„OK! ბათუმი“-ს სტუმარი საზოგადოებრივი მაუწყებლის აჭარის ტელევიზიისა და რადიოს ჟურნალისტი, ინფლუენსერი, მრავალმხრივი ნიჭით დაჯილდოებული ახალგაზრდა დემეტრე დემე ზოიძეა, რომელიც მუდმივად ორიენტირებულია ახლის შესწავლაზე და მიიჩნევს, რომ, თუ ადამიანს რაღაც გულით სურს, აუცილებლად მიაღწევს საწადელს, რადგან შეუძლებელი არაფერია. ამბობს, რომ მაყურებელთან ურთიერთობა სულ სხვა ემოციებითა და ადრენალინით ავსებს, მუდმივად ცდილობს პოზიტიური განწყობები შეუქმნას მათ. რომელი კადრი არ დაავიწყდება არასოდეს, როგორია პირდაპირ ეთერში მუშაობის ემოციები, როგორც ინფლუენსერი, რა კონტენტს სთავაზობს საზოგადოებას და ვისთან ერთად იცეკვებდა ბათუმის წვიმაში ტანგოს – წაიკითხეთ „OK! ბათუმის“ ინტერვიუ დემეტრე დემე ზოიძესთან.
ყოველთვის მჯერა..
თუ გულით სიყვარულსა და სიკეთეს დაატარებ – გასცემ, სამყარო ორმაგად მეტ დადებით ემოციას, გრძნობას გიბრუნებს და სხვების ცხოვრებასაც აფერადებ.
22 წლის ასაკში საკმაოდ დიდი გამოწვევაა იყო დილის გადაცემის წამყვანი.. თქვენთვის რა ემოციებთანაა დაკავშირებული ტელევიზია…
ზოგადად, დილის გადაცემის წამყვანობა ძალიან საპასუხისმგებლო საქმეა. სირთულეები ყველაფერს ახლავს, მაგრამ როცა შენი საქმე გულით გიყვარს, ყველაფერი გავიწყდება და მხოლოდ შედეგზე ხარ ორიენტირებული. ჩემთვის უმნიშვნელოვანესია მაყურებელი სასიამოვნო ემოციებით იყოს სავსე, დარჩეს რაღაც ისეთი, რაზეც წამით მაინც დაფიქრდება, გაიგებს სიახლეს და იქნება კმაყოფილი გადაცემის ნახვის შემდეგ. ჩემთვის ტელევიზია მეორე სახლია, ჩემი ყოველდღიურობა და მრავალფეროვან ემოციათა ერთობაა.
კადრი, რომელიც არასდროს დაგავიწყდებათ…
ჩართვა, როდესაც პირდაპირ ეთერში ხიდიდან ტანსაცმლით გადავეშვი. ეს ჩართვა, რა თქმა უნდა, დაგეგმილი იყო, თუმცაღა, არასოდეს მავიწყდება ის დადებითი ემოცია, რაც იმ ჩართვას მოჰყვა.
მაყურებლის ნდობა რომ მოიპოვო, საჭიროა…
გულწრფელობა – ეს არის გასაღები, რომელიც ამ სამყაროში ნდობას მოგაპოვებინებს. არა მხოლოდ მაყურებლის, არამედ ყველა იმ ადამიანის, ვინც შენ ირგვლივ ტრიალებს.
მრავალმხრივი შესაძლებლობებით გამოირჩევით. უკრავთ სხვადასხვა ინსტრუმენტზე, სრიალებთ ყინულზე, ცეკვავთ, მღერით. უფრო კონკრეტულად მოგვიყევით თქვენს გატაცებებზე, რომელსაც სიამოვნებით უთმობთ დროს…
ჩამოთვლილთაგან ყველა ძალიან დიდ სიამოვნებას მანიჭებს – ამ აქტივობების ერთობლიობა კი ქმნის დემეს.
რომელ მომღერალთან ისურვებდით დუეტის ჩაწერას…
სტივი უანდერთან. მას სხვადასხვა სახის მუსიკა იზიდავს, ერთი ხმითა და ტონალობით მღერაზე უარს ამბობდა. სოულის, ფანკის, როკ-ენ-როლის, ჯაზის, რეგისა და აფრიკული ელემენტების უბადლო მცოდნეა.
ბედნიერი ვარ, როცა…
სხვას ვაბედნიერებ და დადებითი ემოციებით ვავსებ.
ბათუმი თქვენთვის…
ბათუმი ჩემთვის ურთიერთობაა: „თუ შეგიყვარა, სულსაც გაატან და თუ
დასჭირდა, თავს გაიმეტებ…“ ახალგაზრდებს ვეტყოდი, რომ… უსმინონ გულის ხმას, აუცილებლად სჯეროდეთ საკუთარი შესაძლებლობების და იბრძოლონ თავიანთი ოცნებებისთვის.
მხოლოდ ერთი სიმღერა რომ დაწერილიყო, ის იქნებოდა…
სტივი უანდერის Isn’t she lovely!
მოტივაციის წყარო…
ჩემი შინაგანი ხმა…
მიზანი…
მოძრაობა სულ წინ და წინ…
თუ გაქვთ ბათუმში საყვარელი ადგილები, სადაც მეგობრები ხშირად იკრიბებით…
ძველი ბათუმი.
შთაბეჭდილება, რომელიც არასდროს დაგავიწყდებათ…
როცა სტუდენტი გავხდი და ახალი ეტაპი დაიწყო ჩემს ცხოვრებაში.
ნიჭი, რომელსაც გსურთ ფლობდეთ…
იქნებ ნიჭიც გამომუშავებადია?! ადამიანს რაც სურს ყველაფერს შეუძლია მიაღწიოს საკუთრი შრომით.
ყავა თუ ლუდი
ყავა.
სიყვარულია, როცა…
როცა ურთიერთგაგებაა.
ვისთან ერთად იცეკვებდი ბათუმის წვიმაში ტანგოს…
ჩემს მეგობრებთან ერთად ხშირად ვცეკვავ ბათუმის წვიმიან ქუჩებში და ჩემი ტიკტოკის პლატფორმაზე არაერთი ვიდეო მაქვს ატვირთული.
ფოტო: გიორგი კალანდაძე
ჟურნალისტი: ნანა აბულაძე
