#OK! დაიჯერე საკუთარი შესაძლებლობების - ინტერვიუ მაია ლაბაძესთან

წარმოგიდგენთ ტურისტული სააგენტო Apple Tour-ის დამფუძნებელსა და ხელმძღვანელს, მაია ლაბაძეს, რომელსაც ჩვენი მკითხველი კარგად იცნობს წინა ნომრებიდან. მუდმივად განვითარებისკენ, ახლის ძიებისკენ მიისწრაფვის და მიაჩნია, რომ ყოველთვის უნდა ეცადო, სხვადასხვა სფეროში გამოცადო საკუთარი თავი, მიიღო დამატებითი ცოდნა, რომელიც უფრო ძლიერ ადამიანად ჩამოგაყალიბებს. ამიტომ მუდმივად გამოცდას უწყობს საკუთარ თავს და როგორც თავად ამბობს, იმარჯვებს კიდეც ამ გამოწვევებზე.

ქალბატონო მაია, ჩვენი მკითხველი კარგად იცნობს თქვენს საქმიანობას. ამჯერად უფრო ვრცლად რომ გვიამბოთ იმ გზის შესახებ, რომელიც დღემდე გაიარეთ.

მოგესალმებით, მე ვარ მაია ლაბაძე. ჩემთვის ძალიან სასიამოვნოა, რომ OK!-ს გუნდი და თქვენი მკითხველი დაინტერესდა ჩემი განვლილი გზითა და საქმიანობით. მინდა გაგიზიაროთ ჩემი ისტორია – ქართველი ქალი აფხაზეთში.

ვცხოვრობდი აფხაზეთში, ქალაქ გაგრაში, ოჯახთან ერთად. იმ პერიოდში ტურიზმი ჩემი ჰობი იყო, მომწონდა ადამიანებთან ურთიერთობა, სხვადასხვა ლოკაციის აღმოჩენა, კულტურასა და ტრადიციებში ჩაღრმავება. ამ ინტერესმა მიმიყვანა იქამდე, რომ დავიწყე მუშაობა ერთ-ერთ ტურისტულ კომპანიაში გიდად. დროთა განმავლობაში მივხვდი, რომ შემეძლო მეტი, ამიტომ გადავწყვიტე შემექმნა საკუთარი სააგენტო. ეს გზა სავსე იყო გამოწვევებითა და ემოციებით. თუ მანამდე ჩემი პასუხისმგებლობა მხოლოდ გიდობა იყო, ახლა უკვე თავად ვქმნიდი ტურებს, ვგეგმავდი მარშრუტებს, ვანგარიშობდი ხარჯებს და ბევრ სხვა დეტალზე ვზრუნავდი. ეს პერიოდი იყო ომის შემდეგ.

ქართველ ქალად მოღვაწეობა ჩემთვის აფხაზეთში განსაკუთრებული სტატუსი იყო. მიმიღეს დიდი სიყვარულით. შესაძლოა ამის ერთ-ერთი მიზეზი ისიც იყო, რომ დედა აფხაზი მყავს, ხოლო მამა – ქართველი. ამავდროულად, ვმუშაობდი სკოლაში, ვასწავლიდი ინგლისურ ენას.

გამოწვევები და სირთულეები, რომლებიც ცხოვრების გზაზე შეგხვდათ?

მიუხედავად იმისა, რომ აფხაზეთში უკვე მყარად ვიყავი ფეხმოკიდებული, ჩემთვის გარდამტეხი მომენტი დადგა, რომელმაც შეცვალა ჩემი ცხოვრება. ეს იყო ჩემი შვილის განათლება. მინდოდა ქართულად ესწავლა, რაც სამწუხაროდ, აფხაზეთში შეუძლებელი იყო, ამიტომ დავბრუნდი საქართველოში.

ისევ თავიდან მომიწია ცხოვრების ახლიდან აწყობამ, თუმცა მზად ვიყავი ყველა სირთულისთვის, რადგან მე ვიყავი სახლში – ჩემს ქალაქში. სიამოვნებით ვიღებდი ყველა სირთულეს, ამ პრობლემებში გავიზარდე.

არ მქონდა საქართველოში არანაირი შემოსავლის წყარო. ვფიქრობდი, როგორ დამეღწია თავი უმუშევრობისთვის და დაიბადა იდეა, რომ ჩემი გამოცდილება და საყვარელი საქმიანობა ჩემს ქალაქში გამეგრძელებინა.

როდის და როგორ დააფუძნეთ სააგენტო Apple Tour?

სწორედ ამ გამოწვევებმა გადამაწყვეტინა დამეფუძნებინა საკუთარი ტურისტული სააგენტო – Apple Tour. სწორედ ასე დაიწყო ტურიზმის სფეროში ჩემი ახალი ეტაპი, უკვე ბათუმში.

დღეს ვფლობ ამ სააგენტოს და ვატარებ ავტობუსის ტურებს საქართველოსა და თურქეთის მიმართულებით. მანამდე ვმუშაობდით როგორც შიდა, ისე საგარეო ტურებზე – ავიაბილეთებზე, დაზღვევაზე, ტურების სრული პაკეტებით.

რამ იქონია გარდამტეხი გავლენა თქვენს საქმიანობაზე?

ყველაფერი კარგად მიდიოდა, სანამ არ დადგა პანდემიის პერიოდი. ისევე, როგორც ყველა სხვა ბიზნესს, მათ შორის მეც შემეხო პანდემიისგან გამოწვეული მდგომარეობა. ტურიზმი გაჩერდა. ზიანი მივიღე, მაგრამ გადავწყვიტე, რომ საქმიანობა გამეგრძელებინა, მხოლოდ ავტობუსის ტურებზე ფოკუსით და დღემდე ასე ვაგრძელებ.

რა არის თქვენთვის ტურიზმი?

ტურიზმი ჩემთვის არის მოლაპარაკება, დიპლომატია, სიყვარული, კულტურა, ტრადიცია და ისტორია. ღირებულებები, რომლებიც ყველა დროში ფასობს!

ოჯახზე მოგვიყევით.

მამა პროფესიით მეზღვაურია, დედა – პედაგოგი. მყავს ორი და – თბილი, მეგობრული და მუდმივად მხარში მდგომი ოჯახი მყავს. ყველაზე დიდი მოტივატორი კი ჩემი შვილია, რადგან მისი დამსახურებით თავს არასოდეს ვაძლევ მოდუნების უფლებას.

სამომავლო გეგმები გაგვიზიარეთ.

ჩემს გეგმებზე ხმამაღლა არ მიყვარს საუბარი, სანამ სრულად არ განხორციელდება. გამოცდილებამ მაიძულა, გავჩუმდე და ვიმოქმედო. ზოგადად შემიძლია გაგიზიაროთ, რომ ახლა ვმუშაობ ჩემს გეგმებზე, თუმცა გეტყვით, რომ ეს საქმიანობა არ უკავშირდება ტურიზმის სფეროს.