პროფესიით მუსიკოს დოდოკა მეფარიშვილისთვის ახალი საქმის შესწავლა ერთგვარი გამოწვევა იყო. სურვილი, ქსოვა შეესწავლა და შეექმნა საკუთარი შვილებისთის ორიგინალური და გემოვნებიანი სამოსი, რეალობად აქცია. ასე დაიბადა ბრენდი „დოდოკა“, რომელიც საზოგადოებამ ძალიან შეიყვარა. დიდი შრომისა და მონდომების შედეგად წარმატებაც მოვიდა, „დოდოკა“ ლიდერ ქალთა 2022-ის ნომინაციაში – „ორიგინალური ბრენდი და დასაქმების ხელშეწყობა“ – გამარჯვებული გახდა.
ჟურნალი OK კარგად იცნობს თქვენს ბრენდს. როგორ ფიქრობთ, რა არის „დოდოკას“ მთავარი მიღწევა?
ვფიქრობ, ყველაზე დიდი წარმატება ის სიყვარულია, რასაც „დოდოკას“ მომხმარებლები გამოხატავენ. მიხარია, რომ კმაყოფილი მომხმარებლის რიცხვი ყოველწლიურად იზრდება. მადლობა მათ ამ ნდობისთვის.
რა თქმა უნდა, აღსანიშნავია, რომ წელს ბრენდი „დოდოკა“ პირველად გახდა ლიდერ ქალთა 2022-ის ნომინაციაში – „ორიგინალური ბრენდი და დასაქმების ხელშეწყობა“ -გამარჯვებული. ასევე, სულ ახლახან „აწარმოე საქართველოში“ სახელმწიფო პროგრამის „მიკრო და მცირე მეწარმეობა 2022“-ის გრანტის გამარჯვებულიც გავხდი. მეამაყება, რომ ჩემი შრომა დაფასდა.
რას სთავაზობს „დოდოკა“ საზოგადოებას?
საზოგადოებას ვთავაზობთ ქალის, ბავშვისა და მამაკაცის ნაქსოვ ტანისამოსსა და აქსესუარებს. ვქმნით ხარისხიან, ორიგინალურ და ექსკლუზიურ მოდელებს.
აღსანიშნავია, რომ ბრენდის სამოსი იყიდება როგორც საქართველოს ყველა რეგიონში, ასევე საზღვრებს გარეთაც, რაც, დამეთანხმებით ალბათ, დიდი პასუხისმგებლობაა. სასიხარულოსთან ერთად, საპასუხისმგებლო მისიაა ჩემთვის.
კოლექციის შესაქმნელად რისგან იღებთ ყველაზე დიდ ინსპირაციას?
ინსპირაცია შემიძლია მივიღო ყველაფრისგან, მათ შორისაა ჩემი საოცარი ქალაქი ბათუმი, რომელიც დიდ ენერგიას მაძლევს.
ამჟამად ვმუშაობთ ზაფხულის კოლექციაზე. ამ სეზონზე აქტუალურია საცურაო კოსტიუმებზე გადასაცმელები, ნაქსოვი საცურაო კოსტიუმები, ტოპები და სარაფნები, რომელთა ინსპირაციაც ისევ და ისევ ჩვენი მომხმარებლები არიან.
როგორი უნდა იყოს სამოსი – ტრენდული თუ კომფორტული?
მართალია, თვალს ვადევნებ მსოფლიო მოდის წამყვან ბრენდებსა და ინფლუენსერებს, რომლებიც დღეს ძალიან აქტუალურები არიან ინტერნეტსივრცეში, თუმცა ვფიქრობ, რომ უნდა გეცვას ის, რაც მოგწონს და კომფორტულია. ვფიქრობ, ჩემი მომხმარებლისთვის „დოდოკას“ სამოსი კომფორტულია და ამავდროულად, მოდური.
როგორია „დოდოკას“ მომხმარებელი?
მინდა აღვნიშნო, რომ კოლექციაზე მუშაობისას ჩემთვის მნიშვნელოვანია ფერი, სწორედ ამიტომ ჩემი ნამუშევრები ფერადია. ვფიქრობ, „დოდოკას“ მომხმარებელიც ლაღი, მხიარული ადამიანია, რომელსაც „დოდოკას“ სამოსი ფერად განწყობას უქმნის.
როგორ ფიქრობთ, რას მოაქვს წარმატება?
მიზანდასახულობას, შრომასა და მუდმივ განვითარებას. ვთვლი, რომ ძალიან შრომისმოყვარე ვარ, ბევრჯერ გამირისკავს, არ გავურბივარ სირთულეებს, მიყვარს ახლის ძიება.
ვფიქრობ, არცერთმა ქალმა არცერთი წუთით არ უნდა შეაჩეროს ბრძოლა წინსვლისა და განვითარებისთვის.
სამომავლო გეგმები
ბრენდის მეტი ცნობადობისთვის, საქართველოს მასშტაბით, ვმონაწილეობ სხვადასხვა გამოფენა-გაყიდვებში. ასევე, მარკეტინგის კუთხით ვიძენ ცოდნას სხვადასხვა პროექტში ჩართულობით, იქნება ეს ონლაინ თუ ოფლაინტრენინგები.
მჯერა „დოდოკა“ თავის ღირსეულ სიტყვას მომავალშიც იტყვის. სურვილი და მისწრაფება, ქმნიდე ხარისხიანსა და ღირებულს, აუცილებლად დაიმსახურებს უფრო მეტ ნდობასა და სიყვარულს.
ტექსტი: სოფიო მალანია
ფოტო: იულია კირეიჩუკ
