დღეს, როდესაც მსოფლიოში ქალებში საშვილოსნოს ყელის კიბო მეორე ადგილს იკავებს ავადობის მხრივ, განსაკუთრებით მნიშვნელოვანი ხდება ადრეული სკრინინგი და ამ პრობლემის დროული მოგვარება. აღნიშნულ საკითხთან დაკავშირებით OK! გაესაუბრა მეან-გინეკოლოგ თამარ თევზაძეს, რომელმაც ისაუბრა მის მიერ განვლილი გზის, საქმიანობის, მეან-გინეკოლოგიის მიმართულებით გავრცელებული პრობლემებისა და რეკომენდაციების შესახებ.
გვიამბეთ თქვენ მიერ განვლილი გზის შესახებ.
ყოველთვის მსურდა საინტერესო და მნიშვნელოვანი პროფესია მქონოდა, რომლითაც ადამიანების დახმარებასა და მათთვის სასარგებლო საქმის გაკეთებას შევძლებდი. მიყვარს ადამიანების დახმარება და ბედნიერი ვარ, როდესაც ჩემს მცდელობას მოაქვს სასიკეთო შედეგი. სწორედ ამიტომ ავირჩიე ექიმის პროფესია და გამოცდები ჩავაბარე თბილისის სახელმწიფო სამედიცინო უნივერსიტეტში. თავიდან სხვადასხვა პროფილისკენ მიმიწევდა გული − მომწონდა კარდიოლოგია, ოფთალმოლოგია, სანამ არ აღმოვჩნდი სამშობიარო ბლოკში და დავესწარი სასწაულს, რომელსაც ბავშვის დაბადება ჰქვია. სწორედ ამ დროს გადავწყვიტე გავმხდარიყავი მეან-გინეკოლოგი და მიუხედავად ჩემი პროფესიის სირთულეებისა, არასდროს მინანია საკუთარი არჩევანი.
ექიმს ძალიან დიდი პასუხისმგებლობა აკისრია, განსაკუთრებით, როდესაც ერთდროულად ორ სიცოცხლეზე ხარ პასუხისმგებელი − დედისა და ბავშვის. ხშირად ძალიან სწრაფად გვიწევს რთული გადაწყვეტილებების მიღება, მაგრამ ბედნიერი მშობლების სიხარულის გაზიარება და გამოჯანმრთელებული პაციენტის მადლიერება არის ის, რის გამოც მიყვარს ჩემი პროფესია.
გაგვაცანით თქვენი საქმიანობა.
რეზიდენტურის დამთავრების შემდეგ მუშაობა დავიწყე კლინიკა „ჰერა 2011“-ის სამეანო ბრიგადის პასუხისმგებელ ექიმად, ასევე კლინიკა „ავერსის“ მარნეულის სამშობიარო სახლის ბრიგადის უფროსად. რაიონში მუშაობის წლებმა დიდი გამოცდილება შემძინა. ჩემი დამოუკიდებელი საქმიანობის 12 წლის განმავლობაში უამრავი ახალშობილის ამქვეყნად მოვლენაში მივიღე მონაწილეობა. ჩემი პროფესია − მეან-გინეკოლოგია მოიცავს ბევრ სფეროს: გინეკოლოგიური დაავადებების დიაგნოსტიკა და მკურნალობა, მომავალი მშობლების ჩასახვისწინა მომზადება, ფიზიოლოგიური და პათოლოგიური მშობიარობის მართვა, მშობიარობის შემდგომი მეთვალყურეობა, ოპერაციული გინეკოლოგია. თანამედროვე ოპერაციულ გინეკოლოგიაში პრიორიტეტულია მცირედინვაზიური და ორგანოშემანარჩუნებელი ოპერაციები, რათა მივიღოთ მაქსიმალურად ეფექტური მკურნალობა და პაციენტი სწრაფად დაუბრუნდეს ცხოვრების ჩვეულ რიტმს. სწორედ ამ მიზნით გავიარე ლაპარასკოპიის სასწავლო კურსი საფრანგეთში, ქალაქ კლერმონში და ყოველწლიურად ვესწრები ოპერაციულ გინეკოლოგიაში საერთაშორისო კონფერენციებს, სადაც შესაძლებელია ჩავატარო მცირედ ინვაზიური ოპერაციები, მათ შორის ლაპარასკოპია, ჰისტეროსკოპია.
