეუძლია აირჩიოს მისთვის საყვარელი არტისტი თუ ფესტივალი და დაესწროს ბიუჯეტურ ფასად.
