თამარი ექიმების ოჯახში გაიზარდა და პროფესიის არჩევაც თავისთავად მოხდა. მედიცინა მისთვის ის სფერო აღმოჩნდა, სადაც პროფესიული რეალიზება მოახდინა და ჩამოყალიბდა სპეციალისტად, რომელსაც უამრავი პაციენტი ენდობა. ნდობა კი ამ სფეროში უმთავრესია.
„ნდობის მოპოვებამდე გზა საკმაოდ რთულია, მითუმეტეს საკმაოდ კონკურენტულ გარემოში. მნიშვნელოვანია, ექიმი იყოს გულისხმიერი პაციენტის მიმართ, ეს საუკეთესო შედეგის წინაპირობაა. შემდგომ კი, სწორედ ეს ნდობა ხდება მთავარი მოტივაციაც“, – ჟურნალი OK! გთავაზობთ ინტერვიუს დერმატო-ვენეროლოგ, დერმატო-კოსმეტოლოგ, ევროპის დერმატო-ვენეროლოგთა აკადემიის წევრსა და მედიცინის აკადემიურ დოქტორთან, თამარ ბასილაძესთან.
ქალბატონო თამარ, რამ განაპირობა თქვენი პროფესიული არჩევანი? და რა ადგილი უჭირავს თქვენს ცხოვრებაში პროფესიულ საქმიანობას?
ჩემი პროფესიული არჩევანი ჩემმა ოჯახმა განაპირობა, რადგან ოჯახის ყველა წევრი ექიმია. შესაბამისად, მეც დიდხანს არ მიფიქრია და გადაწყვეტილება უყოყმანოდ მივიღე, რაც არასოდეს არ მინანია! პროფესიული არჩევანით ბედნიერი ვარ, რადგან ერთი წუთიც ვერ წარმომიდგენია ჩემი ცხოვრება მედიცინის გარეშე.
პროფესიულ საქმიანობას ჩემს ცხოვრებაში საკმაოდ დიდი ადგილი უჭირავს, რადგან გარდა დერმატოლოგიისა, აქტიურად ვმუშაობ ესთეტიკური მიმართულებითაც კლინიკა WELKIN-ში, სადაც დიდი ადგილი უჭირავს როგორც ინიექციურ, ასევე აპარატურულ გამაახალგაზრდავებელ, ინოვაციურ პროცედურებს. ასევე, ვეწევი პედაგოგიურ საქმიანობას, რაც განსაკუთრებით სასიამოვნოა ჩემთვის, გარდა ამისა, ვთანამშრომლობ არაერთ „რითეილერ“ და სადისტრიბუციო კომპანიებთან. შესაბამისად, შეხება მაქვს კოსმეტიკის მწარმოებელ პრემიუმ ბრენდებთან, რაც ჩემთვის, როგორც დერმატოლოგისთვის, ძალიან მნიშვნელოვანია.
როგორია თქვენი მიდგომა პაციენტთან?
რა თქმა უნდა, ყველა პაციენტთან ინდივიდუალური მიდგომა მაქვს. მაქსიმალურად ორიენტირებული ვარ საუკეთესო შედეგზე. ჩემს პროფესიაში კი ყველაზე მნიშვნელოვანი პაციენტის ნდობის მოპოვებაა, რასაც, ვფიქრობ, საკმაოდ კარგად ვართმევ თავს.
რა განაპირობებს ამ ნდობას?
ვფიქრობ, ნდობას ვაღწევ პაციენტებთან ჩემი მიდგომით: მაქსიმალური ინფორმაციის მიწოდებით, ყველა დეტალის გავლით, იქნება ეს დერმატოლოგიური დაავადების გამოსავალი თუ ესთეტიკური პროცედურის შედეგი თავისი თანმდევი გვერდითი მოვლენებით. პაციენტი აფასებს ექიმის გულისხმიერებას და ყურადღებას, რაც საუკეთესო შედეგის წინაპირობაა.
როგორ ფიქრობთ, რომელი თვისება, რა მოცემულობა განაპირობებს ადამიანის წარმატებას?
ადამიანის წარმატებას განაპირობებს მიზანდასახულობა და დაუღალავი შრომა, ახლის სწავლის და მუდმივი პროფესიული განვითარების სურვილი.
რისი კეთება გიყვართ თავისუფალ დროს?
საკმაოდ დატვირთული გრაფიკიდან გამომდინარე, თავისუფალი დრო ნაკლებად მრჩება. რა თქმა უნდა, ამ დროს ვატარებ შვილებთან ერთად, ასევე ძალიან მიყვარს კითხვა და ხშირად პაციენტებს შორის ინტერვალის დროს ვახერხებ წიგნის წაკითხვას.
სამომავლო გეგმები
ისევ და ისევ პროფესიული ზრდა, რაც გულისხმობს როგორც საზღვრებს გარეთ კონფერენციებს, ასევე დარგის სიახლეების გაცნობას. სამომავლოდ ასევე ვგეგმავ საკუთარი კლინიკის გახსნას , სადაც ერთ სივრცეში იქნება თავმოყრილი როგორც დერმატოლო-კოსმეტოლოგიური მომსახურება, ისე სასწავლო ცენტრი.
ტექსტი: სოფიო მალანია
ფოტო: ალექსეი სეროვი
