ამასობაში ზაფხული გაილია. თუმცა, როგორ მოვიდა და ან როგორ წავიდა, ვერც გავიგეთ. „ან მოსვლა რა იყო და ან წასვლაო“, ჩვენი წინაპრები იტყოდნენ ასეთ შემთხვევაში, მაგრამ რაც არის, არის. და აი, სექტემბერიც დადგა, გაღვიძების, რესტარტის, დიდი დასვენების მერე ცხოვრების განახლების სეზონი.
მართალია, დიდად მცხუნვარებით ეს ზაფხული ვერ დაიკვეხნიდა, მაგრამ მზის ულტრაიისფერ გამოსხივებას და რუჯს მაინც ყველა მივიღებდით. სექტემბრიდან ძირითადი საზრუნავი ნამზეურისა და კანის სილამაზის შენარჩუნებაა, რაც ნორმალური და მშრალი კანისთვის, უპირველესად, სიღრმისეული დატენიანებით მიიღწევა. ინტენსიურად დაიტენიანეთ კანი სახესა თუ სხეულზე და მაქსიმალურად მოარიდეთ ჯერჯერობით სკრაბებსა და პილინგებს, რათა კანი არ აიქერცლოს და ნამზეურმა დიდხანს გაძლოს. აი, ოქტომბრიდან კი ნამდვილად დადგება პილინგების დრო.
სექტემბრიდან უკვე დროა, რუტინაში დააბრუნოთ ანტიოქსიდანტები – ვიტამინი C. რაკი სექტემბერში მზე კვლავ აქტიურია და C ვიტამინის მზესთან კავშირზე ბოლომდე ვერ ჩამოვყალიბებულვართ (თუმცა კი მე ყოველთვის ვარიდებ თავს დილის რუტინაში მის გამოყენებას), მოდი, საღამოს მოვლაში ჩასვით C ვიტამინის შრატი ან კრემი, გნებავთ ორივე. ვისაც კანი აჭრელებული ან დალაქავებული გაქვთ, მათ განსაკუთრებით მოუხდებათ C ვიტამინის რუტინა, რადგან ეს ინგრედიენტი პირდაპირ ზემოქმედებს და უზრუნველყოფს კანის ერთგვაროვნებას და ერთიან, ჯანსაღ ფერს.
მშრალი და კომბინირებული, აკნესკენ მიდრეკილი კანი ვისაც გაქვთ, დარწმუნებული ვარ, ბევრს გაგიღიზიანებდათ კანს მზე და გამონაყარიც გამოვლინდებოდა. უცნაურია, მაგრამ აკნესკენ მიდრეკილ კანზე მზე ან რადიკალურად დადებითად მოქმედებს – აქრობს გამონაყარს, ან პირიქით, უკიდურეს მდგომარეობამდე მიჰყავს და გამონაყარი ძალიან შემაწუხებელი ხდება. ზაფხულის აკნეთი ვინც შეწუხდით, გირჩევთ, ნელ-ნელა აღადგინოთ aha/bha მჟავების მოხმარება, რომ კანმა ამოისუნთქოს. თამამად ჩართეთ რუტინაში გლიკოლის, სალიცილის, თუთიის შემცველი პროდუქტები. განსაკუთრებით ყურადღება მიაქციეთ ტონერს, რომ გაჯერებული იყოს მჟავებით. ვისაც ცხიმიანი/აკნესკენ მიდრეკილი კანი გაქვთ, ნუ გამოიყენებთ ძლიერ დამატენიანებლებს, უპირატესობა მსუბუქ ფლუიდებს მიანიჭეთ.
არ გამოგვრჩეს ასევე ზაფხულის შემდგომი თმის მოვლა. მზეზე გამომშრალ კანს შემოდგომაზე საკმაოდ დიდი ყურადღება სჭირდება, რათა ფორმაში დაბრუნდეს. აუცილებლად გამოიყენეთ თმის ბოლოებზე მკვებავი ნიღაბი და თმის დამატენიანებელი/მკვებავი შრატები, ზეთები ყოველი დაბანის შემდეგ, ოღონდ ისე, რომ სკალპს მაქსიმალურად მოარიდოთ.
სექტემბერი – დიდი გამოცოცხლებისა და ცხოვრების აქტიურ, სტანდარტულ რიტმში დაბრუნების ხანა – შეგვიძლია თამამად გამოვაცხადოთ გახსნილად და პირდაპირ ავსახოთ ჩვენს ბიუთი-რუტინაზე.
სიყვარულით,
თაკო გვაზავა
ჟურნალ OK!-ს ბიუთი რედაქტორი
