ბრენდი „კალთა“ სულ ცოტა ხნის წინ შეიქმნა და თავის დამკვიდრებას ქართული ტრადიციების თანამედროვე ტანისამოსში გადმოტანით შეეცდება. აღნიშნული კაბები მნიშვნელოვნად შეუწყობს ხელს ძირძველი ქართული კულტურისთვის ახალი სიცოცხლის შთაბერვას და თაობიდან თაობაზე გადაცემას. დეტალური ინფორმაციისთვის OK! გაესაუბრა „კალთის“ შემქმნელს, სოფიკო კალანდიას.
გვიამბეთ „კალთის“ შექმნის ისტორია.
ქართული სამოსისა და კერძოდ, ტრადიციული ქართული კაბების კერვის იდეა დიდი ხნის წინ დამებადა. საკმაოდ პატარა ვიყავი იმისთვის, რომ საკუთარი საქმე წამომეწყო, მაგრამ გონებაში ყოველთვის ვატარებდი ამ იდეას. ვფიქრობ, ეს აზრი მაშინ მომივიდა, როდესაც ბავშვობიდან ეკლესიაში ხშირად ყოფნის დროს ვაკვირდებოდი ხატებს და მხიბლავდა ღვთისმშობლისა და სხვა წმინდანების მკაცრი და საზეიმო სამოსის ხილვა. ხშირად მესმოდა, როდესაც ლოცავდნენ ვინმეს, ღვთისმშობლის კალთა გფარავდეთო. როდესაც წამოვიზარდე და მივხვდი, რომ კალთა ქალის სამოსის მთავარი ატრიბუტი იყო, ჩემთვის ეს სიმბოლოდ იქცა. ჩვენ − ქართველები, მიჩვეულნი ვართ დედის კალთას. მათ ხომ სიბერემდე ბავშვებად მივაჩნივართ და გვანებივრებენ. მე მთიან მხარეში გავიზარდე, საქართველოს ულამაზეს კუთხეში, მარტვილში. ბავშვობა მთის კალთებზე გავატარე და როგორც დედის კალთა იყო ჩემთვის საიმედო, ისევე გახლდათ ჩემი სამშობლოს მთის კალთები ჩემივე ბავშვობის თავშესაფარი. დედაც და ბუნებაც მიფარებდნენ კალთის ქვეშ… ქართველი ქალი ოდითგანვე განთქმული იყო სილამაზით, სინატიფითა და გემოვნებით, თუმცა თუ სამშობლოს სჭირდებოდა, კალთას აიკეცავდა და საკუთარ მიწა-წყალს ხმლით იცავდა! სადაც საჭირო იყო, იქ კი ერთი მანდილის აფრიალებით მშვიდობას ამყარებდა. შესაბამისად, ჩემ მიერ შექმნილი ტანისამოსით მინდა ქართული ფერი, ქართული სიდარბაისლე და სინარნარე ახლებურად წარმოვაჩინო და ახალ განზომილებაში ავიყვანო.
მთავარი ნიშა, რომელიც თქვენს პროდუქციას გამოარჩევს…
ჩემთვის ხარისხი უმნიშვნელოვანესი საკითხია. თავად ვზრუნავ იმაზე, რომ მასალა და ნამუშევარი იყოს საინტერესო ვიზუალის და ისეთი ხარისხის, როგორსაც თვითონ მოვიხმარდი.
სამომავლო გეგმები…
სამომავლოდ, ვგეგმავ გაფართოებას. უკვე შევიძინე ფართი, სადაც ატელიეს გახსნას ვაპირებ, შემდეგ კი კოლექციას დავამატებ ფეხსაცმელებსა და ჩანთებს.
საკონტაქტო ინფორმაცია:
Facebook: კალთა
Instagram: kalta.clothes
