სულ მალე ახალი 2024 წელი შემოაბიჯებს სამყაროში. ყველა ჩვენგანი იმედითა და ახალი სურვილებით ველოდებით მის დადგომას. როგორი იქნება, რა სიახლეებს მოგვიტანს, როგორ შევხვდეთ მას… ამ და სხვა საინტერესო საკითხებთან დაკავშირებით ჟურნალი OK! მიხეილ ცაგარელს ესაუბრა.
ბატონო მიხეილ, როგორი იქნება 2024 წელი?
მოგეხსენებათ, მწვანე დრაკონის წელიწადია, რაც ძალიან მნიშვნელოვანია კაცობრიობისა და სამყაროსთვის. არ იქნება მშვიდი წელი, ეს უკავშირდება გლობალური და ანტიგლობალური ძალების ტანდემს, ამიტომ შესაძლოა ყველა სფეროში იყოს მნიშვნელოვანი ცვლილებები. იქნება საკმაოდ დიდი სირთულეები და ეს პერიოდი გარკვეულწილად განსაზღვრავს კაცობრიობისას მომდევნო 50 წლის განვითარებას და შესაძლოა ისტორიულიც კი ვუწოდოთ.
როგორ შევხვდეთ 2024 წელს?
წლის მთავარი ფერი არის მწვანე, რადგან მოდის მწვანე ხის დრაკონის წელი. ხე ეს არის ზრდა, მათ შორის შემოქმედებითი, პიროვნული, სულიერი, რასაც ხელს უწყობენ ისეთი სტიქიები, როგორიცაა წყალი და მიწა. ამიტომ წყლისა და მიწის სტიქიის ფერები ძალიან აქტუალური იქნება, კონკრეტულად: კრემისფერი, ყავისფერი, ლურჯი, ცისფერი, შავი, ყვითელი, ოქროსფერი. შესაბამისად, ტანსაცმელში უნდა ჭარბობდეს ეს ფერები. სხვა ფერები შეგვიძლია აქსესუარების სახით გამოვიყენოთ.
სუფრა და ნაძვის ხეც ამ ფერების მიხედვით უნდა იყოს გაწყობილი. ცეცხლის ნიშნები – ვერძი, ლომი, მშვილდოსანი, – აჯობებს შეამცირონ წითელი ფერი, რადგან გააძლიერებს აგრესიას და წინასაახალწლო დღეებში არ იქნება უპრიანი.
სასურველია აღმოსავლეთის მხარეს დავდგათ ნაძვის ხე, გვერდით დავუდგათ ჩიჩილაკი. ასევე კარგი იქნება ბროწეული, ლიმონი, მანდარინი. ეს არის სიუხვის, ბარაქის, ჯანმრთელობისა და სიყვარულის სიმბოლოები.
კერძების მხრივ შეზღუდვა არ გვაქვს, რადგან დრაკონს უყვარს ყველაფერი, პირველ რიგში, ხორცეული, ზღვის პროდუქტები, ტკბილეული, მათ შორის ეგზოტიკური საკვები.
მაგიდაზე მაქსიმალურად დააწყვეთ ხისგან დამზადებული ნივთები, კარგი იქნება თუ წყლით სავსე ჯამსაც დავდგამთ. ეს ყველაფერი გააძლიერებს ფინანსურ შესაძლებლობებს, ხელს შეუწყობს ოჯახის გამრავლებას, კარიერულ წინსვლას, ფინანსური მდგომარეობის მეტად გაუმჯობესებას.
კარგი იქნება თუ ორი სანთელი გვექნება მწვანე ფერის, ან თუნდაც მოყვითალო ტონალობის, ორივე აანთეთ ახალი წლის დადგომამდე 15 წუთით ადრე, ერთს მადლობა გადაუხადეთ წინა წლისთვის, მეორეს კი ჩაუთქვით რა გსურთ, რომ მოხდეს ახალ 2024 წელს. ეს ყველაფერი ძალიან კონცენტრირებულად უნდა მოხდეს.
კარგი იქნება ასევე ორლარიანს თუ დავდებთ დილამდე, ახალი წლის 3 სიმბოლოს გვერდით (დრაკონი, კატა-კურდღელი). კატა-კურდღლის წელიწადი გაგრძელდება 10 თებერვლამდე, ამიტომ ახალ წელს პატივი მივაგოთ როგორც დრაკონს, ასევე კატა-კურდღელს. მათ გვერდით, ხის ჯამთან და ხის ნაკეთობებთან ერთად დავდოთ ეს ორლარიანი. მას აუცილებლად ჩაუთქვით რა გსურთ, რომ მოხდეს ფინანსური კუთხით. დატოვეთ დილამდე, შემდეგ აიღეთ, ჩაიდეთ საფულეში ან ჩააგდეთ ყულაბაში. ივნისის შუა რიცხვებიდან შეგიძლიათ ამოიღოთ და დახარჯოთ.
მეკვლე უნდა იყოს აქტიური, ენერგიული, ბრძენი, ჭკვიანი, სანდო ადამიანი, რომელსაც გულწრფელად სურს თქვენი ოჯახის ბედნიერება. ოჯახში უნდა შემოიტანოს ორი მანდარინი, ორი ლიმონი და ორი ბროწეული. ეცადეთ ახალ წელს ახლობელ ადამიანებთან ერთად შეხვდეთ.
