რა არის კრიპტოვალუტა? − დღეს ამ შეკითხვაზე პასუხს ბევრი ეძებს. მაგრამ სანამ ამას ვუპასუხებთ, უფრო მარტივი შეკითხვა დავსვათ: რა არის ფული? ფული შეიძლება გახდეს ნებისმიერი ნივთი, საგანი ან ფიზიკური სხეულის არმქონე იდეაც კი, თუკი ამაში თქვენს გარშემომყოფებსაც დაარწმუნებთ. ფული შეიძლება იყოს ნებისმიერი რამ, რასაც ფულის ფუნქციის შესრულება შეუძლია.
ფული, როგორც სავაჭრო ოპერაციებისა და გაცვლის ერთეული, უძველესი დროიდან არსებობს, თუმცა ეკონომიკური პროცესის განვითარებისა და კომუნიკაციის ახალი გზების გაჩენის შემდეგ, ბევრი რამ შეიცვალა. ამ ცვლილებების ბოლო წერტილი კი კრიპტოვალუტის გაჩენა გახდა, რაც სხვა ყველაფერთან ერთად, ტექნოლოგიურ პროგრესსაც უნდა „დავაბრალოთ“.
ელექტრონული ფულის შექმნის იდეა წლების წინ გაჩნდა, მაგრამ ამ იდეის პირველი წარმატებული ხორცშესხმა ნამდვილად ბიტკოინი იყო. ბევრისთვის ეს ინდუსტრია ფინანსურ სპეკულაციებთან ასოცირდება, სხვები კი ეკონომიკური და ფინანსური ურთიერთობის მომავალს მხოლოდ ციფრულ სამყაროში ხედავენ. და მაინც, რა არის კრიპტოვალუტა?
ეს არის ციფრული ვალუტა, რომლის გამოყენებით განხორციელებული ნებისმიერი ტრანზაქცია აღირიცხება და ინახება დეცენტრალიზებულ სისტემაში, რომელსაც ბლოკჩეინის სახელით ვიცნობთ. ბლოკჩეინში კრიპტოვალუტით შესრულებული ნებისმიერი ინფორმაცია მუდმივად განახლებადია და მისი გაყალბება შეუძლებელი ხდება. იმისთვის, რომ ტრანზაქცია ბლოკჩეინში მოხვდეს, საჭიროა მაინერები. მაინერების მუშაობის პრინციპი მარტივია: ისინი ბლოკში ახალ ინფორმაციას ტვირთავენ, სანაცვლოდ კი გამოიმუშავებენ კრიპტოვალუტას, რომელიც შესრულებული სამუშაოსთვის მიღებულ ჯილდოდ შეიძლება მივიჩნიოთ. თუმცა, რაც უნდა ჩავუღრმავდეთ დეტალებს, კრიპტოსამყაროს შექმნით გამოწვეული მთავარი რევოლუციური ნაბიჯი ფულის ციფრულ სამყაროსთან ამ დონის ინტეგრაცია და ამ გზით სრულიად ახალი, დეცენტრალიზებული ფინანსური რეალობის შექმნაა, რომელსაც თავისი სრული პოტენციალი ჯერ კიდევ არ გამოუმჟღავნებია.
ახალი ფინანსური რეალობის ნათელი მაგალითია ის ფინანსური ბირჟები, სადაც კრიპტოვალუტით ვაჭრობა ყოველდღიურად მიმდინარეობს და ამ პროცესში საქართველოც აქტიურად არის ჩართული. მიუხედავად იმისა, რომ საკანონმდებლო დონეზე ჯერ კიდევ არ იკვეთება იმის კონტურები, თუ როგორ შეიძლება დარეგულირდეს ეს სფერო, ფაქტია, რომ ყოველდღიურად იზრდება იმ ადამიანთა რიცხვი, ვინც კრიპტოვალუტის შეძენისა და მისით ვაჭრობის სურვილს გამოხატავს.
ტექნოლოგიური პროგრესი ამ პროცესს ძალიან ამარტივებს, რის გამოც გვიწევს შევეგუოთ იმ რეალობას, რომელსაც ძალიან სწრაფად შევეჯახეთ. ამ რეალობის იგნორირება შეუძლებელია, ადაპტირების გზები კი აუცილებლად უნდა ვიპოვოთ, რადგან როდესაც ეს ყველაფერი ზედაპირზე ამოვა და ჩვენი ყოველდღიური ცხოვრების თითოეულ დეტალს შეეხება, შემდეგ შეიძლება ძალიან გვიანი იყოს. ამიტომ, ტექნოლოგიურ პროგრესს არა მხოლოდ ფეხი უნდა ავუწყოთ, არამედ ის ჩვენს სასიკეთოდ უნდა გამოვიყენოთ − ახალი, მომავლის რეალობის შესაქმნელად.