პრაქტიკაში გქონიათ ისეთი შემთხვევები, როდესაც დაგვიანებულია პაციენტის მხრიდან მომართვიანობა? თქვენი აზრით, რით არის ყოველივე ეს განპირობებული?
სხვადასხვა ასაკობრივ ჯგუფში სხვადასხვა გინეკოლოგიური პრობლემები იჩენს თავს. ძირითადი მომართვიანობის მიზეზებია მენსტრუალური ციკლის დარღვევები, ქალის სასქესო ორგანოების ანთებითი დაავადებები, ენდომეტრიოზი, საშვილოსნოს მიომა, საშვილოსნოს ყელის დაავადებები, უნაყოფობა, საიმედო კონტრაცეფციის მეთოდის შერჩევა, გადაუდებელი მწვავე გინეკოლოგიური დაავადებები, რომლებიც საჭიროებს სასწრაფო ოპერაციულ ჩარევას. განსაკუთრებით საყურადღებოა საშვილოსნოს ყელის კიბოს ნაადრევი გამოვლენა, რადგან საქართველოში, ისევე, როგორც მსოფლიოს სხვა ქვეყნებში, საშვილოსნოს ყელის კიბო იკავებს ქალებში მეორე ადგილს ავადობისა და სიკვდილიანობის მაჩვენებლით, ძუძუს კიბოს შემდეგ. ამასთანავე, ბოლო წლებში ეს მაჩვენებელი იზრდება. საბედნიეროდ, ეს დაავადება ექვემდებარება პრევენციას, ადრეულ დიაგნოსტიკასა და მკურნალობას. ამიტომ აუცილებელია პერიოდულად ჯანმრთელობის შემოწმება, რათა არ გამოგვრჩეს სერიოზული დაავადების დასაწყისი, მიუხედავად იმისა, გვაქვს ჩივილები თუ არა. გამოკვლევების პასუხების მიხედვით, ექიმი განსაზღვრავს შემდგომი მკურნალობისა და მეთვალყურეობის ტაქტიკას.
რას ურჩევდით თქვენს პაციენტებსა და ჩვენს მკითხველს?
თანამედროვე ქალის ცხოვრების დატვირთული რეჟიმი ხშირად არ იძლევა საშუალებას გამონახოს დრო საკუთარი ჯანმრთელობისთვის. ჩემი რჩევით, სულ მცირე, რაც შეგიძლიათ ნებისმიერ დროს გააკეთოთ იმისთვის, რომ დიდხანს შეინარჩუნოთ მხნეობა და ჯანმრთელობა, შემდეგია: მივყვეთ ჯანსაღი კვების პრინციპებს, რაც მრავალფეროვანი საკვების მიღებას, ნაკლები მარილის, შაქრისა და ტრანსცხიმების მოხმარებას გულისხმობს; მოვიწესრიგოთ ძილის რეჟიმი; ვეცადოთ სტრესების მინიმიზაციას; მოვუმატოთ ფიზიკურ აქტივობას; მივაღწიოთ და შევინარჩუნოთ ნორმალური წონა; ჩავიტაროთ ყოველწლიურად რუტინული გასინჯვები.
ჩემი აზრით, ძალიან მნიშვნელოვანია პაციენტის განათლება რიგ საკითხებში, რათა საჭიროების შემთხვევაში გააზრებულად მიიღოს გადაწყვეტილება საკუთარი ჯანმრთელობის შესახებ. ჩემი მიზანია თანამედროვე მტკიცებითი მედიცინის მიღწევებზე დაფუძნებული ინფორმაციის მიწოდება ქალბატონებისთვის − დროულად ჩაიტარონ სკრინინგული გამოკვლევები, რათა არ იყოს დაგვიანებული მკურნალობა და იცოდნენ როგორ აიცილონ თავიდან მთელი რიგი დაავადებები. სწორედ ამიტომ ინტერნეტ-პლატფორმაზე − ინსტაგრამზე შევქმენი ბლოგი, სადაც ვცდილობ მაქსიმალურად გასაგები ენით მივაწოდო მკითხველს საჭირო ინფორმაცია.
სამომავლო გეგმები…
ჩემი სამომავლო გეგმები უკავშირდება მუდმივად საკუთარი, როგორც მეან-გინეკოლოგის, კვალიფიკაციის ამაღლებას.
საკონტაქტო ინფორმაცია: doctor_tamuna
ტექსტი: მარიამ მთივლიშვილი
ფოტო: ალექსეი სეროვი
