კულინარია რომ დღეს ერთ-ერთი ყველაზე პოპულარული და მოთხოვნადი პროფესიაა, ამაზე ყველა ვთანხმდებით. მიუხედავად პანდემიით გამოწვეული სირთულეებისა, მაინც დავრწმუნდით იმაში, რომ ეს სფერო წინ მიიწევს და მუდმივი განვითარების პროცესშია. ამ და სხვა საინტერესო საკითხებთან დაკავშირებით, OK! Gastro Book-ი „მასტრშეფის“ გამარჯვებულს, ნუცა სურგულაძეს ესაუბრა.
ნუცა, თქვენი აზრით, რა გავლენა იქონია პანდემიამ კულინარიაზე?
ბოლო წლების განმავლობაში საკმაოდ გაიზარდა ამ სფეროს მიმართ დაინტერესება საზოგადოების მხრიდან. ბევრმა თუნდაც შინ დაიწყო კერძების მზადება, ხოლო შემდეგ დახვეწა და განავითარა. ძალიან ბევრმაც გადაწყვიტა, ამ სფეროს გაჰყვეს და პროფესიად აქციოს, მაგრამ უნდა აღინიშნოს, რომ პანდემიამ საკმაოდ ცუდად იმოქმედა ამ სფეროს განვითარებაზე არა მარტო საქართველოში, არამედ ზოგადად, მსოფლიოში. დაიკეტა ძალიან ბევრი რესტორანი, საზოგადოება გადავიდა „ფასთ ფუდზე“, შეიცვალა პრიორიტეტები. რაოდენ სამწუხაროც უნდა იყოს, ეს არის ჩვენი დღევანდელი რეალობა და მოთმინებით უნდა დაველოდოთ სიტუაციის უკეთესობისკენ შეცვლას და ყველაფრის ამოქმედებას.
ბოლო პერიოდში, სანამ პანდემია დაიწყებოდა, მსოფლიოში განსაკუთრებულად სწრაფად დაიწყო ამ სფერომ განვითარება. როგორ ფიქრობთ, რამ განაპირობა ეს ფაქტორი?
ბოლო წლებში მართლაც განსაკუთრებული ტემპით დაიწყო ამ სფერომ განვითარება და წინსვლა. პირადად მე, როდესაც დავიწყე კულინარიის შესწავლა, ჯერ კიდევ არ იყო ამხელა დაინტერესება საზოგადოების მხრიდან. ახლა უკვე აქტიურად ჩაერთნენ როგორც ზრდასრული ადამიანები, ასევე ახალგაზრდა თაობა, რაც ძალიან სასიხარულოა.
როგორ ფიქრობთ, რა გავლენა მოახდინა „მასტერშეფმა“ ამ პროცესში?
„მასტერშეფმა“ მართლაც რომ ფურორი მოახდინა და დიდი გავლენა იქონია მთლიანად საქართველოს მოსახლეობაზე. ბავშვებიდან დაწყებული, უფროსი თაობით დასრულებული, ყველა აქტიურად არის ჩართული ამ გადაცემის მსვლელობაში.
პირადად თქვენ შემთხვევაში, რა შეცვალა „მასტერშეფის“ გამარჯვებულის სტატუსმა?
ძალიან დიდი ხნის განმავლობაში მინდოდა ამ პროექტში მონაწილეობის მიღება. გამარჯვებულის სტატუსმა შემმატა თავდაჯერებულობა, მაგრამ ვიგრძენი მეტი პასუხისმგებლობა როგორც ჩემი თავის, ასევე გარშემომყოფების მიმართ.
რა ასაკიდან დაინტერესდით ამ პროფესიით?
ბავშვობიდან დაინტერესებული ვიყავი, მაგრამ 16 წლის ასაკში გადავწყვიტე პროფესიულად დავუფლებოდი ამ საქმეს.
ვისთვის გიყვართ ყველაზე მეტად კერძების მომზადება?
ალბათ აუდიტორიისთვის. ყველაზე დიდ სიამოვნებას ვიღებ კერძების მომზადებით და შემდეგ შთაბეჭდილებების გაზიარებით.
რას ურჩევდით დამწყებ კულინარებს?
ვურჩევდი, იქონიონ ძალიან დიდი ნებისყოფა და გამძლეობა, რადგან საკმაოდ რთული პროფესიაა და დიდი ძალაა ამისთვის საჭირო. არასოდეს უთხრათ საკუთარ თავს, რომ რაიმეს ვერ შეძლებთ. არასოდეს შეწყვიტოთ სწავლა და განვითარება.
