ხშირად ვფიქრობ, რას ნიშნავს ადამიანებისთვის სამშობლო… ალბათ მშობლიურ კერას, სადაც იბადები, იზრდები, და გრძნობას, უცებ რომ ამოგათქმევინებს: „არ გავცვლი მე ჩემს სამშობლოს სხვა ქვეყნის სამოთხეზედა…“ რაღაც ფარული და ძალიან წმინდაა სამშობლო… ხანდახან მასზე საჯაროდ საუბარიც რომ გერიდება… ბოლო დროს ძალიან ხშირად მომისმენია: „მრცხვენია, რომ ქართველი ვარ, ნეტავ აქ არ დავბადებულიყავი…“ ამ დროს არსებობენ ადამიანები, რომელთათვისაც ეს ქვეყანა ისეთივე საყვარელი, მისაღები, თბილი და ტკბილია, როგორიც ჩვენთვის, ან ხანდახან უფრო მეტადაც… ვეცადოთ შევიყვაროთ ჩვენი საქართველო გულწრფელი სიყვარულით და დავინახოთ ის დადებითი მხარეები, რაც უხვად მოუნიჭებია უფალს ჩვენთვის. მაშ ასე, ვსაუბრობთ ჩვენს ქვეყანასა და ახალგაზრდა თაობაზე, მოდელ და ფიტნესტრენერ ვანესა გუტიერესთან.
პირდაპირ ამ შეკითხვით მინდა დავიწყო: რას ფიქრობთ საქართველოზე?
ეს არის ქვეყანა, რომელიც ძალიან სწრაფად ვითარდება და ეს ყველაზე მთავარი და დასაფასებელია, ჩემი აზრით.
ჩვენი ნომერი ახალი თაობას ეძღვნება − დადებითი და უარყოფითი მხარეები, რომლებიც ქართველ ახალგაზრდობაში დაინახეთ…
დადებითი მხარეები არის ის, რომ ახალ თაობას შეუძლია ძალიან ბევრ ენაზე საუბარი, მარტივი კომუნიკაციის დამყარება და ეს ძალიან კარგია. უარყოფით მხარედ თუ შეიძლება მივიჩნიოთ, ვიტყვი − ზედმეტ თავისუფლებას, რომელსაც არ უწევენ ანგარიშს, არ უფრთხილდებიან, სათანადოდ ვერ აფასებენ.
და მაინც, რა მოგწონთ ყველაზე მეტად ქართველ ხალხში?
ძალიან გახსნილები არიან. არ იშურებენ დადებით ემოციებს, ქათინაურებს. ხშირად ყოფილა, ქუჩაში მივდივარ და უცებ მესმის: „როგორ ხარ? ძალიან მიხარია, რომ შევხვდით…“ ეს მეც ძალიან მახარებს.
როგორ ფიქრობთ, რა სახის პრობლემების წინაშე დგას ახალი თაობა საქართველოში და არა მხოლოდ?
არ ვფიქრობ, რომ პრობლემები არსებობს. ამ ქვეყანაში ჩვენ ვვითარდებით და შრომით ვუახლოვდებით საკუთარ ოცნებებს. მგონია, რომ ყველაფერი კარგად არის. საქართველოში თავს დაცულად გრძნობ. განვითარების კუთხით კი შემიძლია ვთქვა, რომ შრომა გიფასდება. ასე რომ, ჩემი აზრით, ახალგაზრდებს სანერვიულო არ აქვთ.
დაცულობა ახსენეთ და თქვენთვის არის თბილისი წყნარი, მშვიდი და დაცული ქალაქი?
დიახ, თბილისი ძალიან ლამაზი ქალაქია − უამრავი გასართობი ადგილით, თეატრით, კინოთი, ფესტივალებით. ძალიან შემიყვარდა აქაურობა. რაც მთავარია, თავს უსაფრთხოდ ვგრძნობ.
თქვენ შესახებ გვიამბეთ − საქმიანობა, გატაცებები…
აქ ბევრი მიმართულებით ვსაქმიანობ: ფიტნესტრენერი ვარ, ვასწავლი ზუმბას, ცეკვას, აკვაპარკში ვმუშაობ, ასევე იოგას ვასწავლი. ბოლო დროს გამიტაცა სამოდელო მიმართულებამ და ამ კუთხითაც შევძელი რეალიზება. მე მგონი, ყველაფერი კარგად მიდის. ჰობის რაც შეეხება, ძალიან მიყვარს ცეკვა.
თქვენს ქვეყანაზეც მოგვიყევით ცოტა რამ. არის რაიმე მსგავსება ჩვენ შორის?
ჩემი სამშობლო ძალიან ლამაზია, ისმის მუდმივად სიმღერა, ცეკვა, ბევრი მოჰიტოა… შეიძლება ითქვას, რომ განწყობით ჰგავს კიდეც ჩვენი ქვეყნები ერთმანეთს.
როგორ ფიქრობთ, რომელია საქართველოს ყველაზე ძლიერი მხარე?
ვფიქრობ, რწმენა − ძლიერი რწმენა. და ასევე, მე რომელ სფეროშიც ვარ, მგონია, რომ ესეც ძლიერი მხარეა − სპორტი ძალიან უყვართ საქართველოში.
ყდის გმირი: ვანესა გუტიერესი; IC Model Management
ფოტო: ლაშა ღუღუნიშვილი
პროექტის ავტორი: ნიკა გომართელი
ვიზაჟი: ნინა შუბლაძე
ჩაცმულობა: DATUNA
