რამდენიმე წლის წინ პამელა ანდერსონი თავისი გამომწვევი სამოსითა და თვალში საცემი მაკიაჟით იყო ცნობილი, დღეს კი მსახიობი უპირატესობას ზომიერებას და ელეგანტურობას ანიჭებს.
მიუხედავად იმისა, რომ მისი ცხოვრება ბევრად უფრო მშვიდი გახდა, პამელა ისევ ქალურობისა და სტილის სიმბოლოდ რჩება, რომელიც უამრავ ადამიანს შთააგონებს.
„აღარ მჭირდება, რომ „მაგარი გოგო“ ვიყო. ახლა შემიძლია უბრალოდ მე ვიყო. საკუთარ თავში კომფორტულად ყოფნა ძალიან ათავისუფლებს“ – ამბობს მსახიობი.
როგორ ვიყოთ მუდმივად აქტუალური? – პამელა ანდერსონი სამ რჩევას გვთავაზობს.
- მაკიაჟზე უარი
წითელი ტუჩსაცხი და ვარდისფერი რუჟი პამელასთვის წარსულს ჩაბარდა. ახლა მსახიობი ნაზ და მსუბუქ მაკიაჟს ამჯობინებს, რომელიც მის ბუნებრივ სილამაზეს ხაზს უსვამს ან კამერის წინ სრულიად უმაკიაჟოდ გამოდის.
ამ ნაბიჯმა უამრავი ქალი შთააგონა. ისინი მსახიობს მადლობას უხდიან, რომ ბუნებრივი სახით საჯაროდ გამოჩენა გაბედა.
„სახლში მაკიაჟის გარეშე ვარ, მაშინ რატომ უნდა გავიკეთო პარიზის მოდის კვირეულისთვის? ძალიან მიხარია, რომ ვიღაცისთვის ეს პოზიტიური მაგალითი გახდა.“ – ამბობს ის.
- „პიარ–რომანი“
პამელას პირად ცხოვრებას ჟურნალისტები და გულშემატკივრები ყოველთვის გამადიდებელი მინით აკვირდებოდნენ. პამელას სახელის ხსენებაზე ბევრს დღემდე ტომი ლისთან მისი ხმაურიანი ქორწინება ახსენდება, თუმცა მსახიობი მის მიმართ გამოჩენილ ინტერესს თავის სასარგებლოდ იყენებს. ფილმის „შიშველი პისტოლეტი“ პრომო-ტურის დროს, სადაც მან მთავარი როლი შეასრულა, გავრცელდა ხმები, რომ პამელამ პარტნიორ ლიამ ნისონთან რომანი გააბა. ხმების გვრცელებას იმანაც ხელი შეუწყო, რომ მსახიობები ყველგან ერთად ჩნდებოდნენ და ერთმანეთს თვალებში შესციცინებდნენ.
ბევრმა ივარაუდა, რომ ეს რომანი პიარის ნაწილი იყო, თუმცა პამელამ ასეთი ვარაუდი უარყო:
„მე არ ვმონაწილეობ და არასდროს მივიღებ მონაწილეობას პიარ-აქციებში. ეს ჩემთვის სასიკვდილო განაჩენი იქნებოდა. მე გულწრფელი ადამიანი ვარ, განსაკუთრებით სიყვარულში და არ მიყვარს, როცა ჩემს პირად ცხოვრებას თუნდაც ნაწილობრივ სხვებს უზიარებენ.“
- ახალი თმის ფერი
კარიერის დასაწყისიდან, წლების განმავლობაში ქერა კულულები პამელას სავიზიტო ბარათი იყო. ქერა კულულები ჰქონდა პამელას გმირს სერიალ „მალიბუს მაშველებში“, მაგრამ ქერას გოგონას დრო დასრულდა – ახლა ანდერსონი წითური ქალბატონია.
პამელას მეგობრების თქმით, ახალი იმიჯი შვედი მსახიობების -გუნელ ლინდბლომისა და ბიბი ანდერსონის შთაგონებით შეიქმნა. სწორედ მათი ფოტოებით მივიდა პამელა პარიზელ სტილისტთან, ჯონ ნოლთან, რომელიც ამ გარდაქმნაში დაეხმარა.
ასევე დაგაინტერესებთ
